(نبی کریم صلی اللہ علیہ وسلم نے فرمایا:)
”بے شک میں نے تمہیں زیارتِ قبور سے منع کیا تھا، اب تم ان کی زیارت کیا کرو کیونکہ اس کی زیارت تمہیں بھلائی کی یاد دلاتی ہے۔ اور میں نے تمہیں تین دن کے بعد قربانی کا گوشت رکھنے سے منع کیا تھا، اب تم خود بھی کھاؤ اور جتنا چاہو روکے رکھو۔ اور میں نے تمہیں برتنوں میں پینے کی چیزیں رکھنے سے منع کیا تھا، اب تم جس برتن میں چاہو پیو لیکن کوئی نشہ آور چیز نہ پیو۔“ [صحيح الجامع الصغير وزيادته/[حرف الألف] -- إن ك/حدیث: 2475]

(نبی کریم صلی اللہ علیہ وسلم نے فرمایا:)
”بے شک میں نے تمہیں تین دن سے زیادہ قربانی کا گوشت کھانے سے اس لیے روکا تھا تاکہ تم سب کے لیے کافی ہو جائے، اب اللہ تعالیٰ نے خیر عطا فرما دی ہے، لہٰذا تم خود بھی کھاؤ، صدقہ بھی کرو اور ذخیرہ بھی کرو، بے شک یہ دن کھانے، پینے اور اللہ کا ذکر کرنے کے دن ہیں۔“ [صحيح الجامع الصغير وزيادته/[حرف الألف] -- إن ك/حدیث: 2476]

(نبی کریم صلی اللہ علیہ وسلم نے فرمایا:)
”بے شک میں دن میں ستر مرتبہ اللہ تعالیٰ کے حضور توبہ کرتا ہوں۔“ [صحيح الجامع الصغير وزيادته/[حرف الألف] -- إن ك/حدیث: 2477]

(نبی کریم صلی اللہ علیہ وسلم نے فرمایا:)
”بے شک میں نماز میں اس نیت سے داخل ہوتا ہوں کہ اسے لمبا کروں گا، پھر میں کسی بچے کے رونے کی آواز سنتا ہوں تو میں اپنی نماز مختصر کر دیتا ہوں کیونکہ میں اس بات کو جانتا ہوں کہ بچے کے رونے کی وجہ سے اس کی ماں کو کتنی شدید پریشانی ہوتی ہے۔“ [صحيح الجامع الصغير وزيادته/[حرف الألف] -- إن ك/حدیث: 2478]

(نبی کریم صلی اللہ علیہ وسلم نے فرمایا:)
”بے شک میں تمہیں اپنے پیچھے سے بھی اسی طرح دیکھتا ہوں جس طرح اپنے سامنے سے دیکھتا ہوں۔“ [صحيح الجامع الصغير وزيادته/[حرف الألف] -- إن ك/حدیث: 2479]

(نبی کریم صلی اللہ علیہ وسلم نے فرمایا:)
”بے شک مجھے اس بات کی امید ہے کہ میں اس دنیا سے اس حال میں رخصت ہوں گا کہ تم میں سے کسی کو مجھ پر کسی ایسے ظلم کا مطالبہ نہیں ہوگا جو میں نے اس پر کیا ہو۔“ [صحيح الجامع الصغير وزيادته/[حرف الألف] -- إن ك/حدیث: 2480]

(نبی کریم صلی اللہ علیہ وسلم نے فرمایا:)
”مجھے امید ہے کہ میری امت اپنے رب کے ہاں اتنی عاجز نہیں ہوگی کہ وہ انہیں آدھے دن کی مہلت عطا نہ فرمائے۔“ [صحيح الجامع الصغير وزيادته/[حرف الألف] -- إن ك/حدیث: 2481]

(نبی کریم صلی اللہ علیہ وسلم نے فرمایا:)
”مجھے امید ہے کہ ان شاء اللہ، غزوہ بدر اور صلح حدیبیہ میں شریک ہونے والوں میں سے کوئی بھی شخص جہنم میں داخل نہیں ہوگا۔“ [صحيح الجامع الصغير وزيادته/[حرف الألف] -- إن ك/حدیث: 2482]

(نبی کریم صلی اللہ علیہ وسلم نے فرمایا:)
”بلاشبہ میں دن میں ستر مرتبہ اللہ تعالیٰ سے مغفرت طلب کرتا ہوں۔“ [صحيح الجامع الصغير وزيادته/[حرف الألف] -- إن ك/حدیث: 2483]

(نبی کریم صلی اللہ علیہ وسلم نے فرمایا:)
”بے شک میں (دورانِ نماز) کسی بچے کے رونے کی آواز سنتا ہوں تو میں نماز کو مختصر کر دیتا ہوں۔“ [صحيح الجامع الصغير وزيادته/[حرف الألف] -- إن ك/حدیث: 2484]