سیدہ عائشہ رضی اللہ عنہا سے روایت ہے کہ سیدنا ابوبکر صدیق رضی اللہ عنہ نے فرمایا: میں پہلا شخص تھا جو (احد کے دن) رسول اللہ صلی اللہ علیہ وسلم کی طرف لوٹا اور میرے ساتھ سیدنا طلحہ بن عبید اللہ رضی اللہ عنہ تھے، سیدنا طلحہ رضی اللہ عنہ پر اس وقت غشی طاری تھی جبکہ رسول اللہ صلی اللہ علیہ وسلم ان کے مقابلے میں بہتر حالت میں تھے، تو رسول اللہ صلی اللہ علیہ وسلم نے ہم سے فرمایا: ”تم اپنے ساتھی (طلحہ) کو سنبھالو“، چنانچہ ہم نے آپ صلی اللہ علیہ وسلم کو چھوڑ دیا اور ان کی طرف متوجہ ہوئے، دیکھا تو ان کی زرہ کے خود (ٹوپی) کے حلقے ان کے رخساروں میں دھنسے ہوئے تھے، اسی دوران مشرق کی جانب سے ایک شخص نمودار ہوا جو مجھ سے زیادہ رسول اللہ صلی اللہ علیہ وسلم کے قریب تھا، دیکھا تو وہ سیدنا ابو عبیدہ بن جراح رضی اللہ عنہ تھے، میں خود کے حلقے نکالنے کے لیے آگے بڑھا تو سیدنا ابو عبیدہ رضی اللہ عنہ نے کہا: اے ابوبکر! میں آپ کو اللہ کا واسطہ دیتا ہوں کہ مجھے یہ کام کرنے دیں، چنانچہ میں نے انہیں چھوڑ دیا، انہوں نے (اپنے دانتوں سے) اسے کھینچا تو ان کا سامنے کا ایک دانت ٹوٹ گیا، پھر میں دوسرا حلقہ نکالنے کے لیے آگے بڑھا تو سیدنا ابو عبیدہ رضی اللہ عنہ نے پھر ویسا ہی کہا، انہوں نے وہ دوسرا حلقہ بھی نکالا تو ان کا سامنے کا دوسرا دانت بھی ٹوٹ گیا، تب رسول اللہ صلی اللہ علیہ وسلم نے فرمایا: ”بلاشبہ تمہارے ساتھی (طلحہ) نے (جنت) واجب کر لی ہے“ یا ”طلحہ نے «أَوْجَبَ» (جنت واجب) کر لی“۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5710]