ابو زرعہ رحمہ اللہ کہتے ہیں: سیدنا ابو ہریرہ رضی اللہ عنہ نے پانی منگوا کر وضو کیا، جب انہوں نے بازوؤں کو دھویا تو کہنیوں سے تجاوز کر گئے، اسی طرح جب پاؤں کو دھویا، تو ٹخنوں سے تجاوز کر کے پنڈلیوں کو بھی دھونے لگ گئے، میں نے کہا: ”یہ کیسا وضو ہے؟“ انہوں نے کہا: ”یہ زیور اور زینت کے پہنچنے کی جگہ ہے۔“ [الفتح الربانی/أَبْوَابُ الْوُضُوءِ/حدیث: 653]

نعیم بن عبداللہ مجمر رحمہ اللہ کہتے ہیں کہ وہ مسجد کی چھت پر چڑھ کر سیدنا ابو ہریرہ رضی اللہ عنہ کے پاس پہنچے، جبکہ وہ وضو کر رہے تھے، وہ (کہنیوں سے اوپر والے) بازوؤں کے حصے کو دھونے لگے، پھر مجھ پر متوجہ ہوئے اور کہا: نبی کریم صلی اللہ علیہ وسلم نے فرمایا: ”بیشک قیامت کے روز وضو کے آثار کی وجہ سے میری امت کی پیشانیاں اور ہاتھ پاؤں چمکتے ہوں گے، اس لیے تم میں سے جو آدمی اپنی سفیدی کو لمبا کرنا چاہتا ہے، وہ کرے۔“ نعیم نے کہا: مجھے یہ علم نہ ہو سکا کہ ’اس لیے تم میں سے جو آدمی اپنی سفیدی کو لمبا کرنا چاہتا ہے، وہ کرے۔‘ کے الفاظ رسول اللہ صلی اللہ علیہ وسلم کے ہیں یا سیدنا ابو ہریرہ رضی اللہ عنہ کے۔ [الفتح الربانی/أَبْوَابُ الْوُضُوءِ/حدیث: 654]

سیدنا عبداللہ بن مسعود رضی اللہ عنہ سے مروی ہے کہ کسی نے رسول اللہ صلی اللہ علیہ وسلم سے کہا: ”آپ اپنی امت کے ان افراد کو کیسے پہچانیں گے، جن کو آپ صلی اللہ علیہ وسلم نے دیکھا نہیں ہے،“ آپ صلی اللہ علیہ وسلم نے فرمایا: ”بیشک وضو کے آثار کی وجہ سے ان کی پیشانی اور ہاتھ پاؤں چمکتے ہوئے اور چتکبرے ہوں گے۔“ [الفتح الربانی/أَبْوَابُ الْوُضُوءِ/حدیث: 655]

ابو حازم رحمہ اللہ کہتے ہیں: میں سیدنا ابو ہریرہ رضی اللہ عنہ کے پیچھے کھڑا تھا، جبکہ وہ وضو کر رہے تھے اور انہوں نے وضو کا پانی بغل تک پہنچا دیا، میں نے کہا: ”اے ابو ہریرہ! یہ کیسا وضو ہے؟“ انہوں نے کہا: ”اے بنو فروخ! تم لوگ یہاں ہو؟ اگر مجھے پتہ ہوتا کہ تم یہاں موجود ہو تو میں نے یہ وضو نہیں کرنا تھا، میں نے اپنے خلیل صلی اللہ علیہ وسلم کو یہ فرماتے ہوئے سنا تھا: ’زیور اور زینت مؤمن کی اس جگہ تک پہنچے گی، جہاں تک وضو پہنچتا ہے۔‘“ [الفتح الربانی/أَبْوَابُ الْوُضُوءِ/حدیث: 656]

سیدنا لقیط بن صبرہ رضی اللہ عنہ سے مروی ہے، وہ کہتے ہیں: میں نبی کریم صلی اللہ علیہ وسلم کے پاس آیا، پس آپ صلی اللہ علیہ وسلم نے مجھے فرمایا: ”جب تو وضو کرے، تو انگلیوں کا خلال کیا کر۔“ [الفتح الربانی/أَبْوَابُ الْوُضُوءِ/حدیث: 657]

سیدنا ابو ایوب انصاری رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”خلال کرنے والے بہت اچھے ہیں۔“ کسی نے کہا: ”خلال کرنے والوں سے مراد کیا ہے؟“ آپ صلی اللہ علیہ وسلم نے فرمایا: ”جو وضو اور کھانے میں خلال کرتے ہیں۔“ [الفتح الربانی/أَبْوَابُ الْوُضُوءِ/حدیث: 658]

سیدنا عبداللہ بن زید رضی اللہ عنہ سے مروی ہے کہ نبی کریم صلی اللہ علیہ وسلم نے وضو کیا اور آپ صلی اللہ علیہ وسلم وضو میں (اعضا کو) ملنے لگے۔ [الفتح الربانی/أَبْوَابُ الْوُضُوءِ/حدیث: 659]