حضرت ابوبکر ابراہیم بن مسلم ہجری رحمۃ اللہ علیہ سے روایت ہے، انہوں نے فرمایا: ”میں نے رسول اللہ صلی اللہ علیہ وسلم کے صحابی عبداللہ بن ابی اوفی اسلمی رضی اللہ عنہ کی اقتدا میں ان کی ایک بیٹی کا جنازہ پڑھا۔ انہوں نے اس کے جنازے میں چار تکبیریں کہیں۔ چوتھی تکبیر کے بعد وہ کچھ عرصہ ٹھہرے۔“ فرماتے ہیں: ”میں نے صفوں کے اطراف سے لوگوں کو «سُبْحَانَ اللّٰهِ» ”اللہ پاک ہے“ کہتے سنا۔“ انہوں نے سلام پھیر کر کہا: ”کیا تمہارا خیال تھا کہ پانچ تکبیریں کہہ دوں گا؟“ حاضرین نے کہا: ”ہمیں تو یہی خطرہ محسوس ہوا تھا۔“ انہوں نے فرمایا: ”میں تو ایسے نہیں کرنے لگا تھا لیکن رسول اللہ صلی اللہ علیہ وسلم چار تکبیریں کہہ کر تھوڑی دیر ٹھہرتے تھے اور جو کچھ اللہ تعالیٰ چاہتا وہ کہتے (مناسب دعا پڑھتے،) پھر سلام پھیرتے تھے۔“ [سنن ابن ماجه/كتاب الجنائز/حدیث: 1503]