عثمان بن عبدالرحمن القرظی بیان کرتے ہیں کہ ام المومنین سیدہ عائشہ رضی اللہ عنہا نے رسول اللہ صلی اللہ علیہ وسلم کے سامنے یہ آیت پڑھی وَلَقَدْ جِئْتُمُونَا فُرَادَى كَمَا خَلَقْنَاكُمْ أَوَّلَ مَرَّةٍ [الأنعام: 94] ”بے شک تم ہمارے پاس اکیلے آئے جیسا ہم نے تمہیں پہلی بار پیدا کیا تھا “ (امام احمد رضا) اور عرض کی: یا رسول اللہ صلی اللہ علیہ وسلم پردے کا کیا بنے گا؟ مرد اور عورتوں کو اکٹھے جمع کیا جائے گا، یہ ایک دوسرے کی شرمگاہوں کو دیکھیں گے۔ رسول اللہ صلی اللہ علیہ وسلم نے ارشاد فرمایا: اس دن ہر شخص کو اپنی مصیبت پڑی ہو گی، اس کو کسی اور چیز کا خیال بھی نہیں رہے گا۔ مرد عورتوں کی جانب اور عورتیں مردوں کی جانب نگاہ نہیں کریں گے، سب ایک دوسرے سے اعراض کر رہے ہوں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب : الأهوال/حدیث: 8903]