امام احمد رحمہ اللہ نے سعد بن معاذ رضی اللہ عنہ سے روایت کیا ہے کہ ایک انصاری شخص نبی صلی ‌اللہ ‌علیہ ‌وآلہ ‌وسلم کی خدمت میں حاضر ہوا تو اس نے عرض کیا: ہمیں جمعہ کے دن کے متعلق بتائیں کہ اس میں کیا خبر ہے؟ آپ صلی ‌اللہ ‌علیہ ‌وآلہ ‌وسلم نے فرمایا: ”اس میں پانچ خصوصیات ہیں،،،،،۔“ اور باقی حدیث آخر تک (اسی طرح) بیان کی۔ ضعیف۔ [مشكوة المصابيح/كتاب الصلاة/حدیث: 1364]

ابوہریرہ رضی اللہ عنہ بیان کرتے ہیں کہ نبی صلی ‌اللہ ‌علیہ ‌وآلہ ‌وسلم سے عرض کیا گیا: جمعہ کے دن کی وجہِ تسمیہ کیا ہے؟ آپ صلی ‌اللہ ‌علیہ ‌وآلہ ‌وسلم نے فرمایا: ”کیونکہ اس روز تمہارے باپ آدم علیہ السلام کا خمیر تیار کیا گیا، اسی میں «النَّفْخَةُ الْأُولَىٰ» (پہلی بار صور پھونکا جانا) اور «النَّفْخَةُ الثَّانِيَةُ» ہے، اسی میں حشر کا میدان سجے گا اور اس کی آخری تین گھڑیوں میں ایک ایسی گھڑی ہے کہ جو شخص اس میں دعا کرتا ہے تو اس کی دعا قبول کی جاتی ہے۔“ (ضعیف) [مشكوة المصابيح/كتاب الصلاة/حدیث: 1365]

ابودرداء رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جمعہ کے روز مجھ پر کثرت سے درود بھیجا کرو، کیونکہ وہ مشہود ہے، اس پر فرشتے حاضر ہوتے ہیں۔ جب تم میں سے کوئی شخص مجھ پر درود پڑھتا ہے تو اس کا درود مجھ پر پیش کیا جاتا ہے حتیٰ کہ وہ اس سے فارغ ہو جائے۔“ راوی بیان کرتے ہیں، میں نے عرض کیا: اور وفات کے بعد؟ آپ صلی ‌اللہ ‌علیہ ‌وآلہ ‌وسلم نے فرمایا: ”اللہ نے انبیاء علیہم السلام کے اجساد کو کھانا زمین (مٹی) پر حرام کر دیا ہے، اللہ کے نبی صلی ‌اللہ ‌علیہ ‌وآلہ ‌وسلم زندہ ہوتے ہیں اور انہیں رزق دیا جاتا ہے۔“ ضعیف۔ [مشكوة المصابيح/كتاب الصلاة/حدیث: 1366]

عبداللہ بن عمرو رضی اللہ عنہما بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جو مسلمان جمعہ کے دن یا جمعہ کی رات فوت ہو جاتا ہے تو اللہ اسے فتنہ قبر سے بچا لیتا ہے۔“ احمد، ترمذی، اور امام ترمذی رحمہ اللہ نے فرمایا: یہ حدیث غریب ہے اور اس کی سند متصل نہیں، ضعیف ہے۔ [مشكوة المصابيح/كتاب الصلاة/حدیث: 1367]

ابن عباس رضی اللہ عنہما سے روایت ہے کہ انہوں نے یہ آیت تلاوت کی: ﴿الْيَوْمَ أَكْمَلْتُ لَكُمْ دِينَكُمْ﴾ [سورة المائدة: 3] ”آج کے دن میں نے تمہارے لیے تمہارا دین مکمل کر دیا ہے“ تو اس وقت ان کے پاس ایک یہودی تھا، اس نے کہا: اگر یہ آیت ہم پر نازل ہوتی تو ہم اس (یومِ نزول) کو عید بنا لیتے۔ ابن عباس رضی اللہ عنہما نے فرمایا: یہ تو عیدین کے روز نازل ہوئی ہے، جمعہ کے دن اور عرفہ کے دن۔ ترمذی، اور انہوں نے فرمایا: یہ حدیث حسن غریب ہے۔ صحیح، رواہ الترمذی۔ [مشكوة المصابيح/كتاب الصلاة/حدیث: 1368]

انس رضی اللہ عنہ بیان کرتے ہیں، جب ماہ رجب شروع ہوتا تو رسول اللہ صلی ‌اللہ ‌علیہ ‌وآلہ ‌وسلم دعا فرماتے: «اَللّٰهُمَّ بَارِكْ لَنَا فِي رَجَبٍ وَشَعْبَانَ وَبَلِّغْنَا رَمَضَانَ» ”اے اللہ! ہمارے لیے رجب و شعبان میں برکت فرما اور ہمیں رمضان تک پہنچا“ اور آپ صلی ‌اللہ ‌علیہ ‌وآلہ ‌وسلم فرمایا کرتے تھے: «لَيْلَةُ الْجُمُعَةِ لَيْلَةٌ غَرَّاءُ وَيَوْمُ الْجُمُعَةِ يَوْمٌ أَزْهَرُ» ”جمعہ کی رات، چمک دار رات ہے اور جمعہ کا دن ترو تازہ دن ہے“۔ ضعیف۔ [مشكوة المصابيح/كتاب الصلاة/حدیث: 1369]

ابن عمر اور ابوہریرہ رضی اللہ عنہما بیان کرتے ہیں، ہم نے رسول اللہ صلی ‌اللہ ‌علیہ ‌وآلہ ‌وسلم کو منبر کی سیڑھیوں پر فرماتے ہوئے سنا: ”لوگ جمعے چھوڑنے سے باز آ جائیں ورنہ اللہ ان کے دلوں پر مہر لگا دے گا اور پھر وہ غافلین میں سے ہو جائیں گے۔“ رواہ مسلم۔ [مشكوة المصابيح/كتاب الصلاة/حدیث: 1370]

ابوجعد ضمری رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جو شخص عدم توجہ کی بنا پر تین جمعے چھوڑے تو اللہ تعالیٰ اس کے دل پر مہر لگا دیتا ہے۔“ «إِسْنَادُهُ حَسَنٌ» ”اس کی سند حسن ہے“، اسے ابوداؤد، ترمذی، نسائی، ابن ماجہ اور دارمی نے روایت کیا ہے۔ [مشكوة المصابيح/كتاب الصلاة/حدیث: 1371]

امام مالک رحمہ اللہ نے اسے صفوان بن سلیم رحمہ اللہ سے روایت کیا ہے۔ صحیح۔ [مشكوة المصابيح/كتاب الصلاة/حدیث: 1372]

امام احمد رحمہ اللہ نے ابوقتادہ رضی اللہ عنہ سے روایت کیا ہے۔ (صحیح)۔ [مشكوة المصابيح/كتاب الصلاة/حدیث: 1373]