(نبی کریم صلی اللہ علیہ وسلم نے فرمایا:)
”بے شک مجھے اس قدر سخت بخار ہوتا ہے جتنا تم میں سے دو آدمیوں کو (اکٹھا) ہوتا ہے۔“ [صحيح الجامع الصغير وزيادته/[حرف الألف] -- إن ك/حدیث: 2455]

(نبی کریم صلی اللہ علیہ وسلم نے فرمایا:)
”بے شک میں تمہارا پیش رو (حوضِ کوثر پر تمہارا استقبال کرنے والا) ہوں اور میں تم پر گواہ ہوں۔ یقیناً تمہارے مجھ سے ملنے کی جگہ حوض ہے، اور اللہ کی قسم! میں اس وقت یہیں سے اپنے حوض کو دیکھ رہا ہوں۔ اور بے شک مجھے زمین کے خزانوں کی کنجیاں عطا کر دی گئی ہیں۔ اور اللہ کی قسم! مجھے تمہارے متعلق اس بات کا کوئی ڈر نہیں ہے کہ تم میرے بعد شرک کرنے لگو گے، البتہ مجھے تمہارے متعلق دنیا کا خوف ضرور ہے کہ تم اس (کی محبت اور لالچ) میں پڑ کر ایک دوسرے سے مقابلہ اور رشک کرنے لگو گے۔“ [صحيح الجامع الصغير وزيادته/[حرف الألف] -- إن ك/حدیث: 2456]

(نبی کریم صلی اللہ علیہ وسلم نے فرمایا:)
”بے شک میں تمہارے درمیان دو جانشین (بھاری چیزیں) چھوڑ کر جا رہا ہوں: ایک اللہ کی کتاب جو آسمان اور زمین کے درمیان پھیلی ہوئی (یا تنی ہوئی) رسی ہے، اور دوسری میری عترت یعنی میرے اہلِ بیت۔ اور یقیناً یہ دونوں ہرگز ایک دوسرے سے جدا نہیں ہوں گے یہاں تک کہ یہ حوضِ کوثر پر میرے پاس آ جائیں گے۔“ [صحيح الجامع الصغير وزيادته/[حرف الألف] -- إن ك/حدیث: 2457]

(نبی کریم صلی اللہ علیہ وسلم نے فرمایا:)
”بے شک میں تمہارے درمیان ایسی چیز چھوڑ کر جا رہا ہوں کہ اگر تم اسے مضبوطی سے تھامے رکھو گے تو میرے بعد ہرگز گمراہ نہیں ہو گے، ان میں سے ایک چیز دوسری سے بڑی اور عظمت والی ہے: ایک اللہ کی کتاب جو آسمان سے زمین تک تنی ہوئی رسی ہے، اور دوسری میری عترت یعنی میرے اہلِ بیت۔ اور یہ دونوں ہرگز ایک دوسرے سے جدا نہیں ہوں گے یہاں تک کہ حوضِ کوثر پر میرے پاس آ جائیں گے۔ پس تم غور کرنا کہ میرے بعد تم ان دونوں کے حقوق ادا کرنے میں میری کیسی جانشینی کرتے ہو۔“ [صحيح الجامع الصغير وزيادته/[حرف الألف] -- إن ك/حدیث: 2458]

(نبی کریم صلی اللہ علیہ وسلم نے فرمایا:)
”یقیناً میں نے تمہیں دجال کے بارے میں اس قدر (تفصیل سے) بتایا ہے کہ مجھے ڈر محسوس ہونے لگا تھا کہ کہیں تم (ان باتوں کو خلط ملط کر کے) سمجھ نہ پاؤ۔ بے شک مسیح دجال ایک پستہ قد، ٹیڑھی ٹانگوں والا، سخت گھنگھریالے بالوں والا اور کانا آدمی ہے جس کی ایک آنکھ بالکل مٹی ہوئی (سپاٹ) ہے، جو نہ تو باہر کی طرف ابھری ہوئی ہے اور نہ ہی اندر کی طرف دھنسی ہوئی ہے۔ پس اگر تم پر (اس کا دعویِٰ خدائی سن کر) معاملہ مشتبہ ہونے لگے تو یہ جان لینا کہ تمہارا رب کانا نہیں ہے، اور تم اپنے رب کا ہرگز دیدار نہیں کر سکو گے یہاں تک کہ تم وفات پا جاؤ۔“ [صحيح الجامع الصغير وزيادته/[حرف الألف] -- إن ك/حدیث: 2459]

(نبی کریم صلی اللہ علیہ وسلم نے فرمایا:)
”بے شک میں نے مدینہ کے دونوں سنگلاخ میدانوں کے درمیانی حصے کو اسی طرح حرم (قابلِ احترام) قرار دیا ہے جس طرح ابراہیم (علیہ السلام) نے مکہ کو حرم قرار دیا تھا۔“ [صحيح الجامع الصغير وزيادته/[حرف الألف] -- إن ك/حدیث: 2460]

(نبی کریم صلی اللہ علیہ وسلم نے فرمایا:)
”میں اس لیے نکلا تھا تاکہ تمہیں شبِ قدر کے بارے میں بتاؤں، لیکن فلان اور فلان (دو اشخاص) آپس میں لڑ پڑے، تو وہ (اس کی تعیین کا علم اٹھا لیا گیا)، اور شاید یہی تمہارے حق میں زیادہ بہتر ہو، لہٰذا تم اسے (آخری عشرے کی) ساتویں، نویں اور پانچویں (طاق راتوں) میں تلاش کرو۔“ [صحيح الجامع الصغير وزيادته/[حرف الألف] -- إن ك/حدیث: 2461]

(نبی کریم صلی اللہ علیہ وسلم نے فرمایا:)
”میں تمہارے سامنے ایک بات کا ذکر کر رہا ہوں، اور تم پر کوئی حرج نہیں کہ تم جلدی نہ کرو یہاں تک کہ اپنے والدین سے مشورہ کر لو، کیونکہ اللہ تعالیٰ نے فرمایا ہے: ﴿يَا أَيُّهَا النَّبِيُّ قُلْ لِأَزْوَاجِكَ ... عَظِيمًا﴾ [سورة الأحزاب: 28-29] (اے نبی! اپنی بیویوں سے کہہ دو... اور اگر تم اللہ اور اس کے رسول اور آخرت کا گھر چاہتی ہو تو بے شک اللہ نے تم میں سے نیکی کرنے والیوں کے لیے بہت بڑا اجر تیار کر رکھا ہے)۔“ [صحيح الجامع الصغير وزيادته/[حرف الألف] -- إن ك/حدیث: 2462]

(نبی کریم صلی اللہ علیہ وسلم نے فرمایا:)
”مجھے عصر کے وقت سونے کے کچھ ٹکڑے (یا ذرات) یاد آ گئے جو ہمارے پاس تھے، تو مجھے یہ بات ناپسند آئی کہ وہ رات گزاریں (یعنی صبح تک باقی رہیں)، لہٰذا میں نے انہیں تقسیم کرنے کا حکم دے دیا۔“ [صحيح الجامع الصغير وزيادته/[حرف الألف] -- إن ك/حدیث: 2463]

(نبی کریم صلی اللہ علیہ وسلم نے فرمایا:)
”میں کل یہود کی طرف سوار ہو کر جا رہا ہوں، پس تم میں سے جو شخص میرے ساتھ چلے وہ انہیں پہلے سلام نہ کرے، اور اگر وہ تمہیں سلام کہیں تو تم (جواب میں) کہو: «وَعَلَيْكُمْ» (اور تم پر بھی سلام ہو)۔“ [صحيح الجامع الصغير وزيادته/[حرف الألف] -- إن ك/حدیث: 2464]