سیدنا عباس بن عبدالمطلب رضی اللہ عنہ فرماتے ہیں: عرفہ کا دن تھا، فضل بن عباس رسول اللہ صلی اللہ علیہ وسلم کے پیچھے سوار تھے اور رسول اللہ صلی اللہ علیہ وسلم کے اردگرد بہت سارے لوگ موجود تھے، جب لوگوں کا بہت زیادہ ہجوم ہو گیا تو میں نے کہا کہ فضل، رسول اللہ صلی اللہ علیہ وسلم کا عمل بیان کریں گے۔ تو فضل نے کہا: رسول اللہ صلی اللہ علیہ وسلم روانہ ہوئے تو لوگ بھی آپ صلی اللہ علیہ وسلم کے ہمراہ روانہ ہو گئے تو رسول اللہ صلی اللہ علیہ وسلم نے اپنی اونٹنی کی لگام پکڑ کر اس کو روکا اور لوگوں کو فرمانے لگے: سکون سے رہو۔ جب مزدلفہ میں پہنچے تو سواری سے نیچے اترے اور مغرب اور عشاء کی نمازا کٹھی پڑھی اور طلوع فجر تک آپ وہیں پر رہے، فجر کی نماز وہاں پر پڑھ کر مزدلفہ میں مشعرالحرام کے قریب وقوف کیا۔ پھر آپ روانہ ہوئے اور تمام لوگ بھی آپ کے ہمراہ روانہ ہو گئے، آپ صلی اللہ علیہ وسلم نے اپنی اونٹنی کی لگام پکڑی ہوئی تھی اور فرما رہے تھے: تم پر اطمینان لازم ہے۔ اور جب وادی محسر میں پہنچے تو اونٹ کو کچھ تیز چلایا اور فرمایا: تم بھی تیز چلو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے کیونکہ یہ حدیث ابومعبد سے ابوزبیر کے علاوہ بھی کئی راویوں نے روایت کی ہے۔ لیکن شیخین رحمۃ اللہ علیہما نے اس کو نقل نہیں کیا۔ البتہ ان کے بھائی سیدنا عبداللہ بن عباس رضی اللہ عنہما کی ان سے روایت کردہ حدیث بخاری اور مسلم میں درج ہے وہ عطاء اور ابومعبد نے سیدنا ابن عباس رضی اللہ عنہما کے حوالے سے نقل کی ہے۔ اور اس میں یہ دو لفظ موجود ہیں ” علیکم بالسکینۃ “ اور ” کان یرمی الجمرۃ “ سیدنا عبداللہ بن عباس رضی اللہ عنہما کی سیدنا فضل سے روایت کردہ حدیث درج ذیل ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5280]