سیدنا ابن عباس رضی اللہ عنہما سے روایت ہے کہ میں نے رات کی نماز (تہجد) کا تذکرہ کیا، تو حاضرین میں سے بعض نے بیان کیا کہ رسول اللہ صلی اللہ علیہ وسلم نے ارشاد فرمایا: ”(تہجد کا قیام) آدھی رات، اس کا تہائی حصہ، اس کا چوتھائی حصہ، یا اونٹنی کے دو مرتبہ دودھ دوہنے کے درمیانی وقفے کے برابر، یا بکری کے دو دفعہ دودھ دوہنے کے درمیانی وقفے کے بقدر بھی (ہو سکتا ہے)۔“ [مسند أبي يعلى الموصلي/أول مسند ابن عباس/حدیث: 2677]

سیدنا ابن عباس رضی اللہ عنہما سے روایت ہے کہ انہوں نے بیان کیا: ”رسول اللہ صلی اللہ علیہ وسلم نے بغیر کسی سفر اور بارش کے عذر کے ظہر و عصر اور مغرب و عشاء کی نمازیں جمع فرما کر پڑھائیں“، صالح رحمہ اللہ کہتے ہیں کہ میں نے (ابن عباس رضی اللہ عنہما سے) دریافت کیا کہ اس عمل سے آپ صلی اللہ علیہ وسلم کا کیا مقصد تھا؟ تو انہوں نے جواب دیا: ”آپ صلی اللہ علیہ وسلم کا مقصود اپنی امت کے لیے وسعت اور آسانی پیدا کرنا تھا“۔ [مسند أبي يعلى الموصلي/أول مسند ابن عباس/حدیث: 2678]

سیدنا عبد اللہ بن عباس رضی اللہ عنہما سے روایت ہے کہ سیدنا ضمرہ بن جندب رضی اللہ عنہ ہجرت کی نیت سے اپنے گھر سے نکلے اور انہوں نے اپنے اہل خانہ سے کہا: ”مجھے اٹھا کر مشرکین کی زمین سے نکال کر رسول اللہ صلی اللہ علیہ وسلم کی جانب لے چلو“، چنانچہ وہ نبی اکرم صلی اللہ علیہ وسلم تک پہنچنے سے قبل ہی راستے میں وفات پا گئے، تو یہ وحی الٰہی نازل ہوئی: ﴿وَمَنْ يَخْرُجْ مِنْ بَيْتِهِ مُهَاجِرًا إِلَى اللَّهِ وَرَسُولِهِ ثُمَّ يُدْرِكْهُ الْمَوْتُ﴾ ”اور جو شخص اپنے گھر سے اللہ اور اس کے رسول کی طرف ہجرت کے لیے نکلے، پھر اسے (راستے میں ہی) موت آ پکڑے (تو اس کا اجر اللہ کے ذمہ ثابت ہو گیا)“ یہاں تک کہ آیت ﴿وَكَانَ اللَّهُ غَفُورًا رَحِيمًا﴾ ”اور اللہ تعالیٰ بڑا بخشنے والا، نہایت رحم فرمانے والا ہے“ پر ختم ہوئی۔ [مسند أبي يعلى الموصلي/أول مسند ابن عباس/حدیث: 2679]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”میری مدد بادِ صبا (مشرقی ہوا) کے ذریعے کی گئی ہے، جبکہ قومِ عاد کو بادِ دبور (مغربی ہوا) کے ذریعے ہلاک کر دیا گیا۔“ [مسند أبي يعلى الموصلي/أول مسند ابن عباس/حدیث: 2680]

سیدنا عبد اللہ بن عباس رضی اللہ عنہما سے روایت ہے کہ ”رسول اللہ صلی اللہ علیہ وسلم رات کے وقت دو رکعتیں ادا فرماتے، پھر جب نماز سے فارغ ہوتے تو مسواک فرمایا کرتے تھے۔“ [مسند أبي يعلى الموصلي/أول مسند ابن عباس/حدیث: 2681]

سیدنا ابن عباس رضی اللہ عنہما سے روایت ہے کہ نبی کریم صلی اللہ علیہ وسلم نے سیدنا ابو قتادہ رضی اللہ عنہ سے اس مقتول کے سامانِ حرب کے متعلق جو انہوں نے حاصل کیا تھا، ارشاد فرمایا: «دَعْهُ وَسَلَبَهُ» ”تم اسے اور اس کے سامانِ حرب کو چھوڑ دو۔“ [مسند أبي يعلى الموصلي/أول مسند ابن عباس/حدیث: 2682]

سیدنا ابن عباس رضی اللہ عنہما سے روایت ہے کہ سیدنا سعد بن عبادہ رضی اللہ عنہ نبی کریم صلی اللہ علیہ وسلم کی خدمتِ اقدس میں حاضر ہوئے اور عرض کی کہ ”میری والدہ وفات پا چکی ہیں اور ان کے ذمے ایک نذر تھی جو وہ پوری نہیں کر پائیں“، تو نبی کریم صلی اللہ علیہ وسلم نے ان سے ارشاد فرمایا: ”تم ان کی جانب سے اسے پورا کرو“۔ [مسند أبي يعلى الموصلي/أول مسند ابن عباس/حدیث: 2683]

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے احد پہاڑ کی جانب دیکھا اور ارشاد فرمایا: ”مجھے یہ بات ہرگز خوش نہیں کرے گی کہ یہ (پہاڑ) آلِ محمد صلی اللہ علیہ وسلم کے لیے سونا بن جائے جسے میں اللہ کی راہ میں خرچ کروں، اور جس دن میرا انتقال ہو تو میرے پاس اس میں سے دو دینار بھی باقی موجود ہوں۔“ [مسند أبي يعلى الموصلي/أول مسند ابن عباس/حدیث: 2684]

سیدنا ابن عباس رضی اللہ عنہما سے اللہ تعالیٰ کے ارشاد ﴿وَأَنْتُمْ سَامِدُونَ﴾ کے متعلق مروی ہے کہ ”کفار و مشرکین نبی کریم صلی اللہ علیہ وسلم کے پاس سے اپنی گردنیں تان کر اور تکبر کے ساتھ گزرتے تھے،“ (اس مفہوم کی وضاحت کے لیے انہوں نے فرمایا) «أَلَمْ تَرَ إِلَى الْعِجْلِ كَيْفَ يَخْطِرُ شَامِخًا» ”کیا تم نے بچھڑے کو نہیں دیکھا کہ وہ کس طرح (اپنے سر کو) بلند کر کے اور اکڑ کر چلتا ہے؟“ [مسند أبي يعلى الموصلي/أول مسند ابن عباس/حدیث: 2685]

سیدنا ابن عباس رضی اللہ عنہما سے روایت ہے کہ نبی کریم صلی اللہ علیہ وسلم نے قریش کی ایک خاتون کو نکاح کا پیغام دیا جنہیں سیدہ سودہ رضی اللہ عنہا کہا جاتا تھا، تو آپ صلی اللہ علیہ وسلم نے ان سے ارشاد فرمایا: ”اونٹوں کی پیٹھ پر سواری کرنے والی تمام عورتوں میں قریش کی عورتیں سب سے بہتر ہیں، جو بچپن میں اپنی اولاد پر نہایت شفیق ہوتی ہیں اور اپنے شوہر کے مال و متاع کی بہترین نگہبانی کرنے والی ہوتی ہیں۔“ [مسند أبي يعلى الموصلي/أول مسند ابن عباس/حدیث: 2686]