سیدنا عبداللہ بن عمرو بن العاص رضی اللہ عنہما سے روایت ہے کہ انہوں نے بیان کیا: رسول اللہ صلی اللہ علیہ وسلم کو خبر دی گئی کہ میں کہتا ہوں: ”میں ضرور ہمیشہ روزے رکھوں گا اور ضرور رات بھر قیام کروں گا۔“ تو رسول اللہ صلی اللہ علیہ وسلم نے مجھ سے فرمایا: ”کیا تم ہی وہ شخص ہو جو کہتا ہے کہ میں جب تک زندہ رہوں گا ضرور ہمیشہ روزے رکھوں گا اور رات بھر قیام کروں گا؟“ میں نے عرض کیا: ”اے اللہ کے رسول! میں نے یہ بات کہی ہے۔“ تو رسول اللہ صلی اللہ علیہ وسلم نے مجھ سے فرمایا: ”تم اس کی طاقت نہیں رکھتے، لہٰذا روزہ بھی رکھو اور افطار بھی کرو، قیام بھی کرو اور سوؤ بھی، اور ہر مہینے میں تین دن روزے رکھ لیا کرو، کیونکہ ایک نیکی کا ثواب دس گنا ہوتا ہے، یوں یہ ہمیشہ روزہ رکھنے کے برابر ہو جائے گا۔“ میں نے عرض کیا: ”میں اس سے زیادہ افضل (عمل) کی طاقت رکھتا ہوں۔“ رسول اللہ صلی اللہ علیہ وسلم نے فرمایا: ”ایک دن روزہ رکھو اور ایک دن افطار کرو، یہ سیدنا داود علیہ السلام کا روزہ ہے اور یہی سب سے معتدل روزہ ہے۔“ میں نے عرض کیا: ”اے اللہ کے رسول! میں اس سے بھی افضل کی طاقت رکھتا ہوں۔“ آپ صلی اللہ علیہ وسلم نے فرمایا: ”اس سے افضل کوئی (روزہ) نہیں۔“ [المعجم الأوسط/بَابُ الْمِيمِ/حدیث: 8760]

سیدنا معاویہ رضی اللہ عنہ سے روایت ہے، حمید بن عبدالرحمن رحمہ اللہ بیان کرتے ہیں کہ انہوں نے سیدنا معاویہ رضی اللہ عنہ کو مدینہ میں لوگوں سے خطاب کرتے ہوئے سنا، وہ فرما رہے تھے: ”اے اہلِ مدینہ! تمہارے علماء کہاں ہیں؟ میں نے رسول اللہ صلی اللہ علیہ وسلم کو فرماتے سنا: ’یہ عاشوراء کا دن ہے اور تم پر اس کا روزہ فرض نہیں کیا گیا۔‘“ سیدنا معاویہ رضی اللہ عنہ نے فرمایا: ”میں تو روزے سے ہوں، لہٰذا جو روزہ رکھنا پسند کرے وہ رکھ لے اور جو نہ رکھنا چاہے وہ نہ رکھے۔“ یعنی اس سے مراد وہ خود تھے۔ [المعجم الأوسط/بَابُ الْمِيمِ/حدیث: 8761]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب جمعہ کا دن ہوتا ہے تو مسجد کے ہر دروازے پر فرشتے (مقرر) ہوتے ہیں جو پہلے آنے والے کا نام پہلے، پھر اس کے بعد آنے والے کا لکھتے جاتے ہیں، پھر جب امام (منبر پر) بیٹھ جاتا ہے تو وہ صحیفے لپیٹ دیتے ہیں اور ذکر (خطبہ) سننے کے لیے آ جاتے ہیں۔“
امام طبرانی رحمہ اللہ فرماتے ہیں: ”ان احادیث کو سعید بن ابی ہلال رحمہ اللہ سے خالد رحمہ اللہ کے سوا کسی نے روایت نہیں کیا، لیث رحمہ اللہ اس روایت میں منفرد ہیں۔“ [المعجم الأوسط/بَابُ الْمِيمِ/حدیث: 8762]

ام المومنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”اے عائشہ! اگر تمہاری قوم کفر کے زمانے سے اتنی قریب نہ ہوتی تو میں کعبہ کو گرانے کا حکم دیتا، پھر اس کا دروازہ زمین کے برابر کر دیتا اور اس میں دو دروازے رکھ دیتا۔“
امام طبرانی رحمہ اللہ فرماتے ہیں: ”اس حدیث کو ابو النضر سے ابان کے سوا کسی نے روایت نہیں کیا، اور ابان سے سعید بن ابی ہلال کے سوا کسی نے نہیں کیا۔ لیث نے خالد سے روایت کرنے میں تفرد اختیار کیا ہے۔“ [المعجم الأوسط/بَابُ الْمِيمِ/حدیث: 8763]

سیدنا عبداللہ بن عباس رضی اللہ عنہما بیان کرتے ہیں: ”میں چاہتا تھا کہ سیدنا عمر بن خطاب رضی اللہ عنہ سے اللہ عزوجل کے فرمان ﴿وَإِنْ تَظَاهَرَا عَلَيْهِ﴾ (اور اگر تم دونوں اس کے خلاف ایک دوسرے کی مدد کرو) کے بارے میں پوچھوں، مگر ان کے رعب کی وجہ سے ہمت نہ پڑتی تھی، یہاں تک کہ ہم نے ان کے ساتھ ایک حج کیا۔ میں نے دل میں کہا: اگر اس حج میں نہ پوچھ سکا تو پھر کبھی نہ پوچھ سکوں گا۔ جب ہم حج سے فارغ ہوئے تو ہم نے انہیں مرّ کی وادی میں جا لیا، وہ اپنی کسی حاجت کے لیے پیچھے رہ گئے تھے۔ انہوں نے فرمایا: ”خوش آمدید اے رسول اللہ صلی اللہ علیہ وسلم کے چچا زاد! کیا کام ہے؟“ میں نے عرض کیا: ”اے امیر المومنین! ایک بات ہے جو میں آپ سے پوچھنا چاہتا تھا، مگر آپ کے رعب کی وجہ سے پوچھ نہ پاتا تھا۔“ انہوں نے فرمایا: ”جو چاہو مجھ سے پوچھو، کیونکہ ہم (پہلے) کچھ نہیں جانتے تھے، یہاں تک کہ ہم نے سیکھ لیا۔“ میں نے کہا: ”مجھے اللہ عزوجل کے اس فرمان ﴿وَإِنْ تَظَاهَرَا عَلَيْهِ﴾ کے بارے میں بتائیے کہ وہ دونوں کون ہیں؟“ تو سیدنا عمر رضی اللہ عنہ نے فرمایا: ”اس بارے میں مجھ سے زیادہ جاننے والے کسی شخص سے نہ پوچھنا۔ ہم مکہ میں تھے تو ہم میں سے کسی کی بیوی اس سے بات (جواب) نہیں کرتی تھی، وہ تو بس گھر کی خادمہ ہوتی تھیں، جب اسے کوئی حاجت ہوتی تو اس کی ٹانگیں پکڑ کر اس سے اپنی حاجت پوری کر لیتا۔ پھر جب ہم مدینہ آئے تو ہماری عورتوں نے انصار کی عورتوں سے (یہ طور طریقے) سیکھ لیے، چنانچہ وہ ہم سے بات چیت کرنے لگیں اور ہمیں پلٹ کر جواب بھی دینے لگیں۔ ایک دن میں نے اپنے غلاموں کو کسی کام کا حکم دیا تو میری بیوی نے کہا: ”نہیں، یوں یوں کرو۔“ میں ایک چھڑی لے کر اس کی طرف اٹھا اور اسے مارا۔ وہ بولی: ”اے ابن خطاب! تم پر تعجب ہے، تم چاہتے ہو کہ تم سے بات نہ کی جائے، حالانکہ رسول اللہ صلی اللہ علیہ وسلم سے تو آپ صلی اللہ علیہ وسلم کی بیویاں بات کرتی ہیں۔“ پھر میں نکلا اور (اپنی بیٹی) سیدہ حفصہ رضی اللہ عنہا کے پاس گیا اور کہا: ”بیٹی! دیکھنا، رسول اللہ صلی اللہ علیہ وسلم سے کسی بات میں تکرار نہ کرنا اور نہ آپ صلی اللہ علیہ وسلم سے کچھ مانگنا، کیونکہ رسول اللہ صلی اللہ علیہ وسلم کے پاس نہ دینار ہیں نہ درہم کہ آپ صلی اللہ علیہ وسلم تمہیں دے سکیں۔ تمہیں جو کچھ بھی درکار ہو، حتیٰ کہ سر میں لگانے کا تیل بھی، مجھ سے مانگ لیا کرو۔“ رسول اللہ صلی اللہ علیہ وسلم کا معمول تھا کہ جب فجر کی نماز پڑھ لیتے تو اپنی جائے نماز پر بیٹھے رہتے اور لوگ آپ صلی اللہ علیہ وسلم کے گرد بیٹھے رہتے یہاں تک کہ سورج طلوع ہو جاتا۔ پھر آپ صلی اللہ علیہ وسلم اپنی ازواج کے پاس ایک ایک کر کے تشریف لے جاتے، انہیں سلام کہتے اور ان کے لیے دعا فرماتے، اور جس کی باری کا دن ہوتا اس کے پاس ٹھہر جاتے۔ انہی دنوں سیدہ حفصہ بنت عمر رضی اللہ عنہا کو طائف یا مکہ سے شہد کا ایک مشکیزہ (چمڑے کا برتن) ہدیہ میں ملا۔ رسول اللہ صلی اللہ علیہ وسلم جب ان کے ہاں تشریف لے جاتے اور سلام کہتے تو وہ آپ صلی اللہ علیہ وسلم کو روک لیتیں یہاں تک کہ اس میں سے آپ صلی اللہ علیہ وسلم کو چٹا دیتیں یا پلا دیتیں۔ سیدہ عائشہ رضی اللہ عنہا کو آپ صلی اللہ علیہ وسلم کا ان کے پاس اس طرح رک جانا ناگوار گزرا۔ چنانچہ انہوں نے اپنی ایک حبشی لونڈی سے، جس کا نام خضراء تھا، کہا: ”جب آپ صلی اللہ علیہ وسلم حفصہ کے پاس جائیں تو تم بھی ان کے پاس چلی جانا اور دیکھنا کہ وہ کیا کرتے ہیں۔“ اس لونڈی نے انہیں شہد کے معاملے میں جو کچھ ہوتا تھا بتا دیا۔ تو سیدہ عائشہ رضی اللہ عنہا نے اپنی سہیلیوں (دوسری ازواج) کو پیغام بھیج کر یہ بات بتائی اور کہا: ”جب نبی صلی اللہ علیہ وسلم تمہارے پاس آئیں تو کہنا: ہمیں آپ سے مغافیر کی بو آ رہی ہے۔“ پھر جب آپ صلی اللہ علیہ وسلم سیدہ عائشہ رضی اللہ عنہا کے پاس تشریف لائے تو انہوں نے کہا: ”اللہ کے رسول! کیا آج آپ نے کوئی چیز کھائی ہے؟ مجھے آپ سے مغافیر کی بو آ رہی ہے۔“ رسول اللہ صلی اللہ علیہ وسلم پر سب سے زیادہ گراں یہ بات گزرتی تھی کہ آپ صلی اللہ علیہ وسلم سے کسی چیز کی بو محسوس کی جائے۔ تو آپ صلی اللہ علیہ وسلم نے فرمایا: ”وہ شہد ہے، اللہ کی قسم! میں اسے کبھی نہیں کھاؤں گا۔“ پھر جب سیدہ حفصہ رضی اللہ عنہا کی باری کا دن آیا تو انہوں نے عرض کیا: ”اللہ کے رسول! مجھے اپنے والد کے پاس کچھ کام ہے، میرا کچھ نفقہ ان کے پاس ہے، مجھے اجازت دیجیے کہ میں ان کے پاس ہو آؤں۔“ آپ صلی اللہ علیہ وسلم نے اجازت دے دی۔ پھر آپ صلی اللہ علیہ وسلم نے اپنی باندی سیدہ ماریہ رضی اللہ عنہا کو بلوایا اور انہیں سیدہ حفصہ رضی اللہ عنہا کے گھر لے آئے اور ان کے ساتھ خلوت فرمائی۔ اتنے میں سیدہ حفصہ رضی اللہ عنہا واپس آئیں تو دروازہ بند پایا، چنانچہ دروازے کے پاس بیٹھ گئیں۔ پھر رسول اللہ صلی اللہ علیہ وسلم اس حال میں باہر نکلے کہ آپ صلی اللہ علیہ وسلم گھبرائے ہوئے تھے اور چہرۂ مبارک سے پسینہ ٹپک رہا تھا، اور سیدہ حفصہ رضی اللہ عنہا رو رہی تھیں۔ آپ صلی اللہ علیہ وسلم نے فرمایا: ”تمہیں کس چیز نے رلایا ہے؟“ انہوں نے کہا: ”آپ نے مجھے اسی لیے اجازت دی تھی؟ آپ نے اپنی باندی کو میرے گھر میں داخل کیا، پھر میرے بستر پر اس کے ساتھ خلوت کی؟ آپ ان (ازواج) میں سے کسی کے ساتھ ایسا نہ کرتے۔ اللہ کی قسم! اے اللہ کے رسول! آپ کے لیے یہ جائز نہیں تھا۔“ آپ صلی اللہ علیہ وسلم نے فرمایا: ”اللہ کی قسم! تم نے سچ نہیں کہا، کیا وہ میری باندی نہیں ہے جسے اللہ نے میرے لیے حلال کیا ہے؟ میں تمہیں گواہ بناتا ہوں کہ وہ مجھ پر حرام ہے، میں اس کے ذریعے سے تمہاری رضامندی چاہتا ہوں۔ خبردار! یہ بات ان میں سے کسی عورت کو نہ بتانا، یہ تمہارے پاس امانت ہے۔“ پھر جب رسول اللہ صلی اللہ علیہ وسلم باہر تشریف لے گئے تو سیدہ حفصہ رضی اللہ عنہا نے اس دیوار کو کھٹکھٹایا جو ان کے اور سیدہ عائشہ رضی اللہ عنہا کے درمیان تھی اور کہا: ”کیا میں تمہیں خوشخبری نہ سناؤں؟ رسول اللہ صلی اللہ علیہ وسلم نے اپنی باندی کو اپنے اوپر حرام کر لیا ہے اور اللہ نے ہمیں اس سے راحت دے دی۔“ سیدہ عائشہ رضی اللہ عنہا نے کہا: ”اللہ کی قسم! مجھے تو پہلے ہی شبہ تھا کہ آپ صلی اللہ علیہ وسلم قیلولہ اسی کی وجہ سے کرتے ہیں۔“ تب اللہ عزوجل نے یہ آیت نازل فرمائی: ﴿اے نبی! آپ اس چیز کو کیوں حرام ٹھہراتے ہیں جسے اللہ نے آپ کے لیے حلال کیا ہے﴾ ۔ پھر رسول اللہ صلی اللہ علیہ وسلم نے یہ آیت پڑھی: ﴿وَإِنْ تَظَاهَرَا عَلَيْهِ﴾ اور (سیدنا عمر رضی اللہ عنہ نے فرمایا کہ) اس سے مراد سیدہ عائشہ اور سیدہ حفصہ رضی اللہ عنہما ہیں۔ اور لوگوں کا گمان ہے کہ ان دونوں میں سے کوئی ایک دوسری سے کوئی بات نہیں چھپاتی تھی۔ میرا انصار میں سے ایک (دینی) بھائی تھا، جب میں رسول اللہ صلی اللہ علیہ وسلم کی مجلس میں حاضر ہوتا اور وہ اپنی کسی زمین کی دیکھ بھال میں غائب ہوتا تو میں اسے وہ بات بتا دیتا جو رسول اللہ صلی اللہ علیہ وسلم نے فرمائی ہوتی، اور جب میں اپنی زمین کی طرف گیا ہوتا تو وہ مجھے بتا دیتا۔ ایک دن وہ میرے پاس آیا، ہم ان دنوں جبلہ بن ایہم غسانی (کے حملے) سے خوفزدہ رہتے تھے، تو اس نے کہا: ”کیا تمہیں پتا ہے کیا ہوا ہے؟“ میں نے کہا: ”کیا بات ہے؟ شاید جبلہ بن ایہم غسانی کا ذکر ہے؟“ اس نے کہا: ”نہیں، بلکہ معاملہ اس سے بھی سخت ہے۔ رسول اللہ صلی اللہ علیہ وسلم نے فجر کی نماز پڑھی تو اس طرح نہیں بیٹھے جیسے بیٹھا کرتے تھے، اور اپنی ازواج کے پاس بھی نہیں گئے جیسے جایا کرتے تھے، بلکہ اپنے بالاخانے میں الگ ہو گئے ہیں، اور میں لوگوں کو اس حال میں چھوڑ کر آیا ہوں کہ وہ پریشانی سے موج در موج ہو رہے ہیں اور نہیں جانتے کہ آپ صلی اللہ علیہ وسلم کا کیا معاملہ ہے۔“ میں آیا تو لوگ مسجد میں بے چینی سے ہلچل مچائے ہوئے تھے اور کچھ نہیں جانتے تھے۔ میں نے کہا: ”لوگو! جیسے ہو ویسے ہی رہو۔“ پھر میں رسول اللہ صلی اللہ علیہ وسلم کی خدمت میں حاضر ہوا، آپ صلی اللہ علیہ وسلم اپنے بالاخانے میں تھے، جس کے لیے میں نے (چڑھنے کا) ایک زینہ بنا دیا تھا جس پر آپ صلی اللہ علیہ وسلم چڑھتے تھے۔ میں نے آپ صلی اللہ علیہ وسلم کے ایک سیاہ فام غلام سے، جو دربان تھا، کہا: ”عمر بن خطاب کے لیے اجازت مانگو۔“ اس نے میرے لیے اجازت لی تو میں اندر گیا۔ رسول اللہ صلی اللہ علیہ وسلم اپنے بالاخانے میں تھے جہاں ایک چٹائی تھی اور چند کچی کھالیں لٹکی ہوئی تھیں، اور آپ صلی اللہ علیہ وسلم اپنا پہلو چٹائی سے لگائے ہوئے تھے، چٹائی نے آپ صلی اللہ علیہ وسلم کے پہلو میں نشان ڈال دیا تھا، اور آپ صلی اللہ علیہ وسلم کے سر کے نیچے چمڑے کا ایک تکیہ تھا جس میں کھجور کی چھال بھری ہوئی تھی۔ جب میں نے آپ صلی اللہ علیہ وسلم کو اس حال میں دیکھا تو رو پڑا۔ آپ صلی اللہ علیہ وسلم نے فرمایا: ”تمہیں کس چیز نے رلایا؟“ میں نے عرض کیا: ”اللہ کے رسول! فارس اور روم والے (کافر) دیباج اور ریشم میں آرام کرتے ہیں (اور آپ کا یہ حال ہے)!“ آپ صلی اللہ علیہ وسلم نے فرمایا: ”ان کی پاکیزہ نعمتیں انہیں دنیا ہی میں جلدی دے دی گئی ہیں اور آخرت ہمارے لیے ہے۔“ پھر میں نے عرض کیا: ”اللہ کے رسول! آپ کا کیا معاملہ ہے؟ میں لوگوں کو اس حال میں چھوڑ کر آیا ہوں کہ وہ ایک دوسرے میں گھسے جا رہے ہیں۔ کیا آپ کے پاس کوئی خبر آئی ہے جس کی وجہ سے آپ نے ازواج سے علیحدگی اختیار کی ہے؟“ آپ صلی اللہ علیہ وسلم نے فرمایا: ”نہیں، لیکن میرے اور میری بیویوں کے درمیان کچھ (ناگواری کی) بات ہو گئی ہے، تو میں نے قسم کھا لی کہ ایک مہینے تک ان کے پاس نہیں جاؤں گا۔“ پھر میں باہر نکل کر لوگوں کے پاس آیا اور کہا: ”لوگو! لوٹ جاؤ، رسول اللہ صلی اللہ علیہ وسلم اور آپ صلی اللہ علیہ وسلم کی ازواج کے درمیان کوئی بات ہو گئی ہے جس کی وجہ سے آپ صلی اللہ علیہ وسلم نے علیحدگی اختیار کرنا پسند فرمایا۔“ پھر میں سیدہ حفصہ رضی اللہ عنہا کے پاس گیا اور کہا: ”بیٹی! کیا تم رسول اللہ صلی اللہ علیہ وسلم سے بات بات پر تکرار کرتی ہو اور آپ صلی اللہ علیہ وسلم کو غصہ دلاتی ہو اور آپ صلی اللہ علیہ وسلم پر غیرت کرتی ہو؟“ انہوں نے کہا: ”اب میں آپ صلی اللہ علیہ وسلم سے کوئی ایسی بات نہیں کروں گی جو آپ صلی اللہ علیہ وسلم کو ناپسند ہو۔“ پھر میں سیدہ ام سلمہ رضی اللہ عنہا کے پاس گیا، وہ میری خالہ تھیں، اور ان سے بھی وہی بات کہی جو سیدہ حفصہ رضی اللہ عنہا سے کہی تھی۔ انہوں نے کہا: ”اے عمر بن خطاب! تم پر تعجب ہے، ہر معاملے میں تم بول پڑتے ہو، یہاں تک کہ اب چاہتے ہو کہ رسول اللہ صلی اللہ علیہ وسلم اور آپ صلی اللہ علیہ وسلم کی ازواج کے درمیان بھی دخل دو! اور ہمیں رسول اللہ صلی اللہ علیہ وسلم پر غیرت کرنے سے کون سی چیز روک سکتی ہے، جبکہ تمہاری بیویاں بھی تم پر غیرت کرتی ہیں؟“ پھر اللہ عزوجل نے یہ آیت نازل فرمائی: ﴿اے نبی! اپنی بیویوں سے کہہ دیجیے کہ اگر تم دنیا کی زندگی اور اس کی زینت چاہتی ہو تو آؤ، میں تمہیں کچھ سامان دے دوں اور اچھے طریقے سے تمہیں رخصت کر دوں﴾ یہاں تک کہ آیت مکمل فرمائی۔“
امام طبرانی رحمہ اللہ فرماتے ہیں: ”اس حدیث کو یزید بن رومان سے سعید بن ابی ہلال کے سوا کسی نے روایت نہیں کیا، اور سعید سے خالد بن یزید کے سوا کسی نے نہیں کیا۔ لیث اس میں منفرد ہیں۔“ [المعجم الأوسط/بَابُ الْمِيمِ/حدیث: 8764]

سیدنا انس بن مالک رضی اللہ عنہ بیان کرتے ہیں کہ سیدنا ابو طلحہ رضی اللہ عنہ سیدہ ام سلیم رضی اللہ عنہا کے پاس آئے، جو سیدنا انس رضی اللہ عنہ کی والدہ تھیں اور سیدنا ابو طلحہ رضی اللہ عنہ ان کے (انس کے) سوتیلے باپ تھے۔ انہوں نے پوچھا: ”اے ام سلیم! کیا تمہارے پاس کچھ (کھانے کو) ہے؟ میں رسول اللہ صلی اللہ علیہ وسلم کے پاس سے گزرا تو آپ صلی اللہ علیہ وسلم اصحابِ صفہ کو سورۃ النساء پڑھا رہے تھے اور بھوک کی وجہ سے آپ صلی اللہ علیہ وسلم نے اپنے پیٹ پر پتھر باندھ رکھا تھا۔“ سیدہ ام سلیم رضی اللہ عنہا نے کہا: ”میرے پاس کچھ جو تھے۔“ وہ کہتی ہیں: ”میں نے انہیں پیسا، پھر (ابو طلحہ نے) مجھے بازاروں کی طرف بھیجا (بازار سے مراد ان کے باغات کی چار دیواریاں تھیں)، میں ان کے پاس سے کچھ ایندھن لے آئی اور اس (ایندھن کی آگ) سے ایک روٹی تیار کی۔“ پھر ابو طلحہ رضی اللہ عنہ نے پوچھا: ”کیا تمہارے پاس کچھ سالن ہے؟“ تو انہوں نے کہا: ”میرے پاس گھی کا ایک مشکیزہ تھا، معلوم نہیں اس میں کچھ باقی ہے یا نہیں۔“ وہ اسے لائیں اور اسے نچوڑا، تو ابو طلحہ رضی اللہ عنہ نے کہا: ”دو آدمیوں کا نچوڑنا ایک کے نچوڑنے سے زیادہ کارگر ہوتا ہے۔“ چنانچہ دونوں نے مل کر نچوڑا تو کھجور کے برابر (گھی) نکلا۔ سیدنا انس رضی اللہ عنہ کہتے ہیں: پھر انہوں نے روٹی پر وہ گھی چپڑ دیا، پھر مجھے بلایا اور فرمایا: ”بیٹا! رسول اللہ صلی اللہ علیہ وسلم کو پہچانتے ہو؟“ میں نے کہا: ”جی ہاں۔“ انہوں نے کہا: ”میں آپ صلی اللہ علیہ وسلم کو اصحابِ صفہ کے ساتھ چھوڑ کر آیا ہوں، آپ انہیں پڑھا رہے ہیں۔ جاؤ، آپ صلی اللہ علیہ وسلم کو بلا لاؤ اور آپ صلی اللہ علیہ وسلم کے ساتھ کسی اور کو نہ بلانا، خیال رکھنا مجھے رسوا نہ کر دینا۔“ میں رسول اللہ صلی اللہ علیہ وسلم کے پاس آیا، جب آپ صلی اللہ علیہ وسلم نے مجھے دیکھا تو فرمایا: ”شاید تمہارے والد نے ہمیں بلا بھیجا ہے؟“ میں نے عرض کیا: ”جی ہاں۔“ تو آپ صلی اللہ علیہ وسلم نے لوگوں سے فرمایا: ”چلو۔“ چنانچہ اس دن وہ سب چل پڑے، وہ اسی آدمی تھے۔ آپ صلی اللہ علیہ وسلم نے میرا ہاتھ تھام لیا، جب میں گھر کے قریب پہنچا تو میں نے اپنا ہاتھ آپ صلی اللہ علیہ وسلم کے ہاتھ سے چھڑا لیا، پھر میں (دوڑ کر) ابو طلحہ رضی اللہ عنہ کے پاس آیا اور انہیں ساری بات بتا دی، وہ گھر میں مجھے ڈھونڈنے لگے اور مجھ پر پتھر پھینکتے اور کہتے: ”تم نے مجھے رسول اللہ صلی اللہ علیہ وسلم کے سامنے رسوا کر دیا!“ پھر وہ آپ صلی اللہ علیہ وسلم کی طرف نکلے اور آپ صلی اللہ علیہ وسلم کو صورتِ حال بتائی تو آپ صلی اللہ علیہ وسلم نے فرمایا: ”کوئی حرج نہیں۔“ پھر آپ صلی اللہ علیہ وسلم نے لوگوں کو حکم دیا تو وہ بیٹھ گئے، پھر آپ صلی اللہ علیہ وسلم اندر تشریف لائے اور ہم روٹی لے آئے۔ آپ صلی اللہ علیہ وسلم نے پوچھا: ”کیا کچھ سالن ہے؟“ سیدہ ام سلیم رضی اللہ عنہا نے عرض کیا: ”اے اللہ کے رسول! ہمارے پاس گھی کا ایک مشکیزہ تھا، میں نے اور ابو طلحہ نے اسے نچوڑ لیا ہے۔“ تو رسول اللہ صلی اللہ علیہ وسلم نے فرمایا: ”اسے لے آؤ، کیونکہ تین آدمیوں کا نچوڑنا دو کے نچوڑنے سے زیادہ کارگر ہوتا ہے۔“ چنانچہ وہ مشکیزہ رسول اللہ صلی اللہ علیہ وسلم کے پاس لایا گیا اور رسول اللہ صلی اللہ علیہ وسلم نے ان دونوں کے ساتھ مل کر اسے نچوڑا، تو اس میں سے کھجور کے برابر گھی نکلا، انہوں نے اس سے روٹی پر چپڑا، رسول اللہ صلی اللہ علیہ وسلم نے اسے اپنے دستِ مبارک سے پھیرا، پھر اس میں برکت کی دعا فرمائی، پھر فرمایا: ”میرے پاس دس دس آدمی بلاؤ۔“ میں نے دس آدمی بلائے، وہ بیٹھے اور اتنا کھایا کہ سیر ہو کر ڈکاریں لینے لگے۔ پھر دس دس کر کے آتے رہے یہاں تک کہ سب سیر ہو گئے۔ پھر رسول اللہ صلی اللہ علیہ وسلم بیٹھے اور ہم نے آپ صلی اللہ علیہ وسلم کے ساتھ کھایا، یہاں تک کہ کھانا بچ گیا۔
(امام طبرانی رحمہ اللہ فرماتے ہیں:) ”اس حدیث کو محمد بن کعب القرظی رحمہ اللہ سے سعید بن ابی ہلال رحمہ اللہ کے سوا کسی نے روایت نہیں کیا، اور سعید سے خالد بن یزید رحمہ اللہ کے سوا کسی نے روایت نہیں کیا، اور اس میں لیث رحمہ اللہ منفرد ہیں۔“ [المعجم الأوسط/بَابُ الْمِيمِ/حدیث: 8765]

سیدنا معاویہ بن ابی سفیان رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو فرماتے سنا: ”اللہ تعالیٰ جس کے ساتھ بھلائی کا ارادہ فرماتا ہے اسے دین کی سمجھ عطا فرما دیتا ہے۔ (مال کی) یہ تو بس تقسیمیں ہیں اور عطا کرنے والا اللہ ہی ہے۔ اور اس امت میں ایک گروہ ہمیشہ اللہ کے حکم پر قائم رہے گا، جو لوگ ان کی مخالفت کریں گے وہ انہیں نقصان نہیں پہنچا سکیں گے، یہاں تک کہ اللہ کا حکم (قیامت) آ جائے اور وہ لوگوں پر غالب ہوں گے۔“ [المعجم الأوسط/بَابُ الْمِيمِ/حدیث: 8766]

حمید بن عبدالرحمن رحمہ اللہ بیان کرتے ہیں: میں نے سیدنا معاویہ بن ابی سفیان رضی اللہ عنہما کو سنا، ان کے ہاتھ میں بالوں کا ایک گچھا تھا، وہ فرما رہے تھے: ”میں نے رسول اللہ صلی اللہ علیہ وسلم کو سنا کہ آپ صلی اللہ علیہ وسلم نے اس جیسی چیز سے منع فرمایا اور فرماتے تھے: ”بنی اسرائیل پر عذاب تو اس وقت آیا جب ان کی عورتوں نے اسے اختیار کر لیا۔““ [المعجم الأوسط/بَابُ الْمِيمِ/حدیث: 8767]

سیدنا ابو ہریرہ رضی اللہ عنہ سے روایت ہے کہ جس رات رسول اللہ صلی اللہ علیہ وسلم کو سیر کرائی گئی (معراج ہوئی)، آپ صلی اللہ علیہ وسلم کے پاس ایلیاء (بیت المقدس) میں دو پیالے لائے گئے: ایک شراب کا اور دوسرا دودھ کا۔ آپ صلی اللہ علیہ وسلم نے ان دونوں کو دیکھا، پھر دودھ لے لیا، تو جبریل علیہ السلام نے آپ صلی اللہ علیہ وسلم سے کہا: ”اللہ ہی کے لیے تمام تعریف ہے جس نے آپ کو فطرت (کی راہ) کی ہدایت دی، اگر آپ شراب لے لیتے تو آپ کی امت گمراہ ہو جاتی۔“
(امام طبرانی رحمہ اللہ فرماتے ہیں:) ”ان احادیث کو عبدالوہاب سے یزید بن الہاد رحمہ اللہ کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 8768]

سیدنا انس بن مالک رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو فرماتے سنا: ”دباء (کدو کے تونبے) اور مزفت (تارکول لگے برتن) میں نبیذ نہ بناؤ۔“ [المعجم الأوسط/بَابُ الْمِيمِ/حدیث: 8769]