سیدنا عبداللہ بن عمر رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: ”دنیا مومن کے لیے قید خانہ اور کافر کے لیے جنت ہے۔“
امام طبرانی رحمہ اللہ فرماتے ہیں: ”اس حدیث کو موسیٰ بن عقبہ سے صرف ابن ابی الزناد نے روایت کیا ہے، اور ابن ابی الزناد سے صرف عبدالرحمن بن مغیرہ نے، اس میں ابراہیم بن منذر منفرد ہیں۔“ [المعجم الأوسط/بَابُ الْمِيمِ/حدیث: 9136]

ام المومنین سیدہ عائشہ رضی اللہ عنہا سے (راوی کہتے ہیں: میں یہی جانتا ہوں کہ انہی سے روایت ہے) کہ نبی کریم صلی اللہ علیہ وسلم نے فرمایا: ”کوئی نبی ایسا نہیں گزرا جس کی امت میں ایک یا دو الہام یافتہ (محدَّث) افراد نہ ہوں، اور اگر میری امت میں ان میں سے کوئی ہے تو وہ عمر بن خطاب ہیں۔ بے شک حق عمر کی زبان اور دل پر ہے۔“
امام طبرانی رحمہ اللہ فرماتے ہیں: ”سیدہ عائشہ رضی اللہ عنہا سے یہ حدیث، یعنی «إِنَّ الْحَقَّ عَلَى لِسَانِ عُمَرَ وَقَلْبِهِ» (بے شک حق عمر کی زبان اور دل پر ہے)، صرف اسی سند سے مروی ہے، اس میں ابراہیم بن منذر منفرد ہیں۔“ [المعجم الأوسط/بَابُ الْمِيمِ/حدیث: 9137]

سیدنا عبداللہ بن عباس رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ”جب قیامت کا دن ہوگا تو پکارا جائے گا: ”ساٹھ سال والے کہاں ہیں؟“ اور یہ وہی عمر ہے جس کے بارے میں اللہ تعالیٰ نے فرمایا: ﴿أَوَلَمْ نُعَمِّرْكُمْ مَا يَتَذَكَّرُ فِيهِ مَنْ تَذَكَّرَ وَجَاءَكُمُ النَّذِيرُ﴾ ”کیا ہم نے تمہیں اتنی عمر نہیں دی تھی کہ جسے نصیحت حاصل کرنی ہوتی وہ اس میں نصیحت حاصل کر لیتا، اور تمہارے پاس ڈرانے والا بھی آیا تھا؟““
امام طبرانی رحمہ اللہ فرماتے ہیں: ”اس حدیث کو عطاء سے صرف ابن ابی حسین نے روایت کیا ہے، اور ابن ابی حسین سے صرف ابراہیم بن فضل نے، اس میں ابن ابی فدیک منفرد ہیں، اور سیدنا ابن عباس رضی اللہ عنہما سے یہ صرف اسی سند سے مروی ہے۔“
دار الحرمین کے نسخے میں اسی طرح ہے، اور غالباً صحیح لفظ ”عبدالرحمن“ ہے، واللہ اعلم۔ [المعجم الأوسط/بَابُ الْمِيمِ/حدیث: 9138]

محمد بن سعد رحمہ اللہ بیان کرتے ہیں کہ سیدنا سعد بن ابی وقاص رضی اللہ عنہ نے فرمایا: ”میں غزوہ بدر میں شریک ہوا تو میرے چہرے پر (داڑھی کا) ایک بال کے سوا کچھ نہ تھا، پھر اس کے بعد اللہ تعالیٰ نے داڑھیوں کو خوب بڑھا دیا۔“
امام طبرانی رحمہ اللہ فرماتے ہیں: ”اس حدیث کو اسحاق بن جعفر سے صرف ابراہیم بن منذر نے روایت کیا ہے۔“ [المعجم الأوسط/بَابُ الْمِيمِ/حدیث: 9139]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”مشرق اور مغرب کے درمیان (کا پورا رخ) قبلہ ہے۔“
امام طبرانی رحمہ اللہ فرماتے ہیں: ”اسحاق بن جعفر سے یہ حدیث ابراہیم بن منذر کے سوا کسی نے روایت نہیں کی۔“ [المعجم الأوسط/بَابُ الْمِيمِ/حدیث: 9140]

سیدنا ابو رافع رضی اللہ عنہ سے روایت ہے کہ وہ رسول اللہ صلی اللہ علیہ وسلم کے پاس بکری کے شانے کا گوشت لائے، تو آپ صلی اللہ علیہ وسلم نے اسے تناول فرمایا اور وضو نہیں کیا۔
امام طبرانی رحمہ اللہ فرماتے ہیں: ”زید بن اسلم سے یہ حدیث ہشام بن سعد کے سوا کسی نے روایت نہیں کی، اور معن بن عیسیٰ اس کی روایت میں منفرد ہیں۔“ [المعجم الأوسط/بَابُ الْمِيمِ/حدیث: 9141]

سیدنا جابر بن اسامہ جہنی رضی اللہ عنہ بیان کرتے ہیں: ”میں بازار میں رسول اللہ صلی اللہ علیہ وسلم سے آپ صلی اللہ علیہ وسلم کے صحابہ کی معیت میں ملا تو میں نے پوچھا: رسول اللہ صلی اللہ علیہ وسلم کہاں کا ارادہ رکھتے ہیں؟ انہوں نے بتایا: آپ صلی اللہ علیہ وسلم تمہاری قوم کے لیے مسجد کی حد بندی کرنا چاہتے ہیں۔“ وہ کہتے ہیں: ”پھر میں (ان کے ہاں) پہنچا تو آپ صلی اللہ علیہ وسلم ان کے لیے مسجد کی حد بندی فرما چکے تھے اور اس کے قبلے کی جانب ایک لکڑی گاڑ کر اسے قبلہ مقرر فرما دیا تھا۔“
امام طبرانی رحمہ اللہ فرماتے ہیں: ”یہ حدیث جابر بن اسامہ سے اسی سند کے ساتھ ہی مروی ہے، اور ابراہیم بن منذر اس میں منفرد ہیں۔“ [المعجم الأوسط/بَابُ الْمِيمِ/حدیث: 9142]

سیدنا جابر بن عبداللہ رضی اللہ عنہما سے روایت ہے کہ ان کے والد فوت ہوئے تو انہوں نے ایک یہودی کا تیس وسق (کھجوروں) کا قرض چھوڑا۔ سیدنا جابر رضی اللہ عنہما نے اس سے مہلت مانگی تو اس نے مہلت دینے سے انکار کر دیا۔ سیدنا جابر رضی اللہ عنہما نے رسول اللہ صلی اللہ علیہ وسلم سے بات کی کہ آپ صلی اللہ علیہ وسلم اس کے پاس سفارش فرمائیں۔ چنانچہ رسول اللہ صلی اللہ علیہ وسلم اس کے پاس تشریف لائے اور یہودی سے بات کی کہ وہ (باغ کی) ساری کھجور لے لے، مگر اس نے انکار کر دیا۔ پھر آپ صلی اللہ علیہ وسلم نے اس سے مہلت دینے کے بارے میں بات کی تو اس نے پھر انکار کیا۔ پھر رسول اللہ صلی اللہ علیہ وسلم (باغ میں) داخل ہوئے اور اسے پورے تیس وسق ادا کر دیے، اور دس وسق بچ بھی گئے۔ پھر سیدنا جابر رضی اللہ عنہما رسول اللہ صلی اللہ علیہ وسلم کے پاس آئے تاکہ بچ جانے والی کھجوروں کی خبر دیں، تو انہوں نے رسول اللہ صلی اللہ علیہ وسلم کو نمازِ عصر پڑھتے پایا۔ جب آپ صلی اللہ علیہ وسلم نماز سے فارغ ہوئے تو وہ آپ صلی اللہ علیہ وسلم کے پاس آئے اور بتایا کہ یہودی کو پورا قرض ادا ہو چکا ہے اور جو کھجوریں بچ گئی ہیں ان کی بھی خبر دی۔ تو رسول اللہ صلی اللہ علیہ وسلم نے فرمایا: ”یہ بات عمر بن خطاب کو بھی بتا دو۔“ چنانچہ سیدنا جابر رضی اللہ عنہما سیدنا عمر رضی اللہ عنہ کے پاس گئے اور انہیں بتایا۔ تو انہوں نے فرمایا: ”جب رسول اللہ صلی اللہ علیہ وسلم اس (باغ) میں چلے تھے، اسی وقت میں جان گیا تھا کہ اللہ تعالیٰ اس میں ضرور برکت عطا فرمائے گا۔“
امام طبرانی رحمہ اللہ فرماتے ہیں: ”وہب بن کیسان سے یہ حدیث ہشام بن عروہ کے سوا کسی نے روایت نہیں کی، اور ہشام سے عبداللہ بن محمد بن یحییٰ کے سوا کسی نے روایت نہیں کی، اور ابراہیم بن منذر اس میں منفرد ہیں۔“ [المعجم الأوسط/بَابُ الْمِيمِ/حدیث: 9143]

سیدنا کعب بن مالک رضی اللہ عنہ بیان کرتے ہیں: ”رسول اللہ صلی اللہ علیہ وسلم نے مدینہ کے درختوں کو (کاٹنا) حرام قرار دیا، ایک برید ضرب ایک برید کے علاقے میں، اور مجھے بھیجا تو میں نے حرم کی حدوں پر نشانات لگا دیے: ذات الجیش کی بلندی پر، شریث پر، مخیض پر اور نبت پر۔“
امام طبرانی رحمہ اللہ فرماتے ہیں: ”یہ حدیث کعب رضی اللہ عنہ سے اسی سند کے ساتھ ہی مروی ہے، اور ابراہیم بن منذر اس میں منفرد ہیں۔“ [المعجم الأوسط/بَابُ الْمِيمِ/حدیث: 9144]

سیدنا عبداللہ بن عمر رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: ”کسی مومن کے لیے جائز نہیں کہ وہ اپنے بھائی سے تین دن سے زیادہ قطع تعلق رکھے۔“
امام طبرانی رحمہ اللہ فرماتے ہیں: ”اس حدیث کو نافع رحمہ اللہ سے ابراہیم بن ابی اسید کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 9145]