حضرت خلید العصری رحمہ اللہ فرماتے ہیں کہ جب حضرت سلمان رضی اللہ عنہ ہمارے ہاں تشریف لائے تو ہم لوگ ان کی خدمت میں آئے تاکہ ہم ان سے قرآن مجید پڑھیں۔ آپ رضی اللہ عنہ نے فرمایا: یقینا قرآن عربی ہے۔ پس تم لوگ اس کو کسی عربی سے پڑھو۔ تو حضرت زید بن صوحان رحمہ اللہ ہمیں پڑھایا کرتے تھے۔ جب وہ کوئی غلطی کرتے تو حضرت سلمان رضی اللہ عنہان کو غلطی پر پکڑ لیتے۔ اور جب وہ درست کرلیتے تو آپ رضی اللہ عنہ فرماتے: اللہ کی قسم! ایسے ہی ہے۔ [مصنف ابن ابي شيبه/كتاب الفضائل/حدیث: 34647]

حضرت مغیرہ فرماتے ہیں کہ حضرت ابراہیم رحمہ اللہ نے ارشاد فرمایا: کہ رسول اللہ صلی اللہ علیہ وسلم نے غزوہ بدر کے دن ایک عربی کا فدیہ چالیس اوقیہ مقرر فرمایا: اور ایک غلام کا فدیہ بیس اوقیہ مقرر فرمایا۔ اور ایک اوقیہ چالیس درہم کا ہوتا ہے۔ [مصنف ابن ابي شيبه/كتاب الفضائل/حدیث: 34648]

حضرت خرشہ رحمہ اللہ فرماتے ہیں کہ حضرت عمر رضی اللہ عنہ نے ارشاد فرمایا: عرب کی ہلاکت ہوگی جب فارس کی لڑکیوں کی اولاد بالغ ہوجائے گی۔ [مصنف ابن ابي شيبه/كتاب الفضائل/حدیث: 34649]

حضرت عثمان بن عفان رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جو شخص اہل عرب کو دھوکہ دے گا وہ میری شفاعت میں داخل نہیں ہوگا۔ اور نہ ہی میری محبت پائے گا۔ [مصنف ابن ابي شيبه/كتاب الفضائل/حدیث: 34650]

حضرت مستظل بن حصین رحمہ اللہ فرماتے ہیں کہ حضرت عمر بن خطاب رضی اللہ عنہ ہم سے خطاب فرما رہے تھے آپ رضی اللہ عنہ نے فرمایا: ربِ کعبہ کی قسم! تحقیق مجھے معلوم ہے کہ اہل عرب کب ہلاک ہوں گے؟ مسلمانوں میں سے ایک آدمی نے کھڑے ہو کر پوچھا: اے امیر المؤمنین: یہ لوگ کب ہلاک ہوں گے؟ آپ رضی اللہ عنہ نے فرمایا: جب اس کا معاملہ وہ شخص سنبھالے گا جس نے نہ جاہلیت میں کبھی کوئی تدبیر وغیرہ کی اور نہ ہی رسول اللہ صلی اللہ علیہ وسلم کی صحبت اختیار کی ہو۔ [مصنف ابن ابي شيبه/كتاب الفضائل/حدیث: 34651]

حضرت حصین مزنی رحمہ اللہ فرماتے ہیں کہ حضرت عمر بن خطاب رضی اللہ عنہ نے ارشاد فرمایا: بیشک اہل عرب کی مثال اس اونٹ کی سی ہے جو شریف ہو اور اپنے چلانے والے کا تابع ہو۔ پس ان کے قائد کو چاہیے کہ وہ دیکھے کہ وہ ان کی کس طرف راہنمائی کر رہا ہے۔ باقی رہا میں تو رب کعبہ کی قسم! میں ضرور بالضرور ان کو سیدھے راستہ پر ڈالوں گا۔ [مصنف ابن ابي شيبه/كتاب الفضائل/حدیث: 34652]

حضرت قیس رحمہ اللہ فرماتے ہیں کہ حضرت عمرو بن معد یکرب رحمہ اللہ قادسیہ کے دن ہمارے پاس سے گزرے اس حال میں کہ ہم صفوں میں تھے، آپ رضی اللہ عنہ نے فرمایا: اے گروہ عرب! تم لوگ سخت حملہ کرنے والے شیر بن جاؤ۔ بیشک شیر تو اپنی حالت سے بےپروا ہوتا ہے۔ بیشک ایرانی تو اس ہرن کی طرح ہیں جس کو نیزہ لگ چکا ہو۔ [مصنف ابن ابي شيبه/كتاب الفضائل/حدیث: 34653]

حضرت محمد بن عبدا اللہ بن کثیر بن الصلت رحمہ اللہ فرماتے ہیں کہ ہمارے ایک آزاد کردہ غلام نے ایک عربی عورت سے نکاح کرلیا۔ تو اس کو حضرت عمر بن عبد العزیز رحمہ اللہ کے پاس لایا گیا اور اس کے خلاف مدد مانگی گئی تو آپ رحمہ اللہ نے فرمایا: اللہ کی قسم! تحقیق آل کثیر کے غلام نے اپنے رتبہ اور اپنی حد سے بڑھ کر کام کیا۔ [مصنف ابن ابي شيبه/كتاب الفضائل/حدیث: 34654]

حضرت سعید بن مسیب فرماتے ہیں کہ حضرت عمر رضی اللہ عنہ نے عربی کو باندی کے ساتھ شادی کرنے سے منع فرمایا۔ آپ نے باندیوں کے ساتھ شادی کرنے والے عربوں کے بارے میں چھ قلائص کا فیصلہ فرمایا مرد و عورت اس میں برابر ہیں اور موالی کا بھی یہی حکم ہے جبکہ معلوم نہ ہو۔ حضرت زہری فرماتے ہیں کہ عربی اور موالی نسب میں برابر نہیں۔ [مصنف ابن ابي شيبه/كتاب الفضائل/حدیث: 34655]