(نبی کریم صلی اللہ علیہ وسلم نے فرمایا:)
”بیشک قیامت کے دن میری امت کے لوگوں کو اس حال میں بلایا جائے گا کہ وضو کے نشانات کی وجہ سے ان کے چہرے اور ہاتھ پاؤں چمک رہے ہوں گے۔“ [صحيح الجامع الصغير وزيادته/[حرف الألف] -- إن ا/حدیث: 2005]

(نبی کریم صلی اللہ علیہ وسلم نے فرمایا:)
”بیشک «أُمَّ مِلْدَمٍ» (بخار) ابنِ آدم کے گناہوں کی میل کچیل کو اس طرح نکال دیتا ہے جیسے بھٹی لوہے کا زنگ دور کر دیتی ہے۔“ [صحيح الجامع الصغير وزيادته/[حرف الألف] -- إن ا/حدیث: 2006]

(نبی کریم صلی اللہ علیہ وسلم نے فرمایا:)
”بیشک تمام لوگوں میں سے اپنے مال اور صحبت کے لحاظ سے مجھ پر سب سے زیادہ احسان ابوبکر کا ہے، اور اگر میں (اللہ کے سوا) کسی کو خلیل (گہرا دوست) بناتا تو ابوبکر کو خلیل بناتا، لیکن اسلام کی اخوت (کا رشتہ ہی کافی) ہے، مسجد میں کھلنے والی تمام کھڑکیاں بند کر دی جائیں سوائے ابوبکر کی کھڑکی کے۔“ [صحيح الجامع الصغير وزيادته/[حرف الألف] -- إن ا/حدیث: 2007]

(نبی کریم صلی اللہ علیہ وسلم نے فرمایا:)
”بیشک میری امت میں سے کچھ لوگ میرے بعد آئیں گے، ان میں سے ہر ایک کی یہ تمنا ہوگی کہ کاش وہ اپنے اہل و عیال اور مال و دولت کی قربانی دے کر میری زیارت کر لے۔“ [صحيح الجامع الصغير وزيادته/[حرف الألف] -- إن ا/حدیث: 2008]

(نبی کریم صلی اللہ علیہ وسلم نے فرمایا:)
”بیشک اسلام کا سب سے مضبوط کڑا یہ ہے کہ تم اللہ ہی کے لیے محبت کرو اور اللہ ہی کے لیے بغض رکھو۔“ [صحيح الجامع الصغير وزيادته/[حرف الألف] -- إن ا/حدیث: 2009]

(نبی کریم صلی اللہ علیہ وسلم نے فرمایا:)
”بیشک یہ وہ لوگ ہیں کہ جب ان میں کوئی نیک آدمی ہوتا اور وہ فوت ہو جاتا تو وہ اس کی قبر پر مسجد (عبادت گاہ) بنا لیتے اور اس میں اس کی تصویریں بناتے، یہ لوگ قیامت کے دن اللہ تعالیٰ کے نزدیک بدترین مخلوق ہیں۔“ [صحيح الجامع الصغير وزيادته/[حرف الألف] -- إن ا/حدیث: 2010]

(نبی کریم صلی اللہ علیہ وسلم نے فرمایا:)
”بیشک لوگوں میں اللہ تعالیٰ کے سب سے زیادہ قریب وہ شخص ہے جو انہیں سلام کرنے میں پہل کرتا ہے۔“ [صحيح الجامع الصغير وزيادته/[حرف الألف] -- إن ا/حدیث: 2011]

(نبی کریم صلی اللہ علیہ وسلم نے فرمایا:)
”بیشک لوگوں میں میرے سب سے زیادہ قریب متقی پرہیزگار لوگ ہیں، وہ جو کوئی بھی ہوں اور جہاں کہیں بھی ہوں۔“ [صحيح الجامع الصغير وزيادته/[حرف الألف] -- إن ا/حدیث: 2012]

(نبی کریم صلی اللہ علیہ وسلم نے فرمایا:)
”بیشک (قیامت کی بڑی) نشانیوں میں سے سب سے پہلے سورج کا مغرب سے طلوع ہونا اور چاشت کے وقت لوگوں پر دابۃ الارض (ایک عجیب الخلقت جانور) کا نکلنا ظاہر ہوگا۔ پس ان دونوں میں سے جو نشانی بھی پہلے ظاہر ہو گئی، تو دوسری اس کے فوراً بعد ظاہر ہو جائے گی۔“ [صحيح الجامع الصغير وزيادته/[حرف الألف] -- إن ا/حدیث: 2013]

(نبی کریم صلی اللہ علیہ وسلم نے فرمایا:)
”بیشک قیامت کے دن لوگوں میں سب سے پہلے جس شخص کا فیصلہ کیا جائے گا وہ ایک ایسا آدمی ہوگا جو شہید کر دیا گیا تھا۔ اسے لایا جائے گا اور اللہ تعالیٰ اسے اپنی نعمتیں یاد دلائے گا تو وہ انہیں پہچان لے گا۔ اللہ فرمائے گا: تو نے ان نعمتوں (کے شکرانے) میں کیا عمل کیا؟ وہ کہے گا: میں نے تیری راہ میں جنگ کی یہاں تک کہ شہید ہو گیا۔ اللہ فرمائے گا: تو جھوٹ کہتا ہے، بلکہ تو نے اس لیے جنگ کی تھی تاکہ تجھے بہادر کہا جائے، سو وہ کہہ دیا گیا۔ پھر اس کے متعلق حکم دیا جائے گا تو اسے منہ کے بل گھسیٹا جائے گا یہاں تک کہ اسے جہنم میں ڈال دیا جائے گا۔ اور دوسرا وہ شخص ہوگا جس نے علم سیکھا، اسے دوسروں کو سکھایا اور قرآن پڑھا۔ اسے لایا جائے گا، اللہ اسے اپنی نعمتیں یاد دلائے گا تو وہ انہیں پہچان لے گا۔ اللہ فرمائے گا: تو نے ان میں کیا عمل کیا؟ وہ کہے گا: میں نے علم سیکھا، اسے سکھایا اور تیری رضا کے لیے قرآن پڑھا۔ اللہ فرمائے گا: تو نے جھوٹ بولا، بلکہ تو نے علم اس لیے سیکھا تاکہ تجھے عالم کہا جائے، اور تو نے قرآن اس لیے پڑھا تاکہ تجھے قاری کہا جائے، سو وہ کہہ دیا گیا۔ پھر اس کے بارے میں حکم دیا جائے گا، تو اسے منہ کے بل گھسیٹا جائے گا یہاں تک کہ اسے جہنم میں ڈال دیا جائے گا۔ اور تیسرا وہ شخص ہوگا جسے اللہ نے وسعت دی اور ہر قسم کا مال عطا کیا۔ اسے لایا جائے گا، اللہ اسے اپنی نعمتیں یاد دلائے گا تو وہ انہیں پہچان لے گا۔ اللہ فرمائے گا: تو نے ان میں کیا عمل کیا؟ وہ کہے گا: میں نے کوئی ایسا راستہ نہیں چھوڑا جس میں خرچ کرنا تجھے پسند ہو اور میں نے اس میں تیرے لیے خرچ نہ کیا ہو۔ اللہ فرمائے گا: تو جھوٹا ہے، بلکہ تو نے اس لیے خرچ کیا تاکہ تجھے سخی کہا جائے، سو وہ کہا جا چکا۔ پھر اس کے متعلق حکم دیا جائے گا تو اسے منہ کے بل گھسیٹ کر جہنم میں پھینک دیا جائے گا۔“ [صحيح الجامع الصغير وزيادته/[حرف الألف] -- إن ا/حدیث: 2014]