ابراہیم رحمہ اللہ بیان کرتے ہیں کہ ہنی الضبی رحمہ اللہ نے کہا کہ ہماری ملاقات علقمہ رحمہ اللہ سے ہوئی جبکہ اس وقت زیاد نے ایک شخص کا مثلہ (اعضاء کاٹنا) کر کے اسے سولی پر چڑھا رکھا تھا، علقمہ رحمہ اللہ نے ہم سے پوچھا: ”یہ لوگ کس لیے جمع ہوئے ہیں؟“ میں نے عرض کیا: زیاد نے ایک شخص کا مثلہ کیا ہے، اس پر انہوں نے کہا کہ سیدنا عبداللہ بن مسعود رضی اللہ عنہ نے نبی کریم صلی اللہ علیہ وسلم سے مروی یہ حدیث بیان کی ہے — جہاں تک میرا گمان ہے — کہ آپ صلی اللہ علیہ وسلم نے ارشاد فرمایا: ”قتل کرنے کے معاملے میں لوگوں میں سب سے زیادہ پاک دامن اور زیادتی سے بچنے والے اہل ایمان ہوتے ہیں۔“ [مسند أبي يعلى الموصلي/مسند عبد الله بن مسعود/حدیث: 5147]

سیدنا عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”بچہ اسی کا قرار پائے گا جس کے بستر پر وہ پیدا ہوا، اور زنا کرنے والے کے لیے محرومی ہے۔“ [مسند أبي يعلى الموصلي/مسند عبد الله بن مسعود/حدیث: 5148]

سیدنا عبداللہ رضی اللہ عنہ سے روایت ہے کہ نبی کریم صلی اللہ علیہ وسلم نے ارشاد فرمایا: ”اگر میں اہل زمین میں سے کسی کو اپنا خلیل (جگری دوست) بناتا تو ابوبکر بن ابی قحافہ کو اپنا خلیل بناتا، لیکن تمہارا یہ رفیق (یعنی خود رسول اللہ صلی اللہ علیہ وسلم ) اللہ کا خلیل ہے، اور بے شک قرآن سات حروف پر نازل ہوا ہے، اس کی ہر آیت کا ایک ظاہر ہے اور ایک باطن، اور (شریعت کی) ہر حد کے لیے ایک مطلع (جائے اطلاع و آگاہی) ہے“۔ [مسند أبي يعلى الموصلي/مسند عبد الله بن مسعود/حدیث: 5149]

سیدنا عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ وسلم نے مجھ سے فرمایا: ”مجھے (قرآن) پڑھ کر سناؤ“، میں نے عرض کی: اے اللہ کے رسول صلی اللہ علیہ وسلم ! کیا میں آپ کو سناؤں حالانکہ میں نے آپ ہی سے تو اسے سیکھا ہے؟ آپ صلی اللہ علیہ وسلم نے فرمایا: ”بے شک میں اسے اپنے علاوہ کسی دوسرے سے سننا پسند کرتا ہوں“، چنانچہ میں نے آپ صلی اللہ علیہ وسلم کے سامنے سورہ نساء کی تلاوت شروع کی یہاں تک کہ جب میں اس آیت مبارکہ ﴿فَكَيْفَ إِذَا جِئْنَا مِنْ كُلِّ أُمَّةٍ بِشَهِيدٍ وَجِئْنَا بِكَ عَلَى هَؤُلَاءِ شَهِيدًا﴾ ”پھر کیا حال ہوگا جب ہم ہر امت میں سے ایک گواہ لائیں گے اور ہم آپ کو ان لوگوں پر بطور گواہ لائیں گے“ پر پہنچا تو آپ صلی اللہ علیہ وسلم کی مبارک آنکھوں سے آنسو جاری ہو گئے۔ [مسند أبي يعلى الموصلي/مسند عبد الله بن مسعود/حدیث: 5150]

سیدنا عبد اللہ رضی اللہ عنہ سے روایت ہے کہ ”رسول اللہ صلی اللہ علیہ وسلم نے دس عادتوں کو ناپسند فرمایا ہے: سونے کی انگوٹھی پہننا، (ٹخنوں سے نیچے) تہبند لٹکانا، زرد رنگ یعنی خلوق (زعفرانی خوشبو) کا استعمال کرنا، بڑھاپے کو بدلنا (راویِ حدیث جریر رحمہ اللہ کے بقول اس سے مراد سفید بالوں کو اکھیڑنا ہے)، معوذتین کے علاوہ کسی اور طریقے سے دم کرنا، تعویذ لٹکانا، چھکوں (جوئے کے مہروں) کے ساتھ کھیلنا، غیر محل (نامحرموں) کے سامنے زینت و سنگھار کی نمائش کرنا، منی کو اس کے مقام سے پھیر دینا (یعنی عزل کرنا) اور بچے کو (دورانِ رضاعت جماع کے ذریعے) فاسد کرنا، اگرچہ آپ صلی اللہ علیہ وسلم نے اسے قطعاً حرام قرار نہیں دیا تھا۔“ [مسند أبي يعلى الموصلي/مسند عبد الله بن مسعود/حدیث: 5151]

ابو الکنود رحمہ اللہ سے روایت ہے کہ انہوں نے بیان کیا کہ ”یومِ مہران میں نے اہلِ فارس کے رؤساء میں سے ایک شخص کو قابو کیا، پھر میں نے اس کا مالِ غنیمت تو حاکمِ وقت کے حوالے کر دیا مگر اس کی سونے کی ایک انگوٹھی اپنے پاس رکھ لی، اور وہ میرے ہاتھ میں دیکھی جا چکی تھی۔ میں نے (اپنے دل میں) کہا کہ جب میں بلادِ عجم کی طرف نکلوں گا اور مجھے کسی شے کی ضرورت ہوگی تو یہ وہاں رائج ہونے والی (نفع بخش) چیز ہے، پھر میں سیدنا عبد اللہ رضی اللہ عنہ کی خدمت میں حاضر ہوا اور وہ انگوٹھی میرے ہاتھ میں تھی، انہوں نے دریافت فرمایا کہ ”یہ انگوٹھی کیسی ہے؟“ تو میں نے انہیں پورا قصہ سنا دیا، چنانچہ انہوں نے وہ انگوٹھی مجھ سے لی اور اسے اپنے منہ میں ڈال کر چبایا، پھر اسے میری طرف پھینک دیا اور فرمایا کہ ”نبی کریم صلی اللہ علیہ وسلم نے سونے کے چھلے کے استعمال سے منع فرمایا ہے۔““ [مسند أبي يعلى الموصلي/مسند عبد الله بن مسعود/حدیث: 5152]

سیدنا عبداللہ بن مسعود رضی اللہ عنہ سے روایت ہے کہ عبداللہ بن سلمہ رحمہ اللہ نے انہیں یہ فرماتے ہوئے سنا کہ ”تمہارے نبی صلی اللہ علیہ وسلم کو (بجز پانچ چیزوں کے) ہر شے کا علم عطا کیا گیا ہے، سوائے ان پانچ غیب کی کنجیوں کے جن کا ذکر اس آیت میں ہے: ﴿إِنَّ اللَّهَ عِنْدَهُ عِلْمُ السَّاعَةِ وَيُنَزِّلُ الْغَيْثَ وَيَعْلَمُ مَا فِي الْأَرْحَامِ وَمَا تَدْرِي نَفْسٌ مَاذَا تَكْسِبُ غَدًا وَمَا تَدْرِي نَفْسٌ بِأَيِّ أَرْضٍ تَمُوتُ إِنَّ اللَّهَ عَلِيمٌ خَبِيرٌ﴾ ”بے شک اللہ ہی کے پاس قیامت کا علم ہے، وہی بارش نازل فرماتا ہے اور وہی جانتا ہے جو کچھ رحموں (ماؤں کے پیٹ) میں ہے، اور کوئی جان نہیں جانتی کہ وہ کل کیا عمل کرے گی اور نہ ہی کوئی جان یہ جانتی ہے کہ وہ کس زمین میں مرے گی، یقیناً اللہ سب کچھ جاننے والا اور ہر بات سے باخبر ہے“۔“ [مسند أبي يعلى الموصلي/مسند عبد الله بن مسعود/حدیث: 5153]

سیدنا عبداللہ رضی اللہ عنہ سے روایت ہے کہ ہم نے نبی کریم صلی اللہ علیہ وسلم سے جنازے کے ساتھ چلنے کی رفتار کے متعلق دریافت کیا تو آپ صلی اللہ علیہ وسلم نے ارشاد فرمایا: ”جنازے کی رفتار دُلکی چال سے کچھ کم ہونی چاہیے، کیونکہ اگر وہ (میت) نیکوکار ہے تو تم اسے خیر کی طرف جلدی پہنچا رہے ہو، اور اگر وہ اس کے سوا کچھ اور ہے تو آگ والوں کے لیے بربادی اور دوری ہی ہے، جنازہ وہ ہے جس کے پیچھے چلا جائے اور وہ شخص ہم میں سے نہیں جو جنازے کے آگے چلے۔“ [مسند أبي يعلى الموصلي/مسند عبد الله بن مسعود/حدیث: 5154]

سیدنا عبداللہ رضی اللہ عنہ سے روایت ہے کہ انہوں نے بیان فرمایا کہ ”مسلمانوں میں سب سے پہلے جس شخص کا ہاتھ کاٹا گیا وہ انصار کا ایک آدمی تھا، اسے نبی کریم صلی اللہ علیہ وسلم کی خدمت میں لایا گیا اور بتایا گیا کہ اس نے چوری کی ہے، تو آپ صلی اللہ علیہ وسلم نے ارشاد فرمایا: ”اپنے اس ساتھی کو لے جاؤ اور اس کا ہاتھ کاٹ دو“، (یہ حکم دینے کے بعد) رسول اللہ صلی اللہ علیہ وسلم کے چہرہ مبارک کا رنگ رنج و ملال کی شدت سے اس طرح متغیر ہو گیا گویا اس پر راکھ ڈال دی گئی ہو، آپ صلی اللہ علیہ وسلم کے پاس بیٹھے ہوئے ایک شخص نے عرض کیا: اے اللہ کے رسول! ایسا لگتا ہے کہ یہ معاملہ آپ پر بہت گراں گزرا ہے؟ آپ صلی اللہ علیہ وسلم نے ارشاد فرمایا: ”اور تمہیں شیطان یا ابلیس کا مددگار نہیں بننا چاہیے، بلاشبہ کسی بھی صاحبِ امر (حاکم) کے لیے یہ مناسب نہیں ہے کہ اس کے پاس حد کا کوئی معاملہ لایا جائے اور وہ اسے نافذ نہ کرے، جبکہ اللہ تعالیٰ خود درگزر کرنے والا ہے اور درگزر کو پسند فرماتا ہے“، پھر آپ صلی اللہ علیہ وسلم نے یہ آیت تلاوت فرمائی: ﴿وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللَّهُ لَكُمْ﴾ ”اور انہیں چاہیے کہ وہ معاف کریں اور درگزر کریں، کیا تم یہ نہیں چاہتے کہ اللہ تمہاری مغفرت فرمائے؟“۔“ [مسند أبي يعلى الموصلي/مسند عبد الله بن مسعود/حدیث: 5155]

سیدنا عبد اللہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”عنقریب میرے بعد ترجیحِ نفس (یعنی حق تلفی و اقربا پروری) اور ایسے معاملات رونما ہوں گے جنہیں تم (شریعت کے منافی ہونے کی بنا پر) ناپسند کرو گے۔“ صحابہ کرام رضی اللہ عنہم نے عرض کیا: اے اللہ کے رسول صلی اللہ علیہ وسلم ! آپ ہم میں سے اس شخص کو کیا حکم دیتے ہیں جو اس دور کو پائے؟ آپ صلی اللہ علیہ وسلم نے ارشاد فرمایا: ”تم وہ حق ادا کرنا جو تم پر واجب ہے اور اپنے حق کے لیے اللہ تعالیٰ سے سوال کرنا۔“ [مسند أبي يعلى الموصلي/مسند عبد الله بن مسعود/حدیث: 5156]