مسلم بن شعبہ بیان کرتے ہیں کہ جناب نافع بن علقمہ نے میرے والد کو ان کی اپنی قوم کا سربراہ، نگران کار اور منتظم بنا دیا اور حکم دیا کہ ان سے زکوٰۃ بھی وصول کریں۔ چنانچہ میرے والد نے مجھے (مسلم کو) ایک جماعت کے پاس بھیجا، میں ایک بڑے بزرگ کے پاس پہنچا ان کا نام سعر (بن ویسم) رضی اللہ عنہ تھا۔ میں نے عرض کیا: ”میرے والد نے مجھے بھیجا ہے کہ آپ سے زکوٰۃ لے آؤں۔“ انہوں نے کہا: ”بھتیجے! تم کس قسم کا مال لیتے ہو؟“ میں نے کہا: ”ہم چن کر تھنوں کو دیکھ کر عمدہ بکریاں لیتے ہیں۔“ وہ کہنے لگے: ”بھتیجے! میں تمہیں ایک حدیث بیان کرتا ہوں۔ میں رسول اللہ صلی اللہ علیہ وسلم کے زمانے میں ان وادیوں میں سے ایک وادی میں اپنی بکریوں کے ساتھ تھا کہ میرے پاس دو آدمی آئے جو ایک اونٹ پر سوار تھے۔ انہوں نے مجھ سے کہا: ”ہم رسول اللہ صلی اللہ علیہ وسلم کی طرف سے آپ کے پاس آئے ہیں تاکہ آپ اپنی بکریوں کی زکوٰۃ دے دیں۔“ میں نے پوچھا: ”مجھ پر ان میں سے کیا واجب ہے؟“ انہوں نے کہا: ”ایک بکری۔“ تو میں نے ایک بکری کا قصد کیا جو میں جانتا تھا کہ وہ دودھ اور چربی سے بھری ہوئی تھی۔ میں اسے ان کی طرف نکال لے آیا۔ تو وہ کہنے لگے: ”یہ تو حاملہ ہے اور رسول اللہ صلی اللہ علیہ وسلم نے حاملہ جانور لینے سے منع فرمایا ہے۔“ میں نے کہا: ”آپ لوگ کس طرح کی قبول کریں گے؟“ وہ کہنے لگے: ”ایک سال کی بھیڑ یا بکری، جو دوسرے سال میں جا لگی ہو یا دو سال کی جو تیسرے سال میں شروع ہو۔“ اب میں ایک بھیڑ لے آیا جو موٹی تازی تھی اور حاملہ نہ ہوئی تھی، «الْمُعْتَاطُ» ”وہ بکری جو حاملہ تو نہ ہوئی ہو مگر اس عمر کو پہنچ چکی ہو۔“ وہ میں ان کے لیے نکال لایا تو انہوں نے کہا: ”یہ ہمیں دے دو۔“ تو انہوں نے اس کو اپنے ساتھ اونٹ پر رکھ لیا اور چل دیے۔“ امام ابوداؤد رحمہ اللہ کہتے ہیں: ”ابوعاصم نے زکریا سے روایت کرتے ہوئے راوی کا نام مسلم بن شعبہ کہا ہے، جیسے کہ روح نے بیان کیا ہے۔“ [سنن ابي داود/كتاب الزكاة /حدیث: 1581]