اصبغ بن نباتہ سے روایت ہے کہ میں جنگ صفین کے دن سیدنا علی رضی اللہ عنہ کے پاس موجود تھا اور آپ فرما رہے تھے: ”مجھ سے موت پر - یا فرمایا: قتل ہونے پر - کون بیعت کرتا ہے؟“ تو ننانوے افراد نے بیعت کر لی، پھر آپ رضی اللہ عنہ نے فرمایا: ”وہ تکمیل کرنے والا کہاں ہے؟ وہ کہاں ہے جس کا مجھ سے وعدہ کیا گیا ہے؟“ راوی کہتے ہیں کہ پھر ایک شخص آیا جس نے اون کے پرانے کپڑے پہن رکھے تھے اور اس کا سر منڈا ہوا تھا، اس نے آپ سے موت اور قتل ہونے پر بیعت کر لی، تو کہا گیا کہ یہ اویس قرنی ہیں، چنانچہ وہ آپ کے سامنے مسلسل لڑتے رہے یہاں تک کہ شہید ہو گئے۔
امام حاکم فرماتے ہیں: اس بارے میں امیر المومنین عمر بن خطاب رضی اللہ عنہ کے واسطے سے رسول اللہ صلی اللہ علیہ وسلم سے صحیح روایت موجود ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5823]