سیدنا اسیر بن جابر رضی اللہ عنہ سے مروی ہے کہ جب یمن کے امدادی مجاہدین آئے تو امیرالمومنین سیدنا عمر بن خطاب رضی اللہ عنہ ان سے دریافت کرنے لگے کہ کیا تمہارے درمیان کوئی اویس بن عامر نامی شخص موجود ہے؟ (یہ سلسلہ چلتا رہا حتیٰ کہ آخرکار سیدنا اویس قرنی رضی اللہ عنہ کی باری آ گئی) جب سیدنا عمر بن خطاب رضی اللہ عنہ ان کے پاس آئے تو ان کا سیدنا اویس قرنی رضی اللہ عنہ کے ساتھ درج ذیل مکالمہ ہوا: سیدنا عمر بن خطاب رضی اللہ عنہ: آپ اویس بن عامر ہیں؟ سیدنا اویس رضی اللہ عنہ: جی ہاں۔ سیدنا عمر رضی اللہ عنہ: کیا آپ مراد قبیلے اور قرن سے تعلق رکھتے ہیں؟ سیدنا اویس رضی اللہ عنہ: جی ہاں۔ سیدنا عمر رضی اللہ عنہ: کیا آپ برص کی بیماری میں مبتلا ہوئے تھے، پھر تندرست بھی ہو گئے تھے؟ سیدنا اویس رضی اللہ عنہ: جی ہاں۔ سیدنا عمر بن خطاب رضی اللہ عنہ: کیا آپ نے اپنی والدہ کو پایا؟ سیدنا اویس رضی اللہ عنہ: جی ہاں۔ سیدنا عمر بن خطاب رضی اللہ عنہ: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ یمن کی ایک جماعت کے ہمراہ ایک اویس بن عامر نامی شخص تمہارے پاس آئے گا، جس کا تعلق قبیلہ مراد سے ہو گا اور وہ قرن کا باشندہ ہو گا، وہ برص کی بیماری میں مبتلا ہو کر صحت یاب ہو چکا ہو گا، البتہ ایک درہم جتنا، اس کے جسم پر سفید نشان باقی ہو گا، اس کو (اپنی) والدہ کی صحبت میسر آئی ہو گی اور وہ اپنی ماں کا فرمانبردار ہو گا۔ (اللہ تعالیٰ کی بارگاہ میں اس کا مقام یہ ہو گا کہ) اگر وہ (کسی کام کے لئے) اللہ تعالیٰ کے نام کی قسم اٹھا لے تو اللہ تعالیٰ اس کی قسم کو ضرور پورا کرے گا۔ اگر ہو سکے تو تم اس سے اپنے لئے دعائے مغفرت کروانا، (پھر سیدنا عمر بن خطاب رضی اللہ عنہ نے ان سے) مغفرت کی دعا مانگنے کی درخواست کی، انہوں نے سیدنا عمر رضی اللہ عنہ کے لئے دعائے مغفرت کی۔ سیدنا عمر رضی اللہ عنہ نے پوچھا: آپ کہاں جانا چاہتے ہیں؟ انہوں نے جواباً کہا: کوفہ۔ سیدنا عمر رضی اللہ عنہ نے کہا: کیا میں وہاں کے گورنر کے نام آپ کے لئے ایک خط نہ لکھ دوں، جس کی وجہ سے وہ آپ کے ساتھ اچھا سلوک کریں۔ سیدنا اویس رضی اللہ عنہ نے فرمایا: رہنے دیجئے، کیونکہ مجھے غبار آلود اور مٹی میں اٹے ہوئے لوگوں میں رہنا اچھا لگتا ہے۔ (راوی کہتے ہیں) اگلے سال سرکاری عمائدین میں سے ایک صاحب حج کرنے کے لئے آیا، سیدنا عمر بن خطاب رضی اللہ عنہ نے اس سے سیدنا اویس قرنی رضی اللہ عنہ کے بارے میں دریافت کیا، تو اس نے بتایا کہ میں ان کو اس حالت میں چھوڑ کر آیا ہوں کہ وہ ایک چھوٹے سے شکستہ گھر میں رہتے ہیں۔ اس کے پاس سامان بہت کم ہے۔ سیدنا عمر رضی اللہ عنہ نے فرمایا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ تمہارے پاس یمنی لوگوں کی کسی جماعت کے ہمراہ اویس بن عامر رضی اللہ عنہ آئے گا، اس کا تعلق قبیلہ مراد سے ہو گا اور وہ قرن کا رہنے والا ہو گا۔ وہ برص کی بیماری میں مبتلا ہو کر صحت یاب ہو چکا ہو گا، جبکہ ایک درہم جتنی جگہ پر نشان باقی ہو گا، وہ اپنی والدہ کا فرمانبرار اور خدمت گزار ہو گا، (اللہ تعالیٰ کی بارگاہ میں ایسے مقام کا حامل ہو گا کہ) اگر اللہ تعالیٰ کا نام لے کر قسم اٹھا لے تو اللہ تعالیٰ اس کی قسم کو پورا کر دے گا۔ اگر ہو سکے تو اس سے اپنے لئے دعائے مغفرت کروا لینا، (راوی کہتے ہیں) وہ صاحب (حج سے واپس لوٹا تو) کوفہ میں سیدنا اویس قرنی رضی اللہ عنہ کی خدمت میں حاضر ہوا، اور ان سے دعائے مغفرت کرنے کی درخواست کی، سیدنا اویس رضی اللہ عنہ نے کہا: آپ تو خود ابھی ابھی ایک مبارک سفر سے تشریف لائے ہیں، آپ میرے لئے دعا کریں۔ سیدنا اویس رضی اللہ عنہ نے اس سے پوچھا: کیا تمہاری ملاقات سیدنا عمر بن خطاب رضی اللہ عنہ کے ساتھ ہوئی تھی؟ اس نے کہا: جی ہاں۔ تب کوفہ کے لوگوں کو آپ کے مقام اور مرتبہ کا پتا چلا، تو سیدنا اویس قرنی رضی اللہ عنہ (کوفہ چھوڑ کر کہیں اور) چلے گئے۔ سیدنا اسیر فرماتے ہیں: میں نے ان کی خدمت میں ایک چادر پیش کی تھی (وہ اتنی عمدہ تھی کہ) جو بھی وہ چادر سیدنا اویس کے پاس دیکھتا تو وہ یہی دریافت کرتا کہ اویس کے پاس یہ چادر کہاں سے آئی؟ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو اس اسناد کے ہمراہ نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5824]