حضرت عمر بن خطاب رضی اللہ عنہ نے اپنے ایک گورنر کو خط لکھا کہ مسلمانوں کو وہ طلاء پینے دو جس میں دو تہائی جوس خشک ہو چکا ہو اور ایک تہائی باقی رہ گیا ہو۔ [سنن نسائي/كتاب الأشربة/حدیث: 5718]

حضرت عامر بن عبداللہ رحمہ اللہ سے روایت ہے، انہوں نے کہا کہ میں نے حضرت عمر بن خطاب رضی اللہ عنہ کا حضرت ابو موسیٰ رضی اللہ عنہ کو لکھا ہوا خط پڑھا: حمد و صلاۃ کے بعد میرے پاس شام سے ایک تجارتی قافلہ آیا ہے جن کے پاس سیاہ رنگ کا ایک گاڑھا سا مشروب ہے، جیسے اونٹوں کو ملنے والی گندھک ہوتی ہے۔ میں نے ان سے پوچھا کہ تم اسے کس طرح پکارتے ہو؟ انہوں نے مجھے بتایا کہ ہم اسے دو تہائی خشک ہونے تک پکاتے ہیں۔ اس طرح اس کے دو خبیث اجزاء ختم ہو جاتے ہیں یعنی اس کا نشہ اور اس کی بو (اور باقی خالص اور پاک مٹھاس رہ جاتی ہے)، لہٰذا تم اپنے علاقے کے لوگوں کو ایسا مشروب پینے دو۔ [سنن نسائي/كتاب الأشربة/حدیث: 5719]

حضرت عبداللہ بن یزید خطمی رضی اللہ عنہما سے روایت ہے، انہوں نے کہا کہ حضرت عمر بن خطاب رضی اللہ عنہ نے ہم کو لکھا: حمد و صلاۃ کے بعد تم انگور کے جوس کو اتنا پکاؤ کہ اس میں سے شیطان کا حصہ ختم ہو جائے، دو حصے اس کے ہیں، ایک حصہ تمہارا ہے۔ [سنن نسائي/كتاب الأشربة/حدیث: 5720]

حضرت شعبی سے روایت ہے، انہوں نے کہا کہ حضرت علی رضی اللہ عنہ لوگوں کو وہ طلاء پینے دیتے تھے جس میں اگر مکھی گر جاتی تو نکل نہیں سکتی تھی۔ [سنن نسائي/كتاب الأشربة/حدیث: 5721]

حضرت داود رحمہ اللہ سے روایت ہے، انہوں نے کہا کہ میں نے حضرت سعید بن مسیب رحمہ اللہ سے پوچھا کہ وہ کون سا مشروب تھا جسے حضرت عمر رضی اللہ عنہ نے حلال قرار دیا تھا؟ انہوں نے فرمایا کہ جسے اتنا پکایا جائے کہ وہ دو تہائی خشک ہو جائے اور ایک تہائی رہ جائے۔ [سنن نسائي/كتاب الأشربة/حدیث: 5722]

حضرت سعید بن مسیب رحمہ اللہ نے فرمایا کہ حضرت ابوالدرداء رضی اللہ عنہ وہ طلاء پیتے تھے جس میں سے دو تہائی خشک ہو چکا ہوتا اور ایک تہائی باقی رہ گیا ہوتا۔ [سنن نسائي/كتاب الأشربة/حدیث: 5723]

حضرت ابوموسیٰ اشعری رضی اللہ عنہ سے مروی ہے کہ وہ ایسا طلاء پیتے تھے جس میں سے دو تہائی خشک ہو چکا ہوتا اور ایک تہائی باقی رہ گیا ہوتا۔ [سنن نسائي/كتاب الأشربة/حدیث: 5724]

حضرت یعلیٰ بن عطاء رحمہ اللہ سے روایت ہے کہ ایک اعرابی نے حضرت سعید بن مسیب رحمہ اللہ سے اس مشروب کے بارے میں پوچھا جو نصف خشک ہوچکا ہو؟ تو میں نے ان کو فرماتے سنا: نہیں، حتیٰ کہ دو تہائی خشک ہوجائے اور ایک تہائی باقی رہ جائے۔ [سنن نسائي/كتاب الأشربة/حدیث: 5725]

حضرت سعید بن مسیب رحمہ اللہ نے فرمایا: جب «الطِّلَاءُ» اس طرح پکایا گیا ہو کہ ایک تہائی رہ جائے تو اسے استعمال کرنے میں کوئی حرج نہیں۔ [سنن نسائي/كتاب الأشربة/حدیث: 5726]

حضرت ابورجاء رحمہ اللہ نے فرمایا کہ میں نے حضرت حسن بصری رحمہ اللہ سے اس طلاء کے بارے میں پوچھا جس میں سے نصف خشک ہو چکا ہو؟ تو انہوں نے فرمایا: اسے مت پی۔ [سنن نسائي/كتاب الأشربة/حدیث: 5727]