سیدنا ابن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم (حج کے موقع پر) مسلسل تلبیہ پکارتے رہے یہاں تک کہ آپ صلی اللہ علیہ وسلم نے جمرہ (عقبہ) کی رمی فرمائی۔“ [مسند أبي يعلى الموصلي/أول مسند ابن عباس/حدیث: 2697]

سیدنا ابن عباس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: «لَا يُبْغِضُ الْأَنْصَارَ رَجُلٌ يُؤْمِنُ بِاللَّهِ وَالْيَوْمِ الْآخِرِ، أَوْ إِلَّا أَبْغَضَهُ اللَّهُ وَرَسُولُهُ» ”کوئی بھی ایسا شخص جو اللہ تعالیٰ اور روزِ آخرت پر ایمان رکھتا ہو وہ انصار سے ہرگز بغض نہیں رکھے گا، ورنہ اللہ اور اس کا رسول اس سے بغض رکھیں گے۔“ [مسند أبي يعلى الموصلي/أول مسند ابن عباس/حدیث: 2698]

سیدنا عبد اللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: «لَيْسَ الْمُؤْمِنُ الَّذِي يَشْبَعُ وَجَارُهُ جَائِعٌ إِلَى جَنْبِهِ» ”وہ شخص (کامل) مومن نہیں ہے جو خود تو شکم سیر ہو کر کھائے جبکہ اس کے پہلو میں رہنے والا اس کا پڑوسی بھوکا ہو۔“ [مسند أبي يعلى الموصلي/أول مسند ابن عباس/حدیث: 2699]

سیدہ عائشہ اور سیدنا ابن عباس رضی اللہ عنہما سے روایت ہے کہ ”نبی اکرم صلی اللہ علیہ وسلم نے قربانی والے دن (یومِ نحر) کے طواف کو رات تک مؤخر فرما دیا تھا۔“ [مسند أبي يعلى الموصلي/أول مسند ابن عباس/حدیث: 2700]

عبدالرحمٰن بن عابس رحمہ اللہ بیان کرتے ہیں کہ میں نے سیدنا ابن عباس رضی اللہ عنہما کو یہ فرماتے ہوئے سنا کہ ”میں عید کے روز رسول اللہ صلی اللہ علیہ وسلم کے ہمراہ (نماز کے لیے) نکلا، آپ صلی اللہ علیہ وسلم نے پہلے نماز پڑھائی اور پھر خطبہ ارشاد فرمایا، اس کے بعد آپ صلی اللہ علیہ وسلم خواتین کی جانب تشریف لائے، انہیں وعظ و نصیحت فرمائی، (اللہ اور آخرت کی) یاد دہانی کرائی اور انہیں صدقہ و خیرات کرنے کا حکم دیا۔“ [مسند أبي يعلى الموصلي/أول مسند ابن عباس/حدیث: 2701]

سیدنا ابن عباس رضی اللہ عنہما سے روایت ہے کہ انہوں نے فرمایا: ”رسول اللہ صلی اللہ علیہ وسلم اس کثرت سے مسواک فرمایا کرتے تھے کہ ہمیں یہ گمان ہونے لگا یا ہمیں یہ اندیشہ ہوا کہ شاید عنقریب اس (مسواک کی فرضیت) کے بارے میں آپ صلی اللہ علیہ وسلم پر وحی نازل کر دی جائے گی۔“ [مسند أبي يعلى الموصلي/أول مسند ابن عباس/حدیث: 2702]

سیدنا ابن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم کھجور کے پتوں سے بنی چھوٹی چٹائی (خمرہ) پر نماز ادا فرمایا کرتے تھے۔“ [مسند أبي يعلى الموصلي/أول مسند ابن عباس/حدیث: 2703]

نضر بن کثیر بیان کرتے ہیں کہ عبداللہ بن طاؤس رحمہ اللہ نے میرے پہلو میں نماز پڑھی، پس جب انہوں نے پہلا سجدہ کر کے اپنا سر اٹھایا تو ”اپنے دونوں ہاتھ اپنے چہرے کے برابر بلند کیے“، مجھے یہ عمل عجیب لگا تو میں نے وہیب بن خالد رحمہ اللہ سے کہا کہ یہ صاحب ایسا کام کر رہے ہیں جو میں نے کسی اور کو کرتے نہیں دیکھا، وہیب رحمہ اللہ نے ان سے کہا کہ آپ ایسا عمل کر رہے ہیں جو ہم نے کسی کو کرتے نہیں دیکھا، تو عبداللہ بن طاؤس رحمہ اللہ نے فرمایا: ”میں نے اپنے والد طاؤس رحمہ اللہ کو اسی طرح کرتے دیکھا ہے“ اور میرے والد نے فرمایا تھا کہ ”میں نے سیدنا عبداللہ بن عباس رضی اللہ عنہما کو اسی طرح کرتے دیکھا ہے“، نیز انہوں نے یہ بھی ذکر کیا کہ ”نبی کریم صلی اللہ علیہ وسلم بھی اسی طرح (نماز میں) کیا کرتے تھے“۔ [مسند أبي يعلى الموصلي/أول مسند ابن عباس/حدیث: 2704]

سیدنا ابن عباس رضی اللہ عنہما سے روایت ہے کہ انہوں نے فرمایا: ”اللہ تبارک و تعالیٰ نے اپنی تمام مخلوق میں سے محمد صلی اللہ علیہ وسلم کے سوا کسی کو بھی (مواخذہ سے مکمل) امن و تحفظ عطا نہیں فرمایا، چنانچہ آپ صلی اللہ علیہ وسلم کے متعلق ارشادِ باری تعالیٰ ہے: ﴿لِيَغْفِرَ لَكَ اللَّهُ مَا تَقَدَّمَ مِنْ ذَنْبِكَ وَمَا تَأَخَّرَ﴾ ”تاکہ اللہ آپ کی خاطر آپ کی اگلی اور پچھلی تمام لغزشیں معاف فرما دے“، جبکہ فرشتوں کے حق میں اللہ سبحانہ و تعالیٰ نے یہ تنبیہ فرمائی ہے: ﴿وَمَنْ يَقُلْ مِنْهُمْ إِنِّي إِلَهٌ مِنْ دُونِهِ فَذَلِكَ نَجْزِيهِ جَهَنَّمَ﴾ ”اور ان میں سے جو کوئی یہ دعویٰ کرے کہ میں اللہ کے علاوہ معبود ہوں، تو اسے ہم بدلے میں جہنم کی سزا دیں گے“۔“ [مسند أبي يعلى الموصلي/أول مسند ابن عباس/حدیث: 2705]

حسن بصری رحمہ اللہ سے روایت ہے کہ ”رسول اللہ صلی اللہ علیہ وسلم نماز کے دوران اپنی داڑھی مبارک کو مس فرماتے تھے۔“ [مسند أبي يعلى الموصلي/أول مسند ابن عباس/حدیث: 2706]