سبیع بن خالد فرماتے ہیں: تستر فتح ہونے کے زمانے میں، میں کوفہ کی جانب روانہ ہوا، مقصد تھا کہ وہاں سے کچھ خچر لے کر آؤں، میں مسجد میں داخل ہوا، وہاں ہلکا پھلکا (چھریرے بدن والا) شخص موجود تھا، دیکھنے میں حجازی معلوم ہوتا تھا، میں نے پوچھا: یہ کون ہے؟ لوگوں نے آنکھوں کے اشاروں سے مجھ سے پوچھا کہ تم اس آدمی کو پہچانتے نہیں ہو؟ یہ رسول اللہ صلی اللہ علیہ وسلم کے رازدان سیدنا حذیفہ رضی اللہ عنہ ہیں۔ آپ فرماتے ہیں: سیدنا حذیفہ رضی اللہ عنہ نے فرمایا: لوگ رسول اللہ صلی اللہ علیہ وسلم سے خیر کے بارے میں پوچھا کرتے تھے اور میں آپ صلی اللہ علیہ وسلم سے شر کے بارے میں پوچھا کرتا تھا، آپ فرماتے ہیں: میں نے پوچھا: یا رسول اللہ صلی اللہ علیہ وسلم اللہ تعالیٰ نے اس وقت ہمیں جو خیر عطا فرمائی ہے، کیا اس کے بعد کوئی شر بھی آئے گا؟ جیسا کہ اس خیر سے پہلے شر تھا، آپ صلی اللہ علیہ وسلم نے فرمایا: جی ہاں۔ میں نے کہا: یا رسول اللہ صلی اللہ علیہ وسلم اس شر سے بچاؤ کا طریقہ کیا ہے؟ آپ صلی اللہ علیہ وسلم نے فرمایا: تلوار۔ میں نے کہا: تلوار کے بعد بھی کچھ ہو گا؟ آپ صلی اللہ علیہ وسلم نے فرمایا: جی ہاں۔ میں نے کہا: پھر کیا ہو گا؟ آپ صلی اللہ علیہ وسلم نے فرمایا: پھر مصالحت ہو گی، اس کے بعد دھواں ہو گا، میں نے کہا: پھر کیا ہو گا؟ آپ صلی اللہ علیہ وسلم نے فرمایا: دجال ظاہر ہو گا، اس کے ساتھ ایک نہر اور ایک آگ ہو گی، جو اس کی آگ میں جائے گا، وہ اجر کا مستحق ہو گا اور اس کے گناہ معاف کر دیئے جائیں گے، اور جو اس کی نہر میں جائے گا، وہ گناہ کا مستحق ہو جائے گا اور اس کی نیکیاں ضائع ہو جائیں گی۔ میں نے پوچھا: پھر کیا ہو گا؟ آپ صلی اللہ علیہ وسلم نے فرمایا: اس کے بعد قیامت قائم ہو جائے گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الفتن والملاحم/حدیث: 8537]