سیدنا عبد اللہ بن مسعود رضی اللہ عنہ سے مروی ہے، عبد الرحمن بن یزید رحمہ اللہ بیان کرتے ہیں کہ ہم نے سیدنا ابن مسعود رضی اللہ عنہ کے ساتھ حج کیا، یہاں تک کہ جب صبحِ صادق طلوع ہوئی تو آپ کھڑے ہوئے اور نمازِ فجر ادا کی، وہ کہتے ہیں کہ میں نے ان سے عرض کی: ”آپ یہ نماز اس وقت (اتنی جلدی) تو نہیں پڑھا کرتے تھے؟“ اور آپ (عام طور پر) خوب اجالے میں نماز ادا فرمایا کرتے تھے، تو سیدنا ابن مسعود رضی اللہ عنہ نے فرمایا: ”بے شک میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم نے اس دن، اس مقام پر، اسی وقت میں نماز ادا فرمائی تھی“، یعنی مزدلفہ میں۔ [مسند أبي يعلى الموصلي/مسند عبد الله بن مسعود/حدیث: 5367]

سیدنا عبد اللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نماز ادا فرما رہے تھے، پس جب آپ صلی اللہ علیہ وسلم سجدہ ریز ہوئے تو سیدنا حسن اور سیدنا حسین رضی اللہ عنہما آپ صلی اللہ علیہ وسلم کی پشتِ مبارک پر سوار ہو گئے، جب لوگوں نے انہیں روکنے کی کوشش کی تو آپ صلی اللہ علیہ وسلم نے ان کی جانب اشارہ فرمایا کہ ”ان دونوں کو چھوڑ دو (یعنی نہ روکو)“، پھر جب آپ صلی اللہ علیہ وسلم نماز سے فارغ ہوئے تو آپ صلی اللہ علیہ وسلم نے ان دونوں کو اپنی گود مبارک میں بٹھا لیا اور ارشاد فرمایا: «مَنْ أَحَبَّنِي فَلْيُحِبَّ هَذَيْنِ» ”جو شخص مجھ سے محبت کرتا ہے، اسے چاہیے کہ وہ ان دونوں سے بھی محبت کرے۔“ [مسند أبي يعلى الموصلي/مسند عبد الله بن مسعود/حدیث: 5368]

سیدنا عبد اللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: «لَيْسَ الْمُؤْمِنُ بِاللَّعَّانِ، وَلَا بِالطَّعَّانِ، وَلَا الْفَاحِشِ، وَلَا الْبَذِيءِ» ”مومن بہت زیادہ لعنت کرنے والا، طعنہ دینے والا، بے حیائی کی بات کرنے والا اور بد زبان نہیں ہوتا۔“ [مسند أبي يعلى الموصلي/مسند عبد الله بن مسعود/حدیث: 5369]

سیدنا عبداللہ بن مسعود رضی اللہ عنہ سے روایت ہے کہ ”رسول اللہ صلی اللہ علیہ وسلم (کبھی کبھی) سجدے کی حالت میں سو جایا کرتے تھے، چنانچہ آپ صلی اللہ علیہ وسلم کی نیند کا پتا آپ صلی اللہ علیہ وسلم کے بھرے بھرے سانس لینے کی آواز (خراٹوں) ہی سے چلتا تھا، پھر آپ صلی اللہ علیہ وسلم (بغیر نیا وضو کیے) اپنی نماز کے لیے کھڑے ہو جاتے۔“ [مسند أبي يعلى الموصلي/مسند عبد الله بن مسعود/حدیث: 5370]

سیدنا عبداللہ بن مسعود رضی اللہ عنہ سے مروی ہے، ابو عقرب اسدی رحمہ اللہ بیان کرتے ہیں کہ میں سیدنا عبداللہ بن مسعود رضی اللہ عنہ کی خدمت میں حاضر ہوا جبکہ وہ ایک بالا خانے کی چھت پر تشریف فرما تھے، میں بھی وہیں ان کے پاس بیٹھ گیا، وہ مسلسل یہ فرما رہے تھے: ”اللہ اور اس کے رسول نے سچ فرمایا، اللہ اور اس کے رسول نے سچ فرمایا۔“ انہوں نے بتایا کہ رسول اللہ صلی اللہ علیہ وسلم نے ہمیں یہ خبر دی تھی کہ ”لیلتہ القدر (رمضان کے) آخری سات ایام کے وسط میں ہوتی ہے، اور اس کی علامت یہ ہے کہ اس کی صبح سورج اس کیفیت میں طلوع ہوتا ہے کہ اس کی شعاع (آنکھوں کو چندھیا دینے والی تیزی) نہیں ہوتی۔“ (ابو عقرب رحمہ اللہ کہتے ہیں) پس میں نے بلندی پر چڑھ کر دیکھا تو سورج کو ویسا ہی پایا جیسا بتایا گیا تھا، جس پر میں نے بھی کہا: ”اللہ اور اس کے رسول نے سچ فرمایا۔“ [مسند أبي يعلى الموصلي/مسند عبد الله بن مسعود/حدیث: 5371]

سیدنا عبداللہ بن مسعود رضی اللہ عنہ سے روایت ہے کہ جب انہوں نے زمین دھنسنے کے ایک واقعہ کے بارے میں سنا تو فرمایا: ”ہم محمد صلی اللہ علیہ وسلم کے صحابہ الٰہی نشانیوں کو باعثِ برکت سمجھتے تھے جبکہ تم لوگ انہیں محض ڈرانے کا ذریعہ خیال کرتے ہو۔ ایک دفعہ ہم رسول اللہ صلی اللہ علیہ وسلم کے ہمراہ تھے اور ہمارے پاس پانی موجود نہ تھا، تو رسول اللہ صلی اللہ علیہ وسلم نے ارشاد فرمایا: ”کسی ایسے شخص کو تلاش کرو جس کے پاس (کچھ) پانی ہو۔“ چنانچہ پانی تلاش کیا گیا اور تھوڑا سا پانی لایا گیا، آپ صلی اللہ علیہ وسلم نے اسے ایک برتن میں انڈیل کر اپنا دستِ مبارک اس میں رکھا تو آپ صلی اللہ علیہ وسلم کی انگلیوں کے درمیان سے پانی کے چشمے ابلنے لگے، پھر آپ صلی اللہ علیہ وسلم نے فرمایا: «حَيَّ عَلَى الطَّهُورِ الْمُبَارَكِ، وَالْبَرَكَةِ مِنَ اللَّهِ» ”اس بابرکت پاکیزہ پانی کی طرف آؤ، اور برکت تو اللہ ہی کی جانب سے ہے۔“ (سیدنا عبداللہ رضی اللہ عنہ فرماتے ہیں کہ) میں نے اس پانی سے اپنا پیٹ بھر لیا، اور لوگوں نے خود بھی سیر ہو کر پیا اور دوسروں کو بھی سیراب کیا۔ سیدنا عبداللہ رضی اللہ عنہ فرماتے ہیں کہ: ”ہم کھانا کھاتے وقت کھانے کے تسبیح پڑھنے کی آواز سنا کرتے تھے۔“ [مسند أبي يعلى الموصلي/مسند عبد الله بن مسعود/حدیث: 5372]

جریر رحمہ اللہ نے منصور رحمہ اللہ سے اسی سند کے ساتھ اسی کے مثل روایت بیان کی ہے، البتہ اس میں انہوں نے علقمہ رحمہ اللہ کا تذکرہ نہیں کیا ہے۔ [مسند أبي يعلى الموصلي/مسند عبد الله بن مسعود/حدیث: 5373]

سیدنا عبداللہ بن مسعود رضی اللہ عنہ سے روایت ہے کہ ہم رسول اللہ صلی اللہ علیہ وسلم کے ساتھ ایک غار میں موجود تھے کہ اسی دوران آپ صلی اللہ علیہ وسلم پر سورہ ﴿وَالْمُرْسَلَاتِ عُرْفًا﴾ نازل ہوئی، چنانچہ ہم براہِ راست آپ صلی اللہ علیہ وسلم کی زبانِ مبارک سے اسے حاصل کر رہے تھے کہ اچانک غار کی ایک جانب سے ایک سانپ نکل آیا، جس پر آپ صلی اللہ علیہ وسلم نے ارشاد فرمایا: ”اسے قتل کر دو۔“ ہم اسے مارنے کے لیے تیزی سے لپکے لیکن وہ ہم سے پہلے ہی بچ نکلنے میں کامیاب ہو گیا، تو آپ صلی اللہ علیہ وسلم نے فرمایا: ”یہ تمہارے شر سے محفوظ کر دیا گیا ہے، جیسا کہ تم اس کے شر سے محفوظ کر دیے گئے ہو۔“ [مسند أبي يعلى الموصلي/مسند عبد الله بن مسعود/حدیث: 5374]

سیدنا عبد اللہ رضی اللہ عنہ سے روایت ہے کہ مجھ سے رسول اللہ صلی اللہ علیہ وسلم نے فرمایا: ”مجھے سورہ نساء پڑھ کر سناؤ“، میں نے عرض کی: کیا میں آپ کو پڑھ کر سناؤں حالانکہ یہ قرآن آپ ہی پر نازل کیا گیا ہے؟ آپ صلی اللہ علیہ وسلم نے ارشاد فرمایا: ”میں اسے اپنے علاوہ کسی دوسرے سے سننا پسند کرتا ہوں“، سیدنا عبد اللہ رضی اللہ عنہ فرماتے ہیں کہ پھر میں نے آپ صلی اللہ علیہ وسلم کے سامنے تلاوت کی یہاں تک کہ جب میں اس آیت ﴿فَكَيْفَ إِذَا جِئْنَا مِنْ كُلِّ أُمَّةٍ بِشَهِيدٍ وَجِئْنَا بِكَ عَلَى هَؤُلَاءِ شَهِيدًا﴾ پر پہنچا تو آپ صلی اللہ علیہ وسلم کی دونوں آنکھوں سے آنسو بہنے لگے۔ [مسند أبي يعلى الموصلي/مسند عبد الله بن مسعود/حدیث: 5375]

سیدنا عبداللہ رضی اللہ عنہ سے روایت ہے کہ انہوں نے فرمایا: ”تم ان شہادتوں (کے دعووں) سے بچو کہ کوئی آدمی یہ کہے کہ فلاں شخص شہید ہو گیا ہے، حالانکہ کوئی آدمی محض قومی حمیت کے لیے لڑتا ہے، کوئی اپنی بہادری کے اظہار کے لیے لڑتا ہے اور اسے خبر تک نہیں ہوتی کہ وہ کس مقصد کے لیے لڑ رہا ہے؟ اور کوئی دنیا کے حصول کے لیے لڑتا ہے؛ میں تمہیں اس کی اصل حقیقت بتاتا ہوں، رسول اللہ صلی اللہ علیہ وسلم نے ایک گروہ کو ایک لشکری مہم پر روانہ فرمایا، ابھی تھوڑی ہی دیر گزری تھی کہ رسول اللہ صلی اللہ علیہ وسلم کھڑے ہوئے، اللہ تعالیٰ کی حمد و ثنا بیان فرمائی اور پھر ارشاد فرمایا: ”تمہارے بھائیوں کا دشمن سے سامنا ہوا تو دشمن نے انہیں (گھیرے میں لے کر) ختم کر دیا اور ان میں سے ایک شخص بھی بچ کر نہ نکل سکا، وہ اپنے رب سے جا ملے تو انہوں نے عرض کی: «رَبَّنَا أَبْلِغْ قَوْمَنَا أَنَّا قَدْ رَضِينَا وَرُضِيَ عَنَّا» ”اے ہمارے رب! ہماری قوم کو یہ پیغام پہنچا دیجیے کہ ہم یقیناً (اپنے مقام سے) راضی ہو گئے ہیں اور ہم سے (ہمارا رب) راضی ہو گیا ہے“، اور میں (نبی) ان کی طرف سے تمہارے پاس ان کا پیغام لایا ہوں کہ وہ راضی ہو گئے ہیں اور ان سے اللہ راضی ہو گیا ہے“، چنانچہ تم صرف ایسے ہی لوگوں کے متعلق (شہادت کی) گواہی دیا کرو۔“ اس روایت کی سند میں ابو عبیدہ رحمہ اللہ کا اپنے والد سیدنا عبداللہ رضی اللہ عنہ سے سماع ثابت نہ ہونے کی وجہ سے انقطاع پایا جاتا ہے۔ [مسند أبي يعلى الموصلي/مسند عبد الله بن مسعود/حدیث: 5376]