سیدنا عبداللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: ”جس نے حج اور عمرہ دونوں کا احرام باندھا، اسے (دونوں کے لیے) ایک ہی طواف کافی ہے، پھر وہ دونوں احرام اکٹھے کھولے گا۔“ [المنتقى ابن الجارود/كِتَابُ الْمَنَاسِكِ/حدیث: 460]

سیدنا عبداللہ بن عباس رضی اللہ عنہما بیان کرتے ہیں کہ نبی کریم صلی اللہ علیہ وسلم نے فرمایا: بیت اللہ کا طواف ایک قسم کی نماز ہے، مگر اللہ تعالیٰ نے اس میں تمہارے لیے بولنا جائز رکھا ہے، چنانچہ جو بولے، وہ اچھی بات ہی کرے۔ [المنتقى ابن الجارود/كِتَابُ الْمَنَاسِكِ/حدیث: 461]

سیدہ ام سلمہ رضی اللہ عنہا بیان کرتی ہیں کہ وہ مکہ آئیں تو بیمار تھیں۔ انہوں نے یہ بات نبی کریم صلی اللہ علیہ وسلم کے سامنے ذکر کی، تو آپ نے فرمایا: تم سوار ہو کر لوگوں کے پیچھے پیچھے طواف کرو۔ سیدہ ام سلمہ رضی اللہ عنہا فرماتی ہیں: میں نے نبی کریم صلی اللہ علیہ وسلم کو کعبہ کے پاس سورۃ الطور کی تلاوت کرتے سنا۔ [المنتقى ابن الجارود/كِتَابُ الْمَنَاسِكِ/حدیث: 462]

سیدنا عبداللہ بن عباس رضی اللہ عنہما بیان کرتے ہیں کہ رسول اللہ صلی اللہ علیہ وسلم نے حجۃ الوداع کے موقع پر اونٹ پر سوار ہو کر طواف کیا اور ٹیڑھے سرے والی لکڑی سے رکن (حجر اسود) کو چھوا۔ [المنتقى ابن الجارود/كِتَابُ الْمَنَاسِكِ/حدیث: 463]

سیدنا ابو طفیل رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو اونٹ پر سوار ہو کر طواف کرتے دیکھا۔ آپ اپنی ٹیڑھے سرے والی لکڑی سے ارکان (حجر اسود) کو چھوتے اور اس کے کنارے کو بوسہ دیتے تھے۔ پھر آپ صفا کی طرف تشریف لے گئے اور اونٹ پر سوار ہو کر سات چکر (سعی) کیے۔ [المنتقى ابن الجارود/كِتَابُ الْمَنَاسِكِ/حدیث: 464]

جعفر بن محمد کے والد محمد باقر فرماتے ہیں کہ ہم سیدنا جابر بن عبداللہ رضی اللہ عنہما کے پاس آئے، وہ بنی سلمہ کے محلہ میں تھے، ہم نے ان سے نبی کریم صلی اللہ علیہ وسلم کے حج کے متعلق پوچھا، تو انہوں نے ہمیں بتایا: ”رسول اللہ صلی اللہ علیہ وسلم مدینہ میں نو سال رہے، (لیکن اس عرصہ میں) آپ نے حج نہیں کیا، پھر لوگوں میں اعلان کرایا کہ رسول اللہ صلی اللہ علیہ وسلم اس سال حج کرنے جا رہے ہیں، یہ سن کر بہت سے لوگ مدینہ آ گئے اور ان میں سے ہر ایک کی یہ حسرت تھی کہ وہ رسول اللہ صلی اللہ علیہ وسلم کی اقتدا کرے اور وہی کچھ کرے جو آپ کریں گے، ذیقعدہ کے پانچ دن باقی تھے کہ ہم نبی کریم صلی اللہ علیہ وسلم کے ہمراہ (حج کے لیے) روانہ ہوئے، جب ہم ذوالحلیفہ کے مقام پر پہنچے، تو اسماء بنت عمیس رضی اللہ عنہا نے محمد بن ابی بکر کو جنم دیا، انہوں نے رسول اللہ صلی اللہ علیہ وسلم کے پاس پیغام بھیجا کہ اب میں کیا کروں؟ آپ صلی اللہ علیہ وسلم نے فرمایا: ”غسل کریں اور (شرمگاہ پر) مضبوطی سے کپڑا باندھ کر احرام باندھ لیں۔“ رسول اللہ صلی اللہ علیہ وسلم (مکہ کی طرف) نکلے، حتی کہ جب آپ کی اونٹنی آپ کو لے کر بیداء پر چڑھی، تو آپ صلی اللہ علیہ وسلم نے توحید کا اعلان کیا: «لَبَّيْكَ اللّٰهُمَّ لَبَّيْكَ، لَبَّيْكَ لَا شَرِيكَ لَكَ لَبَّيْكَ، إِنَّ الْحَمْدَ وَالنِّعْمَةَ لَكَ وَالْمُلْكَ لَا شَرِيكَ لَكَ» ”میں حاضر ہوں الہی! میں حاضر ہوں، میں حاضر ہوں تیرا کوئی شریک نہیں میں حاضر ہوں، تمام تعریفیں اور نعمتیں تیرے لیے ہیں اور ہر قسم کی بادشاہت تیرے لیے ہے تیرا کوئی شریک نہیں۔“ لوگ اس میں ذالمعارج وغیرہ کا اضافہ کرتے اور نبی کریم صلی اللہ علیہ وسلم سننے کے باوجود انہیں کچھ نہیں کہہ رہے تھے۔ میں نے تاحد نگاہ رسول اللہ صلی اللہ علیہ وسلم کے آگے پیچھے، دائیں، بائیں سوار اور پیادہ لوگوں کا جم غفیر دیکھا۔ سیدنا جابر رضی اللہ عنہ فرماتے ہیں: رسول اللہ صلی اللہ علیہ وسلم ہمارے درمیان تھے، آپ پر قرآن کا نزول ہوتا تھا، آپ اس کی تاویل و تفسیر جانتے تھے، آپ جو جو عمل کرتے، ہم بھی ویسے ہی کرتے جاتے۔ ہم حج ہی کے ارادے سے نکلے تھے، جب ہم کعبہ پہنچے، تو نبی کریم صلی اللہ علیہ وسلم نے حجر اسود کو بوسہ دیا، پھر تین چکروں میں رمل کیا اور چار چکروں میں معمول کے مطابق چلے، (طواف سے) فارغ ہو کر آپ مقام ابراہیم کے پاس آئے اور اس کے پیچھے دو رکعت ادا کیں، پھر یہ آیت تلاوت کی: ﴿وَاتَّخِذُوا مِنْ مَقَامِ إِبْرَاهِيمَ مُصَلًّى﴾ ”مقام ابراہیم کو جائے نماز بناؤ“۔ میرے والد کہتے ہیں: آپ نے نماز میں سورت اخلاص اور سورت کافرون کی تلاوت کی، پھر حجر اسود کا بوسہ لیا اور صفا کی طرف تشریف لے گئے، پھر یہ آیت تلاوت کی: ﴿إِنَّ الصَّفَا وَالْمَرْوَةَ مِنْ شَعَائِرِ اللَّهِ﴾ ”صفا اور مروہ اللہ کی نشانیوں میں سے ہیں“، پھر فرمایا: ”ہم وہیں سے شروع کریں گے جہاں سے اللہ تعالیٰ نے شروع کیا ہے۔“ آپ صفا پہاڑی پر چڑھ گئے، جب بیت اللہ پر نظر پڑی تو اللہ اکبر کہہ کر یہ دعا پڑھی: «لَا إِلٰهَ إِلَّا اللّٰهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ وَهُوَ عَلَىٰ كُلِّ شَيْءٍ قَدِيرٌ، لَّا إِلٰهَ إِلَّا اللّٰهُ، أَنْجَزَ وَعْدَهُ وَنَصَرَ عَبْدَهُ وَهَزَمَ أَوْ غَلَبَ الْأَحْزَابَ وَحْدَهُ» ”اللہ کے سوا کوئی معبود نہیں وہ یکتا ہے اس کا کوئی شریک نہیں، اسی کی بادشاہت ہے اور تمام تعریفیں اسی کو زیبا ہیں اور وہ ہر چیز پر قادر ہے۔ اللہ کے سوا کوئی معبود نہیں، وہ یکتا ہے۔ اس نے اپنا وعدہ پورا کیا، اپنے بندے کی مدد کی اور تمام جماعتوں کو اکیلے ہی شکست دے دی۔“ پھر دعا مانگی، یہی کلمات دہرائے، پھر دعا مانگی، یہی کلمات دہرائے، پھر آپ اترے یہاں تک کہ جب آپ کے قدم نشیب (اترائی) پر پڑے تو دوڑنے لگے، جب چڑھائی آئی تو معمول کے مطابق چلنے لگے، حتی کہ جب مروہ کے پاس آئے، تو اس پر چڑھ گئے جب بیت اللہ پر نظر پڑی، تو آپ نے مروہ پر بھی وہی کلمات ادا کیے جو صفا پر ادا کیے تھے۔ جب ساتویں چکر میں مروہ پر چڑھے تو فرمایا: ”لوگو! اگر وہ حالات جو مجھے بعد میں معلوم ہوئے پہلے معلوم ہو جاتے، تو میں ہدی (قربانی) کا جانور ساتھ نہ لاتا اور اسے (حج کو) عمرہ میں تبدیل کر دیتا، چنانچہ جس کے پاس ہدی نہیں ہے، وہ احرام کھول دے اور اس (حج) کو عمرہ میں تبدیل کر لے۔“ راوی کہتے ہیں: سب لوگوں نے احرام کھول دیا۔ سراقہ بن جعشم جو کہ مروہ پہاڑی سے نیچے کھڑے تھے، کہنے لگے: اے اللہ کے رسول صلی اللہ علیہ وسلم ! یہ (حکم) اسی سال کے لیے ہے یا ہمیشہ کے لیے ہے؟ کہتے ہیں: رسول اللہ صلی اللہ علیہ وسلم نے اپنی انگلیوں کو ایک دوسرے میں ڈال کر تین مرتبہ فرمایا: ”یہ حکم ہمیشہ کے لیے ہے۔“ پھر فرمایا: ”قیامت کے روز تک عمرہ حج میں داخل ہو گیا ہے۔“ سیدنا علی رضی اللہ عنہ یمن سے قربانی کے جانور لے کر آئے، رسول اللہ صلی اللہ علیہ وسلم بھی مدینہ سے اپنے ساتھ قربانی لائے تھے، اچانک انہوں نے دیکھا کہ سیدہ فاطمہ رضی اللہ عنہا نے احرام کھول کر رنگ دار کپڑے پہنے ہوئے ہیں اور سرمہ بھی لگایا ہوا ہے، سیدنا علی رضی اللہ عنہ نے اس پر اعتراض کیا، تو وہ کہنے لگیں: ”میرے والد محترم نے مجھے یہ حکم دیا ہے۔“ جعفر کہتے ہیں: میرے والد کہتے تھے: یہ (اگلے الفاظ) سیدنا جابر رضی اللہ عنہ نے بیان نہیں کیے۔ سیدنا علی رضی اللہ عنہ کوفہ میں کہا کرتے تھے: میں فاطمہ کی اس بات پر غصہ ظاہر کرنے کے لیے رسول اللہ صلی اللہ علیہ وسلم کے پاس مسئلہ پوچھنے گیا، میں نے کہا: فاطمہ رضی اللہ عنہا نے رنگ دار کپڑے پہن لیے ہیں اور سرمہ بھی لگا لیا ہے اور کہتی ہیں: میرے والد نے مجھے یہ حکم دیا ہے۔ آپ صلی اللہ علیہ وسلم نے فرمایا: ”وہ سچ کہتی ہے، وہ سچ کہتی ہے، وہ سچ کہتی ہے، اسے میں نے ہی حکم دیا تھا۔“ سیدنا جابر رضی اللہ عنہ فرماتے ہیں: آپ صلی اللہ علیہ وسلم نے سیدنا علی رضی اللہ عنہ سے پوچھا: ”آپ نے کیا احرام باندھا ہے؟“ انہوں نے عرض کیا: میں نے گزارش کی تھی: الہی! میں بھی اس چیز کا احرام باندھتا ہوں، جس کا رسول اللہ صلی اللہ علیہ وسلم نے باندھا ہے۔ آپ صلی اللہ علیہ وسلم نے فرمایا: ”میرے پاس تو قربانی کا جانور ہے، لہذا آپ بھی احرام نہ کھولیں۔“ سیدنا جابر رضی اللہ عنہ بیان کرتے ہیں: ہدی کے جتنے جانور سیدنا علی رضی اللہ عنہ یمن سے لائے تھے اور نبی کریم صلی اللہ علیہ وسلم (اپنے ساتھ) لائے تھے، وہ سو تھے، تریسٹھ جانور رسول اللہ صلی اللہ علیہ وسلم نے اپنے ہاتھ سے ذبح کیے اور باقی سیدنا علی رضی اللہ عنہ کو دیے، چنانچہ وہ انہوں نے ذبح کیے اور آپ نے ان کو اپنی ہدی میں شریک کیا، پھر آپ نے ہر اونٹ میں سے کچھ حصہ لینے کا حکم دیا، وہ گوشت ایک ہنڈیا میں ڈالا گیا پھر ان دونوں نے اس کا گوشت کھایا اور شوربہ پیا۔ پھر نبی کریم صلی اللہ علیہ وسلم نے فرمایا: ”میں نے یہاں قربانی کی ہے اور منیٰ پورے کا پورا منحر (قربان گاہ) ہے۔“ آپ صلی اللہ علیہ وسلم نے عرفہ میں وقوف کیا، تو فرمایا: ”میں اس جگہ ٹھہرا ہوں اور عرفہ کا سارا میدان موقف ہے۔“ آپ صلی اللہ علیہ وسلم نے مزدلفہ میں وقوف کیا، تو فرمایا: ”میں اس جگہ ٹھہرا ہوں اور مزدلفہ سارا ہی موقف ہے۔“ [المنتقى ابن الجارود/كِتَابُ الْمَنَاسِكِ/حدیث: 465]

سیدہ عائشہ رضی اللہ عنہا بیان کرتی ہیں کہ ہم صرف حج کے ارادے سے نکلے تھے۔ جب ہم سرف پہنچے تو میں حائضہ ہو گئی۔ رسول اللہ صلی اللہ علیہ وسلم میرے پاس تشریف لائے تو میں رو رہی تھی۔ آپ نے پوچھا: کیا تم حائضہ ہو گئی ہو؟ میں نے کہا: ہاں۔ آپ نے فرمایا: یہ ایسی چیز ہے جو اللہ تعالیٰ نے بنات آدم (خواتین) کے لیے مقدر کی ہے۔ تم وہ سب کرو جو محرم کرتا ہے، سوائے اس کے کہ بیت اللہ کا طواف نہ کرو۔ [المنتقى ابن الجارود/كِتَابُ الْمَنَاسِكِ/حدیث: 466]

سیدنا عروہ بن مضرس رضی اللہ عنہ کہتے ہیں کہ میں نبی کریم صلی اللہ علیہ وسلم کے پاس مزدلفہ میں آیا۔ میں نے عرض کیا: میں آپ کے پاس طے کے پہاڑوں سے آیا ہوں، میں نے اپنی سواری کو تھکا دیا اور ہر پہاڑ پر وقوف کیا۔ (کیا میرا حج ہو گیا؟) آپ نے فرمایا: جس نے ہمارے ساتھ یہ نماز (مغرب و عشاء) ادا کی اور رات یا دن کو عرفہ میں وقوف کیا، اس نے اپنی میل کچیل دور کر لی اور اس کا حج مکمل ہو گیا۔ [المنتقى ابن الجارود/كِتَابُ الْمَنَاسِكِ/حدیث: 467]

سیدنا عبدالرحمن بن یعمر دیلی رضی اللہ عنہ بیان کرتے ہیں کہ میں نے نبی کریم صلی اللہ علیہ وسلم سے سنا، آپ نے تین مرتبہ فرمایا: وقوف عرفات ہی حج ہے، جس نے طلوع فجر سے پہلے عرفہ پالیا، اس نے حج پالیا۔ [المنتقى ابن الجارود/كِتَابُ الْمَنَاسِكِ/حدیث: 468]

ابو جعفر محمد بن علی باقر رحمہ اللہ بیان کرتے ہیں کہ میں نے سیدنا جابر بن عبداللہ رضی اللہ عنہما کے پاس آکر کہا: ”مجھے نبی کریم صلی اللہ علیہ وسلم کے حج کے متعلق بتائیں“، تو انہوں نے انگلیوں پر نو (9) تک گنا، پھر فرمایا: ”رسول اللہ صلی اللہ علیہ وسلم مدینہ میں نو سال رہے، (لیکن اس عرصہ میں) حج نہیں کیا، پھر دسویں سال لوگوں میں اعلان کرایا کہ رسول اللہ صلی اللہ علیہ وسلم حج کرنے جا رہے ہیں“، یہ سن کر بہت سے لوگ مدینہ میں جمع ہو گئے اور ہر ایک کی یہ حسرت تھی کہ وہ رسول اللہ صلی اللہ علیہ وسلم کی اقتدا کرے اور آپ کے عمل کے مطابق عمل کرے، رسول اللہ صلی اللہ علیہ وسلم (حج کے لیے) نکلے، تو ہم بھی آپ کے ہمراہ روانہ ہوئے، جب ہم ذوالحلیفہ کے مقام پر پہنچے تو اسماء بنت عمیس رضی اللہ عنہا نے محمد بن ابی بکر کو جنم دیا۔ انہوں نے رسول اللہ صلی اللہ علیہ وسلم کے پاس پیغام بھیجا کہ اب میں کیا کروں؟ فرمایا: ”غسل کریں اور (شرمگاہ پر) مضبوطی سے کپڑا باندھ کر احرام باندھ لیں“، رسول اللہ صلی اللہ علیہ وسلم نے مسجد میں نماز پڑھی پھر قصواء (اونٹنی) پر سوار ہوئے حتی کہ جب آپ کی اونٹنی آپ کو لے کر بیداء پر چڑھی، تو میں نے تاحد نگاہ رسول اللہ صلی اللہ علیہ وسلم کے آگے، پیچھے، دائیں، بائیں سوار اور پیادہ لوگوں کا جم غفیر دیکھا۔ رسول اللہ صلی اللہ علیہ وسلم ہمارے درمیان میں تھے، آپ پر قرآن کا نزول ہوتا تھا، آپ اس کی تاویل و تفسیر جانتے تھے، آپ جو جو عمل کرتے ہم بھی ویسے ہی کرتے جاتے۔ آپ صلی اللہ علیہ وسلم نے توحید کا اعلان کیا: «لَبَّيْكَ اللّٰهُمَّ لَبَّيْكَ، لَبَّيْكَ لَا شَرِيكَ لَكَ لَبَّيْكَ، إِنَّ الْحَمْدَ وَالنِّعْمَةَ لَكَ وَالْمُلْكَ لَا شَرِيكَ لَكَ» ”میں حاضر ہوں الہی! میں حاضر ہوں، میں حاضر ہوں تیرا کوئی شریک نہیں میں حاضر ہوں، تمام تعریفیں اور نعمتیں تیرے لیے ہیں اور ہر قسم کی بادشاہت تیرے لیے ہے تیرا کوئی شریک نہیں“ اور لوگوں نے بھی تلبیہ کہا، وہ بھی تلبیہ کہتے تھے (یعنی لوگوں نے کچھ الفاظ کا اضافہ کیا) لیکن رسول اللہ صلی اللہ علیہ وسلم نے کسی کا انکار نہیں کیا (منع نہیں کیا) اور رسول اللہ صلی اللہ علیہ وسلم تلبیہ کہتے رہے۔ سیدنا جابر رضی اللہ عنہ کہتے ہیں کہ ہم حج ہی کے ارادے سے نکلے تھے، ہمیں عمرے کے متعلق کچھ معلوم نہیں تھا، یہاں تک کہ جب ہم آپ کے ساتھ بیت اللہ میں آئے، تو آپ صلی اللہ علیہ وسلم نے حجر اسود کو بوسہ دیا، تین چکروں میں رمل کیا اور چار میں معمول کے مطابق چلے، پھر مقام ابراہیم کی طرف تشریف لائے تو یہ آیت تلاوت کی: ﴿وَاتَّخِذُوا مِنْ مَقَامِ إِبْرَاهِيمَ مُصَلًّى﴾ ”مقام ابراہیم کو جائے نماز بناؤ“ آپ نے مقام ابراہیم کو اپنے اور بیت اللہ کے درمیان کیا، جعفر بن محمد کہتے ہیں: میرے والد بیان کرتے تھے: مجھے تو یہی معلوم ہے کہ انہوں نے نبی کریم صلی اللہ علیہ وسلم سے ہی بیان کیا ہے کہ آپ دو رکعتوں میں سورت اخلاص اور سورت کافرون پڑھتے تھے، پھر بیت اللہ کی طرف پلٹے اور حجر اسود کا بوسہ لیا پھر دروازے سے صفا کی طرف نکل گئے، جب صفا کے قریب پہنچے، تو یہ آیت اور دعا پڑھی: ﴿إِنَّ الصَّفَا وَالْمَرْوَةَ مِنْ شَعَائِرِ اللَّهِ﴾ ”صفا اور مروہ اللہ کی نشانیوں میں سے ہیں“ «أَبْدَأُ بِمَا بَدَأَ اللّٰهُ بِهِ» ”میں وہیں سے (سعی) شروع کرتا ہوں، جہاں سے اللہ تعالیٰ نے شروع کیا ہے۔“ آپ نے صفا سے ابتدا کی اور اس پر چڑھ گئے، جب بیت اللہ پر نظر پڑی تو اللہ تعالیٰ کی بڑائی اور توحید بیان کی اور فرمایا: «لَا إِلٰهَ إِلَّا اللّٰهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ يُحْيِي وَيُمِيتُ وَهُوَ عَلَى كُلِّ شَيْءٍ قَدِيرٌ، لَّا إِلٰهَ إِلَّا اللّٰهُ وَحْدَهُ، أَنْجَزَ وَعْدَهُ وَنَصَرَ عَبْدَهُ وَهَزَمَ الْأَحْزَابَ وَحْدَهُ» ”اللہ کے سوا کوئی معبود نہیں، وہ یکتا ہے، اس کا کوئی شریک نہیں، اسی کی بادشاہت ہے اور تمام تعریفیں اسی کو زیبا ہیں، وہی زندہ کرتا اور مارتا ہے اور وہ ہر چیز پر قادر ہے۔ اللہ کے سوا کوئی معبود نہیں، وہ یکتا ہے۔ اس نے اپنا وعدہ پورا کیا، اپنے بندے کی مدد کی اور تمام جماعتوں کو اکیلے ہی شکست دے دی“ پھر اس (سعی) کے درمیان دعا مانگی اور یہی کلمات تین مرتبہ دہرائے، پھر آپ مروہ کی طرف اتر گئے، یہاں تک کہ جب آپ کے قدم نشیب (اترائی) پر پڑے، تو وادی کے درمیان تیز دوڑنے لگے، جب ہم چڑھائی پر آتے تو معمول کے مطابق چلنے لگتے حتی کہ مروہ پر چڑھ کر بھی آپ نے ویسے ہی کیا جیسے صفا پر کیا تھا حتی کہ جب (سعی کے) آخری چکر میں مروہ پر چڑھے تو فرمایا: ”اگر وہ حالات جو مجھے بعد میں معلوم ہوئے، پہلے معلوم ہو جاتے، تو میں ہدی (قربانی) کا جانور ساتھ نہ لاتا اور اسے (حج کو) عمرہ میں تبدیل کر دیتا، چنانچہ آپ میں سے جس کے پاس ہدی نہیں ہے وہ احرام کھول دے اور اس (حج) کو عمرہ میں تبدیل کر لے۔“ نبی کریم صلی اللہ علیہ وسلم اور جن کے پاس ہدی کے جانور تھے ان کے سوا سب لوگوں نے احرام کھول دیا اور بال کترائے۔ سیدنا سراقہ بن جعشم رضی اللہ عنہ کھڑے ہو کر کہنے لگے: اے اللہ کے رسول! یہ (حکم) اسی سال کے لیے ہے یا ہمیشہ کے لیے ہے؟ رسول اللہ صلی اللہ علیہ وسلم نے ایک ہاتھ کی انگلیاں دوسرے ہاتھ کی انگلیوں میں ڈال کر دو مرتبہ فرمایا: ”عمرہ حج میں اس طرح داخل ہو گیا ہے، یہ حکم ہمیشہ ہمیشہ کے لیے ہے۔“ راوی کہتے ہیں: سیدنا علی رضی اللہ عنہ یمن سے نبی کریم صلی اللہ علیہ وسلم کے قربانی کے اونٹ لے کر آئے، تو سیدہ فاطمہ رضی اللہ عنہا کو دیکھا کہ انہوں نے کنگھی کی ہوئی ہے، رنگ دار کپڑے پہنے ہوئے ہیں اور سرمہ بھی لگا رکھا ہے، سیدنا علی رضی اللہ عنہ نے ان پر اعتراض کیا، تو کہنے لگیں: ”میرے والد محترم نے مجھے یہ حکم دیا ہے۔“ سیدنا جابر رضی اللہ عنہ بیان کرتے ہیں کہ سیدنا علی رضی اللہ عنہ کہا کرتے تھے: سیدہ فاطمہ رضی اللہ عنہا کے اس فعل پر غصہ ظاہر کرنے کے لیے میں رسول اللہ صلی اللہ علیہ وسلم کی خدمت میں حاضر ہوا تاکہ وہ بات دریافت کر سکوں، جو انہوں نے رسول اللہ صلی اللہ علیہ وسلم کی طرف منسوب کی ہے اور میں نے اس پر اعتراض کیا ہے، تو آپ صلی اللہ علیہ وسلم نے فرمایا: ”وہ سچ کہتی ہیں، وہ سچ کہتی ہیں۔ آپ نے جب احرام باندھا تھا، کیا نیت کی تھی؟“ عرض کیا: میں نے التجا کی تھی: الہی! میں بھی اسی کا احرام باندھتا ہوں جس کا تیرے رسول صلی اللہ علیہ وسلم نے باندھا ہے، آپ صلی اللہ علیہ وسلم نے فرمایا: ”میرے پاس تو قربانی کا جانور ہے، آپ بھی احرام نہ کھولیں۔“ ہدی کے جتنے جانور سیدنا علی رضی اللہ عنہ یمن سے لائے تھے اور نبی کریم صلی اللہ علیہ وسلم مدینہ سے لائے تھے ان کی تعداد سو تھی، نبی کریم صلی اللہ علیہ وسلم اور جن کے پاس ہدی کے جانور تھے، ان کے سوا سب لوگوں نے احرام کھول دیے اور بال کترائے۔ جب ترویہ (آٹھ ذوالحجہ) کا دن تھا، تو وہ منیٰ کی طرف متوجہ ہوئے (منیٰ کا رخ کیا) اور حج کا احرام باندھا، رسول اللہ صلی اللہ علیہ وسلم سوار ہوئے اور منیٰ میں ظہر، عصر، مغرب اور عشا کی نماز پڑھی (اگلے روز) نماز فجر پڑھ کر تھوڑی دیر انتظار کیا حتی کہ سورج طلوع ہو گیا، آپ نے نمرہ میں بالوں سے بنا ہوا خیمہ لگانے کا حکم دیا، لگا دیا گیا، رسول اللہ صلی اللہ علیہ وسلم نے منیٰ سے چلنا شروع کر دیا، قریش کو یقین تھا کہ جس طرح دور جاہلیت میں قریش کیا کرتے تھے، رسول اللہ صلی اللہ علیہ وسلم بھی مزدلفہ میں مشعر حرام کے پاس قیام فرمائیں گے لیکن رسول اللہ صلی اللہ علیہ وسلم وہاں سے گزر کر عرفات کے مقام پر پہنچے تو آپ صلی اللہ علیہ وسلم نے دیکھا کہ نمرہ کے مقام پر ایک خیمہ نصب کیا ہوا ہے، آپ نے وہیں پڑاؤ کیا، یہاں تک کہ جب سورج ڈھل گیا، تو آپ نے قصواء نامی اونٹنی منگوائی، اس پر زین سجائی گئی تو آپ اس پر سوار ہو کر بطن وادی میں تشریف لائے۔ آپ صلی اللہ علیہ وسلم نے لوگوں سے خطاب فرمایا: ”تمہارے خون اور تمہارے مال تم پر ایسے ہی حرام ہیں جس طرح تمہارے آج کے دن کی، اس ماہ اور اس شہر میں حرمت ہے۔ سن لیں! زمانہ جاہلیت کے تمام امور میرے ان قدموں تلے ہیں (یعنی آج سے معطل ہیں) جاہلیت کے خون بھی میرے ان قدموں تلے ہیں، سب سے پہلا خون جسے میں معاف کرتا ہوں وہ ہمارے خاندان کے ربیعہ بن حارث کے بیٹے کا خون ہے، وہ بنو سعد میں دودھ پیتا بچہ تھا، ہذیل (قبیلہ) نے اسے قتل کر دیا۔ زمانہ جاہلیت کا سود موقوف کر دیا گیا ہے اور سب سے پہلے میں اپنے خاندان کے عباس بن عبدالمطلب کا سود ختم کرتا ہوں چنانچہ وہ سب ختم کر دیا گیا ہے۔ خواتین کے حقوق کے متعلق اللہ تعالیٰ سے ڈرتے رہنا، کیوں کہ تم نے اللہ کی امانت کے طور پر انہیں (اپنے عقد میں) لیا ہے، اللہ کے کلمہ (نکاح) کے ذریعے تم نے ان کی شرمگاہوں کو حلال کیا ہے (یعنی انہیں بیویاں بنایا ہے) تمہارے ان پر حقوق یہ ہیں کہ وہ آپ کے کسی بھی ناپسندیدہ شخص کو گھر میں آنے کی اجازت نہ دیں، اگر وہ حکم عدولی کریں تو پھر اس انداز میں مارو کہ نشان نہ پڑیں اور دستور کے مطابق ان کے نان ونفقہ (اخراجات) کی ذمہ داری تمہارے ذمہ ہے۔ میں تمہیں کتاب اللہ دے کر جارہا ہوں اگر تم اس کو تھامے رکھو گے (اس پر عمل پیرا ہو گے) تو اس کے بعد کبھی گمراہ نہ ہو گے۔ آپ سے میرے متعلق پوچھا جائے گا، تو آپ کیا جواب دیں گے؟“ انہوں نے کہا: ہم گواہی دیں گے کہ آپ نے اپنے رب کے پیغامات پہنچا دیے تھے، اپنی امت کی خیر خواہی کی تھی اور اپنی ذمہ داری سے عہدہ برآ ہو گئے۔ آپ نے شہادت کی انگلی کو آسمان کی طرف اٹھایا اور پھر لوگوں کی طرف اشارہ کرتے ہوئے فرمایا: ”الہی! گواہ رہنا، الہی! گواہ رہنا۔“ پھر سیدنا بلال رضی اللہ عنہ نے اذان دی، اقامت (تکبیر) کہی، آپ نے نماز ظہر ادا کی پھر اقامت کہی تو نماز عصر ادا کی اور آپ نے ان دونوں (نمازوں) کے درمیان کچھ (نفل وغیرہ) نہیں پڑھا۔ پھر قصواء اونٹنی پر سوار ہو کر میدان عرفات میں آئے تو اپنی قصواء اونٹنی کے پیٹ کو چٹانوں کی طرف کیا اور حبل مشاۃ (ایک جگہ کا نام یا ٹیلہ وغیرہ) کو اپنے سامنے رکھا اور سورج غروب ہونے تک قبلہ کی طرف منہ کر کے کھڑے رہے حتی کہ زردی بھی تھوڑی سی غائب ہونے لگی، جب سورج مکمل طور پر غروب ہو گیا تو آپ صلی اللہ علیہ وسلم نے سیدنا اسامہ رضی اللہ عنہ کو اپنے پیچھے سوار کیا اور سفر شروع کر دیا، آپ صلی اللہ علیہ وسلم نے اونٹ کی نکیل کو اس طرح کھینچا کہ اس (اونٹنی) کا سر پالان کے اگلے سرے سے آلگا۔ آپ اپنے داہنے ہاتھ سے اشارہ کر کے فرما رہے تھے: ”آرام سے چلیں۔“ جہاں کہیں ریت کا ٹیلہ یا پہاڑ (چڑھائی) آتا تو آپ نکیل ڈھیلی کر دیتے تاکہ وہ چڑھ جائے۔ (اسی طرح) آپ مزدلفہ پہنچ گئے تو آپ نے ایک اذان اور دو تکبیروں کے ساتھ مغرب اور عشا کو جمع کیا، پھر طلوع فجر تک رسول اللہ صلی اللہ علیہ وسلم لیٹے رہے جب فجر طلوع ہوئی، تو آپ نے فجر کی نماز پڑھی۔ ابن یحییٰ کہتے ہیں حسن بن بشیر نے جابر کی روایت میں اس جگہ کہا تھا: اذان اور اقامت کے ساتھ، جب کہ نفیلی نے یہ الفاظ ذکر نہیں کیے۔ پھر آپ قصواء پر سوار ہو کر مشعر حرام تشریف لائے، تو اس پر چڑھے اور «الحمد لله، الله اكبر، لا اله الا الله» پڑھا، خوب روشنی ہونے تک آپ نے وہیں وقوف کیا۔ پھر سورج طلوع ہونے سے پہلے رسول اللہ صلی اللہ علیہ وسلم وہاں سے روانہ ہوئے، فضل بن عباس کو پیچھے سوار کر لیا، جو حسین بالوں، سفید رنگت اور خوبصورت چہرے والے شخص تھے، جب رسول اللہ صلی اللہ علیہ وسلم روانہ ہوئے، تو فضل ان عورتوں کو دیکھنے لگے جو ہودجوں میں بیٹھی جارہی تھیں، رسول اللہ صلی اللہ علیہ وسلم نے فضل کے چہرے پر اپنا ہاتھ رکھ دیا اور فضل نے اپنا چہرہ دوسری طرف پھیر لیا۔ رسول اللہ صلی اللہ علیہ وسلم نے اس طرف اپنا ہاتھ رکھا، تو فضل نے اپنا چہرہ دوسری طرف پھیر لیا، وہ انہیں دیکھے جارہے تھے، یہاں تک کہ جب وادی محسر میں پہنچے، تو آپ نے سواری کو تھوڑا سا تیز کیا۔ پھر اس درمیانی راستہ کو اختیار کیا جو جمرہ کبریٰ تک پہنچاتا ہے۔ درخت کے پاس والے جمرے پر پہنچ کر آپ نے سات کنکریاں ماریں، ہر کنکری کے ساتھ اللہ اکبر کہتے تھے۔ آپ نے ایسی کنکریاں ماریں جو انگلی کے سرے پر رکھ کر پھینکی جاتی ہیں، آپ نے وادی کے وسط سے کنکریاں ماریں، پھر قربان گاہ کی طرف آئے اور تریسٹھ اونٹ اپنے ہاتھ سے ذبح کیے، باقی اونٹ ذبح کرنے کے لیے سیدنا علی رضی اللہ عنہ کو حکم دیا، تو انہوں نے ذبح کیے، آپ نے انہیں (سیدنا علی رضی اللہ عنہ) اپنی ہدی میں شریک کیا، پھر ہر اونٹ میں سے کچھ حصہ لینے کا حکم دیا، چنانچہ وہ ہنڈیا میں ڈال کر پکایا گیا، تو دونوں نے اس کا گوشت کھایا اور شوربہ پیا۔ پھر رسول اللہ صلی اللہ علیہ وسلم بیت اللہ کی طرف پلٹے اور مکہ میں ظہر کی نماز ادا کی۔ پھر آپ بنو عبدالمطلب کے پاس تشریف لائے، جو آب زمزم پلا رہے تھے۔ آپ صلی اللہ علیہ وسلم نے فرمایا: ”بنو عبدالمطلب! پانی نکالیں، اگر مجھے یہ خطرہ نہ ہوتا کہ لوگ پانی پلانے کے سلسلہ میں آپ پر غالب آجائیں گے، تو میں بھی آپ کے ساتھ پانی نکالتا۔“ انہوں نے آپ کو پانی پیش کیا، تو آپ نے نوش فرمایا۔ [المنتقى ابن الجارود/كِتَابُ الْمَنَاسِكِ/حدیث: 469]