سیدنا جابر رضی اللہ عنہ سے روایت ہے کہ میں نے نبی کریم صلی اللہ علیہ وسلم کو یہ ارشاد فرماتے ہوئے سنا: ”جب تم مجبور ہو جاؤ تو اس (قربانی کے جانور) پر معروف طریقے سے سواری کر لیا کرو یہاں تک کہ تمہیں کوئی دوسری سواری میسر آ جائے“، اور اس سے آپ صلی اللہ علیہ وسلم کی مراد ہدی (قربانی) کا اونٹ تھا۔ [مسند أبي يعلى الموصلي/مسند جابر/حدیث: 2204]

سیدنا جابر رضی اللہ عنہ سے روایت ہے کہ ”رسول اللہ صلی اللہ علیہ وسلم نے گردن کی دونوں جانب کی رگوں اور دونوں کندھوں کے درمیان پچھنے لگوائے اور حجامت کرنے والے کو اس کی اجرت عطا فرمائی، اور اگر یہ (اجرت دینا) حرام ہوتا تو آپ صلی اللہ علیہ وسلم اسے ہرگز نہ دیتے۔“ [مسند أبي يعلى الموصلي/مسند جابر/حدیث: 2205]

سیدنا جابر رضی اللہ عنہ سے روایت ہے کہ انہوں نے بیان فرمایا: ”رسول اللہ صلی اللہ علیہ وسلم نے تنہا جمعہ کے دن کا روزہ رکھنے سے منع فرمایا ہے۔“ [مسند أبي يعلى الموصلي/مسند جابر/حدیث: 2206]

سیدنا جابر بن عبداللہ رضی اللہ عنہما سے روایت ہے کہ ان سے ابو الزبیر المکی رحمہ اللہ نے گندم کے بدلے کھجور کی نقد مگر کمی بیشی کے ساتھ بیع کے متعلق دریافت کیا تو انہوں نے جواباً ارشاد فرمایا: ”ہم رسول اللہ صلی اللہ علیہ وسلم کے عہدِ مبارک میں ایک صاع گندم کو چھ صاع کھجور کے عوض نقد خریدا کرتے تھے، البتہ اگر (تبادلہ کی جانے والی اشیاء) ایک ہی جنس سے ہوں تو اس میں برابری کے سوا کوئی خیر (جواز) نہیں ہے۔“ [مسند أبي يعلى الموصلي/مسند جابر/حدیث: 2207]

سیدنا جابر رضی اللہ عنہ سے روایت ہے کہ نبی کریم صلی اللہ علیہ وسلم رمضان المبارک میں ایک سفر پر تھے، پس آپ صلی اللہ علیہ وسلم اور آپ کے صحابہ کرام رضی اللہ عنہم کا گزر ایک تالاب پر ہوا تو آپ صلی اللہ علیہ وسلم نے لوگوں سے فرمایا: ”تم پانی پی لو۔“ انہوں نے عرض کیا: (اے اللہ کے رسول صلی اللہ علیہ وسلم !) کیا ہم پانی پی لیں اور آپ نہ پیئیں؟ آپ صلی اللہ علیہ وسلم نے فرمایا: ”میں تم سب سے زیادہ آسانی اور سہولت میں ہوں کیونکہ میں (جانور پر) سوار ہوں۔“ پھر آپ صلی اللہ علیہ وسلم سواری سے نیچے اترے اور پانی نوش فرمایا، تو صحابہ نے بھی پانی پی لیا۔ [مسند أبي يعلى الموصلي/مسند جابر/حدیث: 2208]

سیدنا جابر رضی اللہ عنہ سے روایت ہے کہ جب رسول اللہ صلی اللہ علیہ وسلم مکہ تشریف لائے تو آپ صلی اللہ علیہ وسلم کے پاس وہ لوگ آئے جو چربی جمع کیا کرتے تھے، انہوں نے عرض کیا: ”اے اللہ کے رسول! ہم مردار اور دیگر ذرائع سے یہ چربی اکٹھی کرتے ہیں، اور یہ محض چمڑوں کو چکنا کرنے اور بحری جہازوں پر روغن کرنے کے کام آتی ہے“، تو رسول اللہ صلی اللہ علیہ وسلم نے ارشاد فرمایا: «قَاتَلَ اللَّهُ الْيَهُودَ» ”اللہ تعالیٰ یہودیوں کو غارت کرے“، ”ان پر چربیاں حرام کی گئی تھیں تو انہوں نے انہیں فروخت کیا اور ان کی قیمت کھا لی“، چنانچہ آپ صلی اللہ علیہ وسلم نے انہیں اس (تجارت) سے منع فرما دیا۔ [مسند أبي يعلى الموصلي/مسند جابر/حدیث: 2209]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جس شخص نے تین بیٹیوں کی پرورش کی، ان کی کفالت کی، ان کے ساتھ شفقت و رحم کا معاملہ کیا اور ان کے ساتھ نرمی برتی تو وہ (لازمی طور پر) جنت کا حقدار ہے۔“ ایک شخص نے عرض کیا: اے اللہ کے رسول! اور اگر دو بیٹیاں ہوں؟ آپ صلی اللہ علیہ وسلم نے فرمایا: ”اور دو (بیٹیوں کی پرورش پر بھی یہی اجر ہے)۔“ راوی کا بیان ہے کہ آپ صلی اللہ علیہ وسلم کی اس کرم نوازی کو دیکھ کر ہمیں یہ گمان ہوا کہ اگر کوئی شخص ایک بیٹی کے متعلق سوال کرتا تو آپ صلی اللہ علیہ وسلم اس کے حق میں بھی یہی ارشاد فرماتے۔ [مسند أبي يعلى الموصلي/مسند جابر/حدیث: 2210]

سیدنا جابر رضی اللہ عنہ سے روایت ہے کہ انہوں نے فرمایا: ”ایک دن رسول اللہ صلی اللہ علیہ وسلم نے میرا ہاتھ تھاما اور اپنی بعض ازواج مطہرات کے حجروں میں سے ایک حجرے کے پاس تشریف لائے، پھر آپ صلی اللہ علیہ وسلم اندر داخل ہوئے اور مجھے بھی اجازت مرحمت فرمائی تو میں بھی داخل ہو گیا۔ آپ صلی اللہ علیہ وسلم نے دریافت فرمایا: ”کیا دوپہر کا کھانا یا شام کا کچھ کھانا میسر ہے؟“ گھر والوں نے عرض کیا: جی ہاں، چنانچہ تین روٹیاں لائی گئیں تو آپ صلی اللہ علیہ وسلم نے دریافت فرمایا: ”کیا کوئی سالن ہے؟“ انہوں نے عرض کیا: نہیں، سوائے تھوڑے سے سرکے کے۔ آپ صلی اللہ علیہ وسلم نے فرمایا: ”وہی لے آؤ، سرکہ کتنا ہی بہترین سالن ہے“۔ سیدنا جابر رضی اللہ عنہ بیان کرتے ہیں کہ جب سے میں نے رسول اللہ صلی اللہ علیہ وسلم کو سرکے کے بارے میں یہ فرماتے سنا ہے، تب سے میں اسے مسلسل پسند کرتا ہوں، اور ابو سفیان رحمہ اللہ (راوی) نے کہا کہ جب سے میں نے سیدنا جابر رضی اللہ عنہ کو یہ بات کہتے سنا ہے، تب سے میں بھی اسے بہت پسند کرتا ہوں“۔ [مسند أبي يعلى الموصلي/مسند جابر/حدیث: 2211]

سیدنا جابر بن عبد اللہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جب کوئی شخص کسی گروہ سے کوئی بات کرے اور پھر (بات مکمل کر کے مڑ کر) دیکھے تو وہ بات امانت بن جاتی ہے (یعنی اسے دوسروں کے سامنے بے نقاب کرنا جائز نہیں ہے)۔“ [مسند أبي يعلى الموصلي/مسند جابر/حدیث: 2212]

سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جو بھی مسلمان کوئی پودا لگاتا ہے تو اس (کی پیداوار) میں سے جو کچھ کھایا جائے وہ اس کے لیے صدقہ شمار ہوتا ہے، جو اس میں سے چوری ہو جائے وہ بھی اس کے لیے صدقہ ہے، جو پرندے اس میں سے کھا لیں وہ بھی صدقہ ہے اور جو درندے یا جنگلی جانور اس میں سے کھا لیں وہ بھی اس کے حق میں صدقہ ہے۔“ [مسند أبي يعلى الموصلي/مسند جابر/حدیث: 2213]