قبیصہ بن جابر اسدی سے روایت ہے، انہوں نے کہا کہ میں (حالتِ احرام میں) مُحرم تھا کہ میں نے ایک ہرن دیکھا، میں نے اسے (پتھر یا تیر) مارا جو اس کے سینگ کی جڑ میں لگا اور وہ مر گیا، میرے دل میں اس بارے میں کھٹک پیدا ہوئی تو میں سیدنا عمر بن خطاب رضی اللہ عنہ کے پاس مسئلہ پوچھنے کے لیے آیا، میں نے ان کے پہلو میں ایک سفید رنگت اور نرم چہرے والے شخص کو بیٹھے ہوئے پایا اور وہ سیدنا عبد الرحمن بن عوف رضی اللہ عنہ تھے، میں نے سیدنا عمر سے سوال کیا تو وہ عبد الرحمن کی طرف متوجہ ہوئے اور پوچھا: ”کیا آپ کے خیال میں اس کے لیے ایک بکری (کفارہ) کافی ہے؟“ انہوں نے کہا: ”جی ہاں“، تو انہوں نے مجھے ایک بکری ذبح کرنے کا حکم دیا، جب ہم ان کے پاس سے اٹھے تو میرے ایک ساتھی نے کہا: ”امیر المؤمنین تمہیں خود فتویٰ نہ دے سکے یہاں تک کہ اس شخص سے پوچھا“، سیدنا عمر رضی اللہ عنہ نے اس کی بات کا کچھ حصہ سن لیا تو انہوں نے درے سے اس کی خوب پٹائی کی، پھر وہ میری طرف مجھے مارنے کے لیے بڑھے تو میں نے عرض کی: ”اے امیر المؤمنین! میں نے کچھ نہیں کہا، یہ بات اس نے کہی ہے“، تو انہوں نے مجھے چھوڑ دیا، پھر فرمایا: ”تم نے حرم میں شکار کیا اور اب فتوے پر اعتراض کرتے ہو؟!“ پھر امیر المؤمنین نے فرمایا: ”انسان میں دس خصلتیں ہوتی ہیں جن میں سے نو اچھی اور ایک بری ہوتی ہے اور وہ ایک بری خصلت باقی سب کو برباد کر دیتی ہے“، پھر فرمایا: ”تم نوجوانوں کی لغزشوں سے بچو۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5438]