مصعب بن عبداللہ کہتے ہیں: ان کے حلفاء میں سے عبداللہ بن مالک بن بحینہ رضی اللہ عنہ ہیں۔ بحینہ ان کی والدہ ہیں۔ یہ بحینہ بنت حارث بن مطلب بن عبدمناف ہے، مالک نے ان کے ساتھ نکاح کیا، مالک ازدشنوہ قبیلے سے تعلق رکھنے والا شخص تھا اور بنی عبدالمطلب کا حلیف تھا، بحینہ کے پیٹ سے ان کا بیٹا، عبداللہ بن مالک پیدا ہوا، اس لئے ان کو ابن بحینہ کہا جاتا تھا، ہم نہیں جانتے کہ تابعین میں سے عبدالرحمن بن ہرمز اعرج ابومحمد کے علاوہ دوسرے کسی شخص نے ان سے روایت کی ہو، ان کی سب سے پہلی حدیث ” سہو “ کے بارے میں ہے۔ اس کے بہت سارے طرق ہیں۔ جب رسول اللہ صلی اللہ علیہ وسلم نماز پڑھتے ہوئے سجدہ کرتے تو اپنے پہلوؤں اور رانوں کے درمیان فاصلہ رکھتے تھے۔ رسول اللہ صلی اللہ علیہ وسلم نے مقام لحی جمل میں پچھنے لگوائے۔ (لحی جمل، مکہ کے راستے میں واقع ایک جگہ کا نام ہے) ٭٭ ابوجعفر محمد بن علی بن حسین الباقر اور محمد بن عبدالرحمن بن ثوبان نے عبداللہ بن مالک بحینہ سے حدیث روایت کی ہے۔ سیدنا باقر سے روایت کردہ حدیث درج ذیل ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5928]