سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”بضع (کا لفظ) سات سے دس کے درمیان (کی تعداد کے لیے بولا جاتا) ہے۔“
امام طبرانی رحمہ اللہ فرماتے ہیں: ”اس حدیث کو امام زہری رحمہ اللہ سے عبداللہ بن عبدالعزیز کے سوا کسی نے روایت نہیں کیا، اور عبداللہ بن عبدالعزیز سے معن اور محمد بن خالد بن عثمہ کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 9146]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میں عربی ہوں، قرآن عربی ہے، اور اہلِ جنت کی زبان عربی ہے۔“
امام طبرانی رحمہ اللہ فرماتے ہیں: ”اس حدیث کو شبل سے عبدالعزیز بن عمران کے سوا کسی نے روایت نہیں کیا، اس میں ابراہیم بن منذر منفرد ہیں، اور سیدنا ابوہریرہ رضی اللہ عنہ سے یہ حدیث صرف اسی سند سے مروی ہے۔“ [المعجم الأوسط/بَابُ الْمِيمِ/حدیث: 9147]

سیدنا جابر رضی اللہ عنہما نے نبی کریم صلی اللہ علیہ وسلم سے مرفوعاً روایت کیا کہ آپ صلی اللہ علیہ وسلم نے فرمایا: ”لکڑبگھا شکار (کے جانوروں میں سے) ہے، اور محرم کو اسے مارنے سے منع کیا گیا ہے۔“
امام طبرانی رحمہ اللہ فرماتے ہیں: ”اس حدیث کو ایوب رحمہ اللہ سے عدی بن فضل کے سوا کسی نے روایت نہیں کیا، اور عدی سے معن کے سوا کسی نے روایت نہیں کیا، اس میں ابراہیم بن منذر منفرد ہیں۔“ [المعجم الأوسط/بَابُ الْمِيمِ/حدیث: 9148]

سیدنا سہل بن ابی حثمہ رضی اللہ عنہ سے روایت ہے کہ سیدنا ابوبردہ بن نیار رضی اللہ عنہ نے صبح سویرے (نماز عید سے پہلے) جانور ذبح کر لیا، پھر جب وہ (نماز سے) واپس ہوئے تو اس کا ذکر رسول اللہ صلی اللہ علیہ وسلم سے کیا، تو آپ صلی اللہ علیہ وسلم نے فرمایا: ”جس نے نماز سے پہلے ذبح کیا تو وہ قربانی نہیں ہے، قربانی تو وہ ہے جو نماز کے بعد ذبح کی جائے، لہٰذا جاؤ اور (دوبارہ) قربانی کرو۔“ انہوں نے عرض کیا: ”اے اللہ کے رسول! میرے پاس قربانی کے لیے (کوئی جانور) نہیں ہے، میرے پاس تو صرف بکری کا ایک جذعہ (چھ ماہ کا بچہ) ہے۔“ آپ صلی اللہ علیہ وسلم نے فرمایا: ”جاؤ اسی کی قربانی کر لو، اور تمہارے بعد کسی کے لیے اس میں رخصت نہیں ہے۔“
امام طبرانی رحمہ اللہ فرماتے ہیں: ”یہ حدیث سیدنا سہل بن ابی حثمہ رضی اللہ عنہ سے صرف اسی سند سے مروی ہے، اس میں ابراہیم بن منذر منفرد ہیں۔“ [المعجم الأوسط/بَابُ الْمِيمِ/حدیث: 9149]

سیدنا سہل بن ابی حثمہ رضی اللہ عنہ سے روایت ہے کہ رسول اللہ صلی اللہ علیہ وسلم نے ان کے والد سیدنا ابو حثمہ رضی اللہ عنہ کو (پھلوں کا) تخمینہ لگانے والا (خارص) بنا کر بھیجا تو ایک آدمی آپ صلی اللہ علیہ وسلم کے پاس آیا اور کہنے لگا: ”اے اللہ کے رسول! ابو حثمہ نے مجھ پر (تخمینے میں) زیادتی کر دی ہے۔“ چنانچہ آپ صلی اللہ علیہ وسلم نے ابو حثمہ رضی اللہ عنہ کو بلایا اور فرمایا: ”تمہارا چچا زاد بھائی سمجھتا ہے کہ تم نے اس پر زیادہ لگا دیا ہے۔“ انہوں نے عرض کیا: ”اے اللہ کے رسول! میں نے اس کے گھر والوں کے (کھانے کے) عریہ کھجوروں کا حصہ چھوڑ دیا ہے، اور جو وہ مسکینوں کو کھلاتا ہے اور جو (پھل) ہوا سے گر جاتا ہے، (وہ بھی چھوڑ دیا ہے)۔“ تو آپ صلی اللہ علیہ وسلم نے فرمایا: ”تمہارے چچا زاد نے تمہیں زیادہ دے دیا اور انصاف کیا۔“
امام طبرانی رحمہ اللہ فرماتے ہیں: ”یہ حدیث سیدنا سہل بن ابی حثمہ رضی اللہ عنہ سے صرف اسی سند کے ساتھ مروی ہے، اس میں ابراہیم بن منذر رحمہ اللہ منفرد ہیں۔“ [المعجم الأوسط/بَابُ الْمِيمِ/حدیث: 9150]

سیدنا سہل بن ابی حثمہ رضی اللہ عنہ بیان کرتے ہیں کہ رسول اللہ صلی اللہ علیہ وسلم (سفر پر) نکلے اور آپ صلی اللہ علیہ وسلم کے ساتھ سیدنا عبدالرحمن بن سہل رضی اللہ عنہ بھی نکلے۔ جب مقامِ حرہ پر پہنچے تو عبدالرحمن بن سہل رضی اللہ عنہ کو ایک سانپ نے ڈس لیا۔ رسول اللہ صلی اللہ علیہ وسلم نے فرمایا: ”عمرو بن حزم کو میرے پاس بلاؤ۔“ چنانچہ انہیں بلایا گیا تو انہوں نے اپنا دَم نبی کریم صلی اللہ علیہ وسلم کے سامنے پیش کیا۔ آپ صلی اللہ علیہ وسلم نے فرمایا: ”اس میں کوئی حرج نہیں، اس پر دم کرو۔“ راوی کہتے ہیں: ابن حزم رضی اللہ عنہ نے اپنا ہاتھ ان پر رکھا اور عرض کیا: ”اے اللہ کے رسول! یہ تو مرنے والا ہے“ یا کہا: ”مر چکا ہے۔“ تو رسول اللہ صلی اللہ علیہ وسلم نے فرمایا: ”اس پر دم کرو، اگرچہ یہ مر رہا ہو“ یا فرمایا: ”مر چکا ہو۔“ چنانچہ انہوں نے دم کیا تو عبدالرحمن رضی اللہ عنہ تندرست ہو گئے اور چل پڑے۔
امام طبرانی رحمہ اللہ فرماتے ہیں: ”یہ حدیث سیدنا سہل رضی اللہ عنہ سے صرف اسی سند کے ساتھ مروی ہے، اس میں ابراہیم بن منذر رحمہ اللہ منفرد ہیں۔“ [المعجم الأوسط/بَابُ الْمِيمِ/حدیث: 9151]