سیدنا انس رضی اللہ عنہ سے روایت ہے کہ نبی اکرم صلی اللہ علیہ وسلم کا گزر ایک ایسے شخص کے پاس سے ہوا جو قربانی کا اونٹ (بدنہ) ہانک کر لے جا رہا تھا، آپ صلی اللہ علیہ وسلم نے اس سے فرمایا: ”اس پر سوار ہو جاؤ“، اس شخص نے عرض کی: (اے اللہ کے رسول!) یہ تو قربانی کا اونٹ ہے، آپ صلی اللہ علیہ وسلم نے (تاکیداً) فرمایا: ”افسوس تم پر! اس پر سوار ہو جاؤ“۔ [مسند أبي يعلى الموصلي/مسند أنس بن مالك/حدیث: 3106]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”جب تم میں سے کوئی تھوکنے لگے تو وہ اپنے سامنے کی جانب نہ تھوکے اور نہ ہی اپنی دائیں طرف، بلکہ اسے چاہیے کہ وہ اپنی بائیں جانب یا اپنے بائیں پاؤں کے نیچے تھوکے۔“ [مسند أبي يعلى الموصلي/مسند أنس بن مالك/حدیث: 3107]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم کے لیے کبھی صبح اور شام کے دونوں کھانوں میں روٹی اور گوشت بیک وقت جمع نہیں ہوئے، سوائے اس صورت کے کہ جب کثرت سے مہمان موجود ہوں۔“ [مسند أبي يعلى الموصلي/مسند أنس بن مالك/حدیث: 3108]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”جو شخص کوئی نماز (پڑھنا) بھول جائے یا اس سے سویا رہ جائے، تو اس کا کفارہ بس یہی ہے کہ جب اسے وہ یاد آئے تو اسے ادا کر لے۔“ [مسند أبي يعلى الموصلي/مسند أنس بن مالك/حدیث: 3109]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم نے سیدنا ابن ام مکتوم رضی اللہ عنہ کو دو مرتبہ مدینہ منورہ پر اپنا قائم مقام مقرر فرمایا“، سیدنا انس رضی اللہ عنہ بیان کرتے ہیں: ”اور میں نے یقیناً انہیں قادسیہ کی جنگ کے دن دیکھا تھا کہ ان کے پاس ایک سیاہ رنگ کا جھنڈا تھا“۔ [مسند أبي يعلى الموصلي/مسند أنس بن مالك/حدیث: 3110]

سیدنا انس رضی اللہ عنہ سے روایت ہے کہ ”رسول اللہ صلی اللہ علیہ وسلم نے کھڑے ہو کر پینے اور کھڑے ہو کر کھانا کھانے سے منع فرمایا ہے“۔ [مسند أبي يعلى الموصلي/مسند أنس بن مالك/حدیث: 3111]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم کی خدمتِ اقدس میں باریک ریشم کا ایک جبہ بطور ہدیہ پیش کیا گیا، حالانکہ آپ صلی اللہ علیہ وسلم ریشم کے استعمال سے منع فرماتے تھے، چنانچہ لوگ اس کی نفاست و خوبصورتی پر حیران ہونے لگے تو آپ صلی اللہ علیہ وسلم نے ارشاد فرمایا: ”اس ذات کی قسم جس کے قبضۂ قدرت میں میری جان ہے! یقیناً جنت میں سیدنا سعد بن معاذ رضی اللہ عنہ کے رومال اس سے کہیں زیادہ حسین و جمیل ہیں۔“ [مسند أبي يعلى الموصلي/مسند أنس بن مالك/حدیث: 3112]

سیدنا انس رضی اللہ عنہ سے روایت ہے کہ اہلِ مکہ نے رسول اللہ صلی اللہ علیہ وسلم سے کوئی نشانی دکھانے کا مطالبہ کیا تو آپ صلی اللہ علیہ وسلم نے انہیں چاند کے دو ٹکڑے ہو جانے کا معجزہ دکھایا۔ [مسند أبي يعلى الموصلي/مسند أنس بن مالك/حدیث: 3113]

سیدنا انس رضی اللہ عنہ سے روایت ہے کہ ایک یہودی نبی اکرم صلی اللہ علیہ وسلم کے پاس آیا اور اس نے کہا: «السَّامُ عَلَيْكُمْ» ”تم پر موت ہو“، تو حاضرینِ مجلس نے اسے جواب دیا، تب اللہ کے نبی صلی اللہ علیہ وسلم نے دریافت فرمایا: ”کیا تم جانتے ہو کہ اس نے کیا کہا ہے؟“ انہوں نے عرض کیا: اللہ اور اس کا رسول صلی اللہ علیہ وسلم بہتر جانتے ہیں، اے اللہ کے نبی! اس نے تو سلام کیا ہے، آپ صلی اللہ علیہ وسلم نے فرمایا: ”نہیں، بلکہ اس نے اس اس طرح (یعنی بددعا کے کلمات) کہے ہیں، اسے دوبارہ میرے پاس بلا کر لاؤ“، چنانچہ صحابہ اسے دوبارہ لے آئے تو آپ صلی اللہ علیہ وسلم نے اس سے دریافت فرمایا: ”کیا تو نے «السَّامُ عَلَيْكُمْ» کہا ہے؟“ اس نے اقرار کیا: جی ہاں، اس موقع پر اللہ کے نبی صلی اللہ علیہ وسلم نے ارشاد فرمایا: ”جب اہل کتاب میں سے کوئی تمہیں سلام کرے تو تم جواب میں «وَعَلَيْكَ» ”اور تجھ پر بھی (وہی ہو)“ کہا کرو“، آپ صلی اللہ علیہ وسلم نے اسے فرمایا: ”تجھ پر بھی وہی ہو جو تو نے کہا“، اور اسی تناظر میں یہ آیت نازل ہوئی: ﴿وَإِذَا جَاءُوكَ حَيَّوْكَ بِمَا لَمْ يُحَيِّكَ بِهِ اللَّهُ﴾ ”اور جب وہ آپ کے پاس آتے ہیں تو آپ کو ان کلمات کے ساتھ سلام کرتے ہیں جن کے ساتھ اللہ نے آپ کو سلام نہیں کیا“۔ [مسند أبي يعلى الموصلي/مسند أنس بن مالك/حدیث: 3114]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم نے (حوضِ کوثر کے متعلق) ارشاد فرمایا: ”اس میں چاندی کے آفتابے آسمان کے ستاروں کی تعداد کے برابر یا اس سے بھی زائد نظر آئیں گے۔“ [مسند أبي يعلى الموصلي/مسند أنس بن مالك/حدیث: 3115]