سیدنا زيد بن ارقم رضی اللہ عنہ سے روایت ہے، انہوں نے کہا: میں نبی کریم صلی اللہ علیہ وسلم کے پاس بیٹھا تھا کہ یمن سے ایک شخص آیا اور اس نے بتایا کہ یمن کے تین آدمی سیدنا علی رضی اللہ عنہ کے پاس ایک بچے کے متعلق جھگڑا لے کر آئے، ان تینوں نے ایک ہی طہر میں ایک عورت سے قربت کی تھی، علی رضی اللہ عنہ نے باری باری ان میں سے دو دو اشخاص سے کہا کہ تم خوشدلی سے یہ بچہ اس تیسرے کے حوالے کر دو، لیکن وہ تیار نہ ہوئے، تب علی رضی اللہ عنہ نے فرمایا: ”تم ایسے شراکت دار ہو جو آپس میں ضد کر رہے ہو، اب میں تمہارے درمیان قرعہ اندازی کروں گا، جس کا نام نکلے گا بچہ اسی کا ہوگا اور وہ باقی دو ساتھیوں کو دیت کا دو تہائی حصہ (بطور معاوضہ) ادا کرے گا“، چنانچہ انہوں نے قرعہ اندازی کی اور جس کا نام نکلا بچہ اسے دے دیا، (جب رسول اللہ صلی اللہ علیہ وسلم کو یہ قصہ سنایا گیا تو) آپ صلی اللہ علیہ وسلم ہنس پڑے یہاں تک کہ آپ کی ڈاڑھ مبارک ظاہر ہو گئی۔
شیخین نے اجلح بن عبداللہ کندی سے احتجاج ترک کرنے پر اتفاق کیا ہے، انہوں نے ان کی صرف ایک حدیث پر اعتراض کیا ہے جبکہ اس حدیث میں تین ثقہ راویوں نے ان کی متابعت کی ہے، لہٰذا یہ حدیث صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب الطلاق/حدیث: 2865]