حضرت ربعی فرماتے ہیں کہ بنو عامر کے ایک شخص نے مجھ سے بیان کیا کہ اس نے نبی کریم صلی اللہ علیہ وآلہ وسلم سے اجازت طلب کی اس حال میں کہ آپ صلی اللہ علیہ وآلہ وسلم گھر میں تھے، اس شخص نے کہا: کیا میں آجاؤں؟ نبی کریم صلی اللہ علیہ وآلہ وسلم نے اپنے خادم سے کہا: اس کے پاس جاؤ اور اس کو اجازت طلب کرنے کا طریقہ سکھلاؤ۔ اس کو کہو کہ یوں کہے: السلام علیکم، کیا میں داخل ہو جاؤں؟ اس آدمی نے یہ سن لیا اور کہا: السلام علیکم: کیا میں داخل ہو جاؤں؟ پس نبی کریم صلی اللہ علیہ وآلہ وسلم نے اسے داخل ہونے کی اجازت دے دی اور وہ داخل ہوگیا۔ [مصنف ابن ابي شيبه/ كتاب الأدب/حدیث: 27330]

حضرت عامر بن عبد اللہ بن زبیر فرماتے ہیں کہ حضرت ریحانہ نے بیان فرمایا: کہ میرے گھر والوں نے مجھے حضرت عمر کے پاس بھیجا، تو میں آپ کے پاس بغیر اجازت کے داخل ہوگئی۔ آپ نے مجھے اجازت کا طریقہ سکھلایا اور فرمایا: باہر جاؤ پھر سلام کرو اور جب تمہیں سلام کا جواب دیا جائے تو پھر اجازت مانگو۔ [مصنف ابن ابي شيبه/ كتاب الأدب/حدیث: 27331]

حضرت ابو ایوب انصاری فرماتے ہںَ کہ ہم لوگوں نے عرض کیا: اے اللہ کے رسول (صلی اللہ علیہ وآلہ وسلم)! یہ تو سلام کرنا ہے پس اجازت کیسے طلب کی جائے گی؟ آپ صلی اللہ علیہ وآلہ وسلم نے فرمایا: آدمی سبحان اللہ، اللہ اکبر، الحمد للہ کہہ لے اور کھنکھار لے اور گھر والوں کو اجازت دے۔ [مصنف ابن ابي شيبه/ كتاب الأدب/حدیث: 27332]

حضرت زید بن اسلم فرماتے ہیں کہ میرے والد نے مجھے حضرت ابن عمر رضی اللہ عنہما کے پاس بھیجا تو میں نے ان کو کہا: کیا میں آجاؤں؟ آپ نے فرمایا: تم اس طرح مت کہو اور یوں کہو: السلام علیکم: جب تمہیں کہہ دیا جائے، وعلیکم السلام، تو تم داخل ہو جاؤ۔ [مصنف ابن ابي شيبه/ كتاب الأدب/حدیث: 27333]

حضرت عبد اللہ بن نجی فرماتے ہیں کہ حضرت علی رضی اللہ عنہ نے ارشاد فرمایا: نبی کریم صلی اللہ علیہ وآلہ وسلم کے پاس میں دو مرتبہ جاتا تھا۔ ایک مرتبہ دن میں اور ایک مرتبہ رات میں، پس میں جب آپ صلی اللہ علیہ وآلہ وسلم کے پاس آتا اور آپ صلی اللہ علیہ وآلہ وسلم نماز پڑھ رہے ہوتے، تو آپ صلی اللہ علیہ وآلہ وسلم میرے لیے کھنکھار دیتے۔ [مصنف ابن ابي شيبه/ كتاب الأدب/حدیث: 27334]

حضرت یزید بن ابی زیاد فرماتے ہیں کہ میں نے حضرت عبد الرحمن بن ابی لیلیٰ سے اجازت مانگی اس حال میں کہ وہ اندھیرے میں نماز پڑھ رہے تھے، تو آپ نے میرے لیے دروازہ کھول دیا۔ [مصنف ابن ابي شيبه/ كتاب الأدب/حدیث: 27335]