سیدنا عبداللہ بن عمرو رضی اللہ عنہما اپنے دادا سے روایت کرتے ہیں کہ رسول اللہ صلی اللہ علیہ وسلم نے فرمایا: ”ذی القعدہ کے مہینے میں قبائل کے درمیان کشمکش ہوگی، اور اسی سال حاجیوں کو لوٹ لیا جائے گا، پھر منیٰ میں ایک بڑی جنگ ہوگی جس میں مقتولین کی کثرت ہوگی اور خون بہایا جائے گا، یہاں تک کہ ان کا خون جمرہ عقبہ تک بہہ نکلے گا، اور یہاں تک کہ ان کا ساتھی (مہدی) بھاگ نکلے گا، پھر اسے رکن اور مقامِ ابراہیم کے درمیان لایا جائے گا اور اس سے بیعت لی جائے گی حالانکہ وہ اسے ناپسند کر رہا ہوگا، اس سے کہا جائے گا کہ اگر تم نے انکار کیا تو ہم تمہاری گردن اڑا دیں گے، اس سے بیعت کرنے والوں کی تعداد اہل بدر کے برابر ہوگی، آسمان والے اور زمین والے ان سے راضی ہوں گے۔“ [المستدرك على الصحيحين/كتاب الفتن والملاحم/حدیث: 8747]