حذیفہ بن یمان رضی اللہ عنہ اور سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ لوگوں کو جمع فرمائے گا، جب جنت سنواری جائے گی تب مومنین کھڑے ہوں گے، یہ سب سیدنا آدم علیہ السلام کی خدمت میں حاضر ہوں گے اور عرض کریں گے: اے ہمارے والد محترم، ہمارے لئے جنت کھلوایئے، آپ فرمائیں گے: تمہیں تمہارے باپ آدم کی خطاء ہی نے تو جنت سے نکلوایا تھا، میں یہ کام نہیں کر سکتا، تم سیدنا ابراہیم خلیل اللہ علیہ السلام کے پاس چلے جاو، سب لوگ سیدنا ابراہیم علیہ السلام کے پاس آ جائیں گے، سیدنا ابراہیم علیہ السلام بھی فرمائیں گے کہ میں تمہارا یہ کام نہیں کر سکتا، میں تو خلیل ہوں، بہت پیچھے ہوں، تم سیدنا موسیٰ علیہ السلام کے پاس چلے جاؤ، وہ اللہ تعالیٰ سے ہمکلام ہوتے رہے ہیں، سب لوگ سیدنا موسیٰ علیہ السلام کی خدمت میں حاضر ہوں گے، سیدنا موسیٰ علیہ السلام بھی فرمائیں گے کہ میں تمہارا یہ کام نہیں کر سکتا، تم کلمة اللہ، اور روح اللہ سیدنا عیسیٰ علیہ السلام کے پاس چلے جاؤ، سیدنا عیسیٰ علیہ السلام فرمائیں گے: میں تمہارا یہ کام نہیں کر سکتا، تم محمد صلی اللہ علیہ وسلم کے پاس چلے جاؤ، حضور صلی اللہ علیہ وسلم کھڑے ہوں گے، آپ کو اذن شفاعت ملے گا، آپ کے ہمراہ امانت اور رحم کو بھیجا جائے گا، یہ دونوں پل صراط پر دائیں اور بائیں کھڑے ہو جائیں گے، (پھر امت محمدیہ گزرنا شروع ہو گی) سب سے پہلا شخص ” مرالبرق “ (بجلی کی چمک) کی طرح گزر جائے گا، میں نے عرض کی: میرے ماں باپ آپ پر قربان ہو جائیں یہ ” مرالبرق “ کیا چیز ہے؟ آپ صلی اللہ علیہ وسلم نے فرمایا: تم نے بجلی کو نہیں دیکھا؟ یہ کتنی جلدی گزر کر پلک جھپکنے میں ہی واپس آ جاتی ہے، پھر کچھ لوگ ہوا کی مانند گزریں گے، کچھ لوگ پرندوں کی طرح اور کچھ لوگ سواروں کی طرح گزریں گے۔ ان کے اعمال ان کو لے کر جا رہے ہوں گے، ان کا نبی پل صراط پر کھڑا ” رب سلم سلم “ کی دعائیں کر رہا ہو گا، حتی کہ لوگوں کے اعمال کمزور ہوتے جائیں گے، پھر ایک آدمی آئے گا جو گھسٹ گھسٹ کر گزر رہا ہو گا، پل صراط کے کناروں پر لوہے کے کنڈے لٹک رہے ہوں گے، ان کو اس بات کا پابند کیا گیا ہو گا کہ جس کے بارے میں انہیں حکم ہو، یہ اس کو پکڑ لیں۔ کچھ لوگوں کے جسم چھل جائیں گے لیکن وہ نجات پا جائیں گے اور کچھ لوگ دوزخ میں جا گریں گے۔ اور اس ذات کی قسم جس کے قبضہ قدرت میں ابوہریرہ کی جان ہے جہنم کی گہرائی ستر سال کی مسافت ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب : الأهوال/حدیث: 8964]