(نبی کریم صلی اللہ علیہ وسلم نے فرمایا:)
”بڑی جنگ (ملحمہ کبریٰ) کے دن مسلمانوں کا خیمہ (مرکز) غوطہ میں ہوگا، جو دمشق کہلانے والے شہر کے پہلو میں ہے، اور یہ شام کے بہترین شہروں میں سے ایک ہے۔“ [صحيح الجامع الصغير وزيادته/[حرف الألف] -- إن ب/حدیث: 2116]

(نبی کریم صلی اللہ علیہ وسلم نے فرمایا:)
”عورتوں پر عائشہ کی فضیلت بالکل ویسی ہی ہے جیسے تمام کھانوں پر ثرید کو فضیلت حاصل ہے۔“ [صحيح الجامع الصغير وزيادته/[حرف الألف] -- إن ب/حدیث: 2117]

(نبی کریم صلی اللہ علیہ وسلم نے فرمایا:)
”مہاجرین کے فقراء قیامت کے دن مالداروں سے چالیس سال پہلے جنت میں داخل ہوں گے۔“ [صحيح الجامع الصغير وزيادته/[حرف الألف] -- إن ب/حدیث: 2118]

(نبی کریم صلی اللہ علیہ وسلم نے فرمایا:)
”فلاں شخص نے مجھے ایک اونٹنی ہدیہ کی تو میں نے اس کے بدلے اسے چھ جوان اونٹنیاں دیں، مگر وہ پھر بھی ناراض رہا۔ میں نے ارادہ کر لیا ہے کہ اب قریشی، انصاری، ثقفی یا دوسی کے علاوہ کسی کا ہدیہ قبول نہیں کروں گا۔“ [صحيح الجامع الصغير وزيادته/[حرف الألف] -- إن ب/حدیث: 2119]

(نبی کریم صلی اللہ علیہ وسلم نے فرمایا:)
”جمعہ کے دن ایک ایسی گھڑی ہوتی ہے کہ اگر کوئی مسلمان بندہ اسے اس حال میں پا لے کہ وہ کھڑا نماز پڑھ رہا ہو اور اللہ سے کسی بھلائی کا سوال کرے، تو اللہ تعالیٰ اسے وہ چیز ضرور عطا فرما دیتا ہے۔“ [صحيح الجامع الصغير وزيادته/[حرف الألف] -- إن ب/حدیث: 2120]

(نبی کریم صلی اللہ علیہ وسلم نے فرمایا:)
”جنت میں ایک دروازہ ہے جسے «الرَّيَّانُ» کہا جاتا ہے۔ قیامت کے دن اس دروازے سے صرف روزے دار داخل ہوں گے، ان کے علاوہ کوئی اور داخل نہیں ہوگا۔ پکارا جائے گا: روزے دار کہاں ہیں؟ تو وہ کھڑے ہوں گے اور اس میں سے داخل ہو جائیں گے۔ جب وہ داخل ہو جائیں گے تو دروازہ بند کر دیا جائے گا، پھر اس سے کوئی داخل نہیں ہوگا۔“ [صحيح الجامع الصغير وزيادته/[حرف الألف] -- إن ب/حدیث: 2121]

(نبی کریم صلی اللہ علیہ وسلم نے فرمایا:)
”جنت میں پانی کا سمندر، شہد کا سمندر، دودھ کا سمندر اور شراب کا سمندر ہے، پھر ان کے بعد (انہی سمندروں سے) نہریں پھوٹ کر نکلتی ہیں۔“ [صحيح الجامع الصغير وزيادته/[حرف الألف] -- إن ب/حدیث: 2122]

(نبی کریم صلی اللہ علیہ وسلم نے فرمایا:)
”جنت میں ایسے بالا خانے ہیں جن کا باہر اندر سے اور اندر باہر سے نظر آتا ہے۔ اللہ تعالیٰ نے انہیں اس شخص کے لیے تیار کیا ہے جو کھانا کھلائے، نرم گفتگو کرے، پابندی سے روزے رکھے، اور رات کو جب لوگ سو رہے ہوں تو نماز پڑھے۔“ [صحيح الجامع الصغير وزيادته/[حرف الألف] -- إن ب/حدیث: 2123]

(نبی کریم صلی اللہ علیہ وسلم نے فرمایا:)
”جنت میں ایک بازار ہے جہاں جنتی ہر جمعہ کے دن آیا کریں گے۔ اس میں کستوری کے ٹیلے ہوں گے۔ پھر شمالی ہوا چلے گی جو ان کے چہروں اور کپڑوں پر کستوری بکھیر دے گی، جس سے ان کے حسن و جمال میں مزید اضافہ ہو جائے گا۔ پھر وہ اپنے گھر والوں کے پاس لوٹیں گے تو ان کے حسن و جمال میں بھی اضافہ ہو چکا ہوگا۔ ان کے گھر والے ان سے کہیں گے: اللہ کی قسم! ہمارے بعد تمہارے حسن و جمال میں اضافہ ہو گیا ہے۔ اور وہ بھی کہیں گے: اللہ کی قسم! ہمارے بعد تمہارے حسن و جمال میں بھی اضافہ ہو گیا ہے۔“ [صحيح الجامع الصغير وزيادته/[حرف الألف] -- إن ب/حدیث: 2124]

(نبی کریم صلی اللہ علیہ وسلم نے فرمایا:)
”جنت میں ایک ایسا درخت ہے جس کے سائے میں اگر ایک تیز رفتار، سدھائے ہوئے گھوڑے کا سوار سو سال تک بھی چلتا رہے تو اسے پار نہیں کر سکے گا۔“ [صحيح الجامع الصغير وزيادته/[حرف الألف] -- إن ب/حدیث: 2125]