حضرت ابن عمر رضی اللہ عنہما سے روایت ہے۔ وہ کہتے ہیں کہ جناب نبی کریم صلی اللہ علیہ وآلہ وسلم نے چاندی کی انگوٹھی بنوائی اور اس پر نقش کیا ”محمد رسول اللہ“ پھر فرمایا: ”کوئی شخص میری اس انگوٹھی کے نقش پر نقش نہ بنائے۔“ [مصنف ابن ابي شيبه/كتاب اللباس/حدیث: 26728]

حضرت انس سے روایت ہے۔ وہ کہتے ہیں کہ جناب رسول اللہ صلی اللہ علیہ وآلہ وسلم نے ایک انگوٹھی بنوائی پھر آپ صلی اللہ علیہ وآلہ وسلم نے فرمایا: ”ہم نے ایک انگوٹھی بنوائی ہے اور اس میں ہم ایک نقش بھی نقش کروایا ہے پس کوئی اس جیسا نقش نہ کروائے۔“ [مصنف ابن ابي شيبه/كتاب اللباس/حدیث: 26729]

حضرت موسیٰ بن عبد اللہ، اپنی والدہ سے حضرت حذیفہ رضی اللہ عنہ کے بارے میں روایت کرتے ہیں۔ وہ کہتی ہیں کہ حضرت حذیفہ رضی اللہ عنہ کی انگوٹھی میں آمنے سامنے دو سارس بنی ہوئی تھیں۔ ان کے درمیان الحمد للّٰہ لکھا ہوا تھا۔ [مصنف ابن ابي شيبه/كتاب اللباس/حدیث: 26730]

حضرت محمد اور حضرت حسن دونوں سے روایت ہے۔ یہ کہتے ہیں کہ جناب نبی کریم صلی اللہ علیہ وآلہ وسلم کی انگوٹھی کا نقش ”محمد رسول اللّٰہ“ تھا۔ [مصنف ابن ابي شيبه/كتاب اللباس/حدیث: 26731]

حضرت محمد سے روایت ہے۔ وہ کہتے ہیں کہ حضرت انس کی انگوٹھی کا نقش یوں تھا۔ شیر حملہ کر رہا تھا اور اس کے ارد گرد چیر پھاڑ کیے ہوئے شکار تھے۔ [مصنف ابن ابي شيبه/كتاب اللباس/حدیث: 26732]

حضرت محمد سے روایت ہے کہ حضرت اشعری کی انگوٹھی کا نقش یہ تھا۔ دو آدمیوں کے درمیان ایک شیر تھا۔ [مصنف ابن ابي شيبه/كتاب اللباس/حدیث: 26733]

حضرت ابراہیم بن عطاء، اپنے والد سے روایت کرتے ہیں۔ کہتے ہیں کہ حضرت عمران بن حصین کی انگوٹھی کا نقش ایک تلوار لٹکایا ہوا شخص تھا۔ حضرت ابراہیم کہتے ہیں۔ پس میں نے یہ نقش اپنے ہاں موجود مٹی میں ایک انگوٹھی پر دیکھا۔ میرے والد نے کہا۔ یہ حضرت عمران بن حصین کی انگوٹھی ہے۔ [مصنف ابن ابي شيبه/كتاب اللباس/حدیث: 26734]

حضرت معتمر، اپنے والد سے روایت کرتے ہیں کہ انہوں نے فرمایا: حضرت ابو عبیدہ بن جراح کی انگوٹھی میں نقش تھا۔ الخمس لِلّٰہ۔ خُمس اللہ کا ہے۔ [مصنف ابن ابي شيبه/كتاب اللباس/حدیث: 26735]

حضرت مجاہد سے روایت ہے۔ وہ کہتے ہیں کہ حضرت عبد اللہ بن عمر رضی اللہ عنہما کی انگوٹھی میں عبد اللہ بن عمر رضی اللہ عنہما (لکھا ہوا) تھا۔ [مصنف ابن ابي شيبه/كتاب اللباس/حدیث: 26736]

حضرت ابراہیم سے روایت ہے۔ وہ کہتے ہیں کہ حضرت ابو عبیدہ بن جراح کی انگوٹھی میں الحمد لِلّٰہ تھا۔ [مصنف ابن ابي شيبه/كتاب اللباس/حدیث: 26737]