سیدنا ابن عمر رضی اللہ عنہما سے روایت ہے کہ وہ عید کے دن عیدگاہ کی طرف نکلے تو انہوں نے نماز سے پہلے اور اس کے بعد کوئی (نفل) نماز نہیں پڑھی، اور انہوں نے ذکر کیا کہ نبی کریم صلی اللہ علیہ وسلم نے بھی اسی طرح کیا تھا۔
اس حدیث کی سند صحیح ہے، لیکن شیخین نے ان الفاظ کے ساتھ اسے روایت نہیں کیا، البتہ ان دونوں نے سعید بن جبیر عن ابن عباس کی حدیث پر اتفاق کیا ہے کہ نبی کریم صلی اللہ علیہ وسلم نے عید کی نماز سے نہ پہلے کوئی نماز پڑھی اور نہ اس کے بعد۔ [المستدرك على الصحيحين/كِتَابُ صَلَاةِ الْعِيدَيْنِ/حدیث: 1107]

سیدنا ابن عباس رضی اللہ عنہما سے روایت ہے کہ نبی کریم صلی اللہ علیہ وسلم نے عید کے دن خطبہ سے پہلے نماز پڑھائی۔
یہ احمد بن عبدہ کی حدیث کے الفاظ ہیں جبکہ سلیمان کی روایت میں اختصار ہے، یہ حدیث شیخین کی شرط پر صحیح ہے، لیکن انہوں نے اس طرح سے اسے روایت نہیں کیا۔ [المستدرك على الصحيحين/كِتَابُ صَلَاةِ الْعِيدَيْنِ/حدیث: 1108]

وہب بن کیسان بیان کرتے ہیں کہ میں سیدنا ابن زبیر رضی اللہ عنہما کے دورِ امارت میں مکہ میں موجود تھا کہ عید الفطر یا عید الاضحیٰ جمعہ کے دن آ گئی، تو انہوں نے نکلنے میں تاخیر کی یہاں تک کہ دن چڑھ گیا، پھر وہ باہر آئے اور منبر پر چڑھے تو خطبہ دیا اور اسے طویل کیا، پھر دو رکعتیں پڑھائیں اور جمعہ کی نماز نہیں پڑھی، بنو امیہ کے کچھ لوگوں نے ان پر اس بات کی وجہ سے اعتراض کیا، جب یہ بات سیدنا ابن عباس رضی اللہ عنہما تک پہنچی تو انہوں نے فرمایا: ابن زبیر نے سنت کے عین مطابق کیا ہے، جب یہ بات ابن زبیر کو پہنچی تو انہوں نے کہا: میں نے سیدنا عمر بن خطاب رضی اللہ عنہ کو دیکھا ہے کہ جب دو عیدیں جمع ہو جاتیں تو وہ اسی طرح کیا کرتے تھے۔
یہ حدیث شیخین کی شرط پر صحیح ہے، لیکن انہوں نے اسے روایت نہیں کیا۔ [المستدرك على الصحيحين/كِتَابُ صَلَاةِ الْعِيدَيْنِ/حدیث: 1109]

سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم عید کے دن (عیدگاہ جانے کے لیے) ایک راستہ اختیار فرماتے اور واپسی پر دوسرے راستے سے تشریف لاتے تھے۔ [المستدرك على الصحيحين/كِتَابُ صَلَاةِ الْعِيدَيْنِ/حدیث: 1110]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم جب عیدین کے لیے نکلتے تو واپسی پر اس راستے کے علاوہ دوسرے راستے سے تشریف لاتے جس سے آپ صلی اللہ علیہ وسلم (عیدگاہ) گئے تھے۔
یہ حدیث شیخین کی شرط پر صحیح ہے، لیکن انہوں نے اسے روایت نہیں کیا، اور اس کا شاہد اس سے پہلی والی حدیث ہے جو سیدنا عبداللہ بن عمر رضی اللہ عنہما سے مروی ہے۔ [المستدرك على الصحيحين/كِتَابُ صَلَاةِ الْعِيدَيْنِ/حدیث: 1111]

بکر بن مبشر بیان کرتے ہیں کہ میں عید الفطر کے دن رسول اللہ صلی اللہ علیہ وسلم کے صحابہ کے ساتھ عیدگاہ جایا کرتا تھا، ہم بطنِ بطحان کی گھاٹی سے گزرتے یہاں تک کہ عیدگاہ پہنچ جاتے، پھر ہم نبی کریم صلی اللہ علیہ وسلم کے ساتھ نماز پڑھتے اور پھر اپنے گھروں کو واپس لوٹ جاتے۔ [المستدرك على الصحيحين/كِتَابُ صَلَاةِ الْعِيدَيْنِ/حدیث: 1112]