سیدنا عبداللہ بن عمر رضی اللہ عنہما سے روایت ہے کہ انہوں نے کہا: میں نے رسول اللہ صلی اللہ علیہ وسلم کو فرماتے ہوئے سنا: ”جس شخص کی نمازِ عصر فوت ہو گئی، گویا اس کے اہل و عیال اور مال لُٹ گیا۔“ [المعجم الأوسط/بَابُ الْمِيمِ/حدیث: 8780]

سیدنا زبیر رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو فرماتے ہوئے سنا: ”جس نے میری طرف جھوٹی بات منسوب کی، وہ اپنا ٹھکانا جہنم میں بنا لے۔“
امام طبرانی رحمہ اللہ فرماتے ہیں: ”اس حدیث کو عمر بن عبداللہ بن عروہ رحمہ اللہ سے یزید بن الہاد رحمہ اللہ کے سوا کسی نے روایت نہیں کیا، اور اس میں لیث رحمہ اللہ منفرد ہیں۔“ [المعجم الأوسط/بَابُ الْمِيمِ/حدیث: 8781]

سیدنا ابو سعید خدری رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو فرماتے ہوئے سنا: ”میں سویا ہوا تھا کہ (خواب میں) میں نے لوگوں کو دیکھا کہ وہ مجھ پر پیش کیے جا رہے ہیں اور ان پر قمیصیں ہیں، کسی کی قمیص سینے تک پہنچتی ہے اور کسی کی اس سے کم۔ اور میرے سامنے عمر بن خطاب رضی اللہ عنہ پیش کیے گئے، ان پر ایسی قمیص تھی جسے وہ گھسیٹ رہے تھے۔“ صحابہ کرام رضی اللہ عنہم نے پوچھا: ”اے اللہ کے رسول! آپ نے اس کی کیا تعبیر لی؟“ آپ صلی اللہ علیہ وسلم نے فرمایا: ”دین۔“ [المعجم الأوسط/بَابُ الْمِيمِ/حدیث: 8782]

سیدنا سعد بن ابی وقاص رضی اللہ عنہ سے روایت ہے کہ سیدنا عمر بن خطاب رضی اللہ عنہ نے رسول اللہ صلی اللہ علیہ وسلم کے پاس حاضر ہونے کی اجازت مانگی، اس وقت آپ صلی اللہ علیہ وسلم کے پاس قریش کی کچھ عورتیں بیٹھی آپ صلی اللہ علیہ وسلم سے گفتگو کر رہی تھیں اور (نفقہ وغیرہ میں) زیادہ کا مطالبہ کر رہی تھیں، ان کی آوازیں بلند تھیں۔ جب سیدنا عمر رضی اللہ عنہ نے اجازت مانگی تو وہ جلدی سے پردے کی اوٹ میں ہو گئیں۔ پھر سیدنا عمر رضی اللہ عنہ اندر آئے تو رسول اللہ صلی اللہ علیہ وسلم مسکرا رہے تھے۔ سیدنا عمر رضی اللہ عنہ نے عرض کیا: ”اے اللہ کے رسول! اللہ آپ کو ہمیشہ ہنستا مسکراتا رکھے۔“ رسول اللہ صلی اللہ علیہ وسلم نے فرمایا: ”مجھے ان عورتوں پر تعجب ہوا جو میرے پاس تھیں، جب انہوں نے تمہاری آواز سنی تو جلدی سے پردے میں چلی گئیں۔“ سیدنا عمر رضی اللہ عنہ نے کہا: ”آپ صلی اللہ علیہ وسلم اس بات کے زیادہ حق دار تھے کہ یہ آپ سے ڈرتیں۔“ پھر سیدنا عمر رضی اللہ عنہ نے (ان عورتوں سے) کہا: ”اے اپنی جانوں کی دشمنو! تم مجھ سے ڈرتی ہو اور رسول اللہ صلی اللہ علیہ وسلم سے نہیں ڈرتیں؟“ انہوں نے کہا: ”ہاں، کیونکہ آپ رسول اللہ صلی اللہ علیہ وسلم کی نسبت زیادہ سخت اور درشت مزاج ہیں۔“ تو رسول اللہ صلی اللہ علیہ وسلم نے فرمایا: ”اس ذات کی قسم جس کے ہاتھ میں میری جان ہے! شیطان جب بھی تمہیں کسی راستے پر چلتے ہوئے ملتا ہے تو وہ تمہارے راستے کو چھوڑ کر کسی دوسرے راستے پر چل پڑتا ہے۔“ [المعجم الأوسط/بَابُ الْمِيمِ/حدیث: 8783]

سیدنا ابو ہریرہ رضی اللہ عنہ سے روایت ہے کہ انہوں نے کہا: میں نے رسول اللہ صلی اللہ علیہ وسلم کو فرماتے ہوئے سنا: ”میں سویا ہوا تھا کہ (خواب میں) میں نے خود کو ایک کنویں پر دیکھا، میں نے اس میں سے جتنا اللہ نے چاہا پانی کھینچا، پھر ابن ابی قحافہ (سیدنا ابوبکر رضی اللہ عنہ) نے ایک یا دو ڈول کھینچے اور ان کے کھینچنے میں کچھ کمزوری تھی، اللہ ان کی مغفرت فرمائے۔ پھر وہ ڈول بڑے چرسے (بڑے ڈول) میں بدل گیا تو اسے عمر بن خطاب رضی اللہ عنہ نے تھام لیا، اور میں نے لوگوں میں کوئی ایسا نادرِ روزگار شہسوار نہیں دیکھا جو ان کی طرح پانی کھینچتا ہو، یہاں تک کہ لوگوں نے (اپنے اونٹوں کو سیراب کر کے) حوض کے پاس ان کے ٹھکانے بنا لیے۔“
امام طبرانی رحمہ اللہ فرماتے ہیں: ”ان احادیث کو یزید بن الہاد رحمہ اللہ سے، انہوں نے ابراہیم بن سعد رحمہ اللہ سے، لیث بن سعد رحمہ اللہ کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 8784]

ام المومنین سیدہ عائشہ رضی اللہ عنہا بیان کرتی ہیں: ”رسول اللہ صلی اللہ علیہ وسلم نماز پڑھ رہے ہوتے اور میں آپ صلی اللہ علیہ وسلم کے سامنے جنازے کی طرح آڑے رخ لیٹی ہوتی، یہاں تک کہ جب آپ صلی اللہ علیہ وسلم وتر پڑھنے کا ارادہ فرماتے تو اپنے پاؤں سے مجھے چھوتے اور مجھے جگا دیتے، پھر میں بھی وتر پڑھ لیتی۔“ [المعجم الأوسط/بَابُ الْمِيمِ/حدیث: 8785]

ام المومنین سیدہ عائشہ رضی اللہ عنہا بیان کرتی ہیں: ”رسول اللہ صلی اللہ علیہ وسلم کی وفات اس حال میں ہوئی کہ آپ صلی اللہ علیہ وسلم میرے سینے اور ٹھوڑی کے درمیان (میری گود میں سر رکھے ہوئے) تھے، چنانچہ رسول اللہ صلی اللہ علیہ وسلم پر جو کچھ (موت کی سختی) میں نے دیکھی، اس کے بعد میں کسی کے لیے بھی موت کی سختی کو کبھی ناپسند نہیں کرتی۔“
امام طبرانی رحمہ اللہ فرماتے ہیں: ”ان دونوں حدیثوں کو یزید بن الہاد رحمہ اللہ سے، انہوں نے عبد الرحمن بن قاسم رحمہ اللہ سے، صرف لیث رحمہ اللہ نے روایت کیا ہے۔“ [المعجم الأوسط/بَابُ الْمِيمِ/حدیث: 8786]

سیدنا ابو ہریرہ رضی اللہ عنہ بیان کرتے ہیں: میں نے رسول اللہ صلی اللہ علیہ وسلم کو فرماتے ہوئے سنا: ”اللہ کی راہ میں جہاد کرنے والے کی مثال اس عبادت گزار، قیام کرنے والے کی سی ہے جو روزے اور نماز میں سستی نہیں کرتا، یہاں تک کہ وہ (مجاہد) لوٹ آئے۔ اور اس ذات کی قسم جس کے ہاتھ میں محمد صلی اللہ علیہ وسلم کی جان ہے! اللہ کی راہ میں جس کسی کو زخم لگتا ہے، اور اللہ خوب جانتا ہے کہ کسے اس کی راہ میں زخم لگا ہے، وہ قیامت کے دن اس حال میں آئے گا کہ رنگ خون کا رنگ ہوگا اور خوشبو کستوری کی خوشبو ہوگی۔ اور اس ذات کی قسم جس کے ہاتھ میں میری جان ہے! میری خواہش ہے کہ میں اللہ کی راہ میں قتل کیا جاؤں، پھر زندہ کیا جاؤں، پھر اللہ کی راہ میں قتل کیا جاؤں، پھر زندہ کیا جاؤں، پھر قتل کیا جاؤں۔“ سیدنا ابو ہریرہ رضی اللہ عنہ کہتے ہیں: ”رسول اللہ صلی اللہ علیہ وسلم نے یہ بات تین مرتبہ فرمائی۔“
امام طبرانی رحمہ اللہ فرماتے ہیں: ”اس حدیث کو یزید بن الہاد رحمہ اللہ سے، انہوں نے ابو الزناد رحمہ اللہ سے، صرف لیث رحمہ اللہ نے روایت کیا ہے۔“ [المعجم الأوسط/بَابُ الْمِيمِ/حدیث: 8787]

سیدنا ابو سعید خدری رضی اللہ عنہ بیان کرتے ہیں: میں نے رسول اللہ صلی اللہ علیہ وسلم کو فرماتے ہوئے سنا: ”ابلیس نے اپنے رب سے کہا: ’تیری عزت اور تیرے جلال کی قسم! جب تک بنی آدم میں جانیں (روحیں) باقی ہیں، میں انہیں گمراہ کرتا رہوں گا۔‘ تو اس کے رب نے فرمایا: ’میری عزت اور میرے جلال کی قسم! جب تک وہ مجھ سے بخشش مانگتے رہیں گے، میں انہیں بخشتا رہوں گا۔‘“
امام طبرانی رحمہ اللہ فرماتے ہیں: ”یہ حدیث ابو سعید رضی اللہ عنہ سے صرف اسی سند کے ساتھ روایت کی جاتی ہے، اس میں لیث رحمہ اللہ منفرد ہیں۔“ [المعجم الأوسط/بَابُ الْمِيمِ/حدیث: 8788]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”نیک اعمال میں جلدی کر لو، (قبل اس کے کہ ایسے) فتنے (آ جائیں) جو اندھیری رات کے ٹکڑوں کی طرح (چھا جانے والے) ہوں گے، ان میں آدمی صبح کو مسلمان ہوگا تو شام کو کافر ہو جائے گا، اور شام کو مسلمان ہوگا تو صبح کو کافر ہو جائے گا، وہ اپنا دین دنیا کے تھوڑے سے سامان کے بدلے بیچ ڈالے گا۔“ [المعجم الأوسط/بَابُ الْمِيمِ/حدیث: 8789]