سیدنا سلمہ بن اکوع رضی اللہ عنہ سے روایت ہے کہ عامر بن طفیل رسول اللہ صلی اللہ علیہ وسلم سے امان لیے بغیر مدینہ میں داخل نہیں ہوا تھا، جب وہ نبی کریم صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے اس سے فرمایا: ”اے عامر! جو اسلام لاتا ہے وہ سلامت رہتا ہے“، اس نے کہا: جی ہاں، اس شرط پر کہ صحرائی و بدوی علاقے «الْوَبَرَ» میرے ہوں اور شہری و دیہی علاقے «الْمَدَرَ» آپ کے ہوں، آپ صلی اللہ علیہ وسلم نے فرمایا: ”یہ نہیں ہو سکتا، اے عامر! اسلام لے آؤ سلامت رہو گے“، پھر نبی کریم صلی اللہ علیہ وسلم نے فرمایا: ”تم چلے جاؤ یہاں تک کہ ہم کل تمہارے معاملے پر غور کریں“، چنانچہ رسول اللہ صلی اللہ علیہ وسلم نے انصار کو بلا بھیجا اور دریافت فرمایا: ”تمہاری کیا رائے ہے؟ میں نے اس شخص کو دعوت دی ہے مگر وہ اس شرط کے بغیر اسلام لانے سے انکار کرتا ہے کہ صحرا پر اس کی حکومت ہو اور شہر پر میری“، انہوں نے عرض کیا: جو اللہ چاہے اور پھر جو آپ چاہیں یا رسول اللہ! انہوں نے جنگ میں ہم سے ایک اونٹ باندھنے والی رسی «عِقَالًا» لی تو ہم نے ان سے اس کے بدلے دو لیں، اللہ اور اس کا رسول بہتر جانتے ہیں، اگلے دن عامر دوبارہ نبی کریم صلی اللہ علیہ وسلم کے پاس آیا، آپ صلی اللہ علیہ وسلم نے اس سے پوچھا: ”اے عامر! کیا تم اسلام لاتے ہو؟“ اس نے کہا: نہیں، بجز اس کے کہ صحرا میرا ہو اور شہر آپ کا، نبی کریم صلی اللہ علیہ وسلم نے فرمایا: ”کیا اس کے علاوہ کوئی صورت نہیں؟“ مگر اس نے اسی بات پر اصرار کیا کہ خیموں والے علاقے اس کے ہوں اور مٹی کے گھروں والے علاقے نبی کریم صلی اللہ علیہ وسلم کے، تو نبی کریم صلی اللہ علیہ وسلم نے اس کی شرط ماننے سے انکار فرما دیا، عامر نے غصے میں کہا: آگاہ رہو! اللہ کی قسم، میں آپ کے خلاف مدینہ کو سواروں اور پیادوں سے بھر دوں گا، تو نبی کریم صلی اللہ علیہ وسلم نے اس سے فرمایا: ”اللہ تعالیٰ ایسا نہیں ہونے دے گا اور نہ ہی قبیلہ قیلہ کی اولاد یعنی اوس اور خزرج ایسا ہونے دیں گے“، پھر جب عامر پیٹھ پھیر کر چل دیا تو رسول اللہ صلی اللہ علیہ وسلم نے دعا فرمائی: «اللَّهُمَّ اكْفِنِيهِ» ”اے اللہ! اس کے مقابلے میں تو میرے لیے کافی ہو جا“، چنانچہ اللہ تعالیٰ نے اسے اپنے گھر پہنچنے سے پہلے ہی گلے کی سخت سوزش یا خناق «الذُّبَحَةَ» کی بیماری میں مبتلا کر دیا، جب اسے یہ مرض لاحق ہوا تو وہ پکار اٹھا: اے آلِ عامر! یہ تو اونٹ کی گلٹی جیسی گلٹی نکل آئی ہے، چنانچہ وہ اپنے گھر پہنچنے سے پہلے ہی اسی وقت ہلاک ہو گیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 7159]