سیدنا جابر بن عبداللہ رضی اللہ عنہما، نبی کریم صلی اللہ علیہ وسلم کا یہ فرمان نقل کرتے ہیں: آپ صلی اللہ علیہ وسلم نے گوہ کے بارے میں یہ فرمایا ہے: ”جب حالت احرام والا شخص اسے مار دے، تو اب اس کا کفارہ ایک دنبہ ہو گا اور اس کا گوشت کھایا جائے گا۔“ [سنن الدارقطني/ كِتَابُ الْحَجِّ/حدیث: 2539]

عبدالرحمن بن ابوعمار بیان کرتے ہیں: ہم نے سیدنا جابر بن عبداللہ رضی اللہ عنہما سے گوہ کے بارے میں دریافت کیا، تو انہوں نے فرمایا: اس میں ایک دنبہ دینا پڑے گا، میں نے دریافت کیا: کیا یہ لازم ہے؟ انہوں نے جواب دیا: جی ہاں، یہی فرمایا تھا کہ یہ لازم ہے۔ [سنن الدارقطني/ كِتَابُ الْحَجِّ/حدیث: 2540]

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے ارشاد فرمایا ہے: ”گوہ شکار ہے۔“ (راوی کہتے ہیں) نبی کریم صلی اللہ علیہ وسلم نے اس میں دنبے کے کفارے کی ادائیگی مقرر کی ہے۔ [سنن الدارقطني/ كِتَابُ الْحَجِّ/حدیث: 2541]

عبدالرحمن بن ابوعمار، سیدنا جابر رضی اللہ عنہ کے بارے میں یہ بیان کرتے ہیں، وہ کہتے ہیں: میں نے دریافت کیا کہ گوہ کو کھایا جا سکتا ہے؟ انہوں نے جواب دیا: جی ہاں! میں نے دریافت کیا: کیا یہ شکار ہے؟ انہوں نے جواب دیا: جی ہاں! میں نے دریافت کیا: کیا آپ نے نبی کریم صلی اللہ علیہ وسلم کی زبانی یہ بات سنی ہے؟ انہوں نے جواب دیا: جی ہاں!۔ [سنن الدارقطني/ كِتَابُ الْحَجِّ/حدیث: 2542]

ابن ابوعمار بیان کرتے ہیں: میں نے سیدنا جابر بن عبداللہ رضی اللہ عنہما سے گوہ کے بارے میں دریافت کیا: کیا یہ شکار ہے؟ انہوں نے جواب دیا: جی ہاں! میں نے پوچھا: اسے کھایا جا سکتا ہے؟ انہوں نے فرمایا: جی ہاں! میں نے دریافت کیا: کیا آپ نے نبی کریم صلی اللہ علیہ وسلم کی زبانی یہ بات سنی ہے؟ انہوں نے جواب دیا: جی ہاں!۔ [سنن الدارقطني/ كِتَابُ الْحَجِّ/حدیث: 2543]

عبدالرحمن بن ابوعمار بیان کرتے ہیں: انہوں نے سیدنا جابر رضی اللہ عنہ سے گوہ کے بارے میں دریافت کیا، انہوں نے پوچھا: کیا اسے کھایا جا سکتا ہے؟ سیدنا جابر رضی اللہ عنہ نے جواب دیا: جی ہاں! انہوں نے دریافت کیا: کیا یہ شکار ہے؟ انہوں نے جواب دیا: جی ہاں! انہوں نے دریافت کیا: کیا آپ نے نبی کریم صلی اللہ علیہ وسلم کی زبانی یہ بات سنی ہے؟ انہوں نے جواب دیا: جی ہاں!۔ [سنن الدارقطني/ كِتَابُ الْحَجِّ/حدیث: 2544]

سیدنا جابر بن عبداللہ رضی اللہ عنہما بیان کرتے ہیں: نبی کریم صلی اللہ علیہ وسلم سے گوہ کے بارے میں دریافت کیا گیا، تو آپ صلی اللہ علیہ وسلم نے فرمایا: ”یہ شکار ہے۔“ (راوی کہتے ہیں) اگر حالت احرام والا شخص اسے مار دے، تو نبی کریم صلی اللہ علیہ وسلم نے اس کا کفارہ ایک دنبے کی قربانی مقرر کیا ہے۔ [سنن الدارقطني/ كِتَابُ الْحَجِّ/حدیث: 2545]

سیدنا جابر رضی اللہ عنہ، نبی کریم صلی اللہ علیہ وسلم کا یہ فرمان نقل کرتے ہیں: گوہ کے بارے میں آپ صلی اللہ علیہ وسلم نے یہ فرمایا: ”حالت احرام والا شخص اگر اسے مار دے، تو اسے دنبے کا کفارہ دینا ہو گا۔“ اور ہرن کے بارے میں یہ فرمایا: ”بکری کی قربانی دینی ہو گی۔“ خرگوش کے بارے میں فرمایا ہے: ”بکری کے بچے کی قربانی دینی ہو گی۔“ اور یربوع کے بارے میں فرمایا ہے: ”اس میں بکری کے چھوٹے بچے کی قربانی دینی ہو گی۔“ راوی کہتے ہیں: حدیث میں استعمال ہونے والے لفظ ”جفرہ“ سے مراد وہ چھوٹا جانور ہے، جو چل لیتا ہو۔ [سنن الدارقطني/ كِتَابُ الْحَجِّ/حدیث: 2546]

سیدنا جابر رضی اللہ عنہ کے بارے میں یہ بات منقول ہے: انہوں نے گوہ کے شکار میں دنبے کی قربانی کا فیصلہ دیا تھا۔ یعقوب نامی راوی نے یہی الفاظ نقل کیے ہیں، انہوں نے فیصلہ دیا تھا۔ [سنن الدارقطني/ كِتَابُ الْحَجِّ/حدیث: 2547]

سیدنا عبداللہ بن عباس رضی اللہ عنہما کا حرم کے کبوتر کے بارے میں یہ حکم منقول ہے: حرم کے کبوتر کو مارنے کا کفارہ بکری ہو گا، انڈے کو نقصان پہنچانے کا کفارہ ایک درہم ہو گا، شترمرغ کو مارنے پر اونٹ قربان کرنا پڑے گا، گائے کو مارنے پر گائے کی قربانی دینی پڑے گی اور نیل گائے کو مارنے پر گائے کی قربانی دینی ہو گی۔ [سنن الدارقطني/ كِتَابُ الْحَجِّ/حدیث: 2548]