محمد بن قیس بن مخرمہ فرماتے ہیں کہ ایک آدمی سیدنا زید بن ثابت رضی اللہ عنہ کے پاس آیا اور ان سے کوئی مسئلہ پوچھا۔ سیدنا زید رضی اللہ عنہ نے اس سے کہا: تمہیں ابوہریرہ سے مسائل پوچھنے چاہئیں، کیونکہ ایک دفعہ کا ذکر ہے کہ میں، ابوہریرہ اور فلاں شخص مسجد میں بیٹھے ہوئے ذکر الہی اور دعا میں مشغول تھے، اسی اثناء میں رسول اللہ صلی اللہ علیہ وسلم تشریف لے آئے اور آ کر ہمارے پاس بیٹھ گئے، آپ جونہی ہمارے پاس بیٹھے، ہم خاموش ہو گئے، رسول اللہ صلی اللہ علیہ وسلم نے فرمایا: تم اپنا عمل جاری رکھو، سیدنا زید فرماتے ہیں: میں نے اور میرے دوسرے ساتھی نے سیدنا ابوہریرہ رضی اللہ عنہ سے پہلے دعا مانگی، رسول اللہ صلی اللہ علیہ وسلم ہماری دعا پر آمین کہتے رہے۔ ہماری دعا کے بعد سیدنا ابوہریرہ رضی اللہ عنہ نے یوں دعا مانگی ” اے اللہ! میں تجھ سے وہی مانگتا ہوں جو میرے ساتھیوں نے مانگا، اور میں تجھ سے ایسا علم مانگتا ہوں جو بھولے نہیں۔ رسول اللہ صلی اللہ علیہ وسلم نے آمین کہا۔ ہم نے کہا: یا رسول اللہ صلی اللہ علیہ وسلم ہم بھی اللہ تعالیٰ سے ایسا علم مانگتے ہیں جو نہ بھولے۔ تو نبی اکرم صلی اللہ علیہ وسلم نے فرمایا: یہ دعا مانگنے میں دوسی (یعنی ابوہریرہ) تم سے آگے نکل گیا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6282]