سیدنا سعد بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”ابنِ آدم کی خوش بختی کی تین چیزیں ہیں اور ابنِ آدم کی بدبختی کی بھی تین چیزیں ہیں، پس ابنِ آدم کی خوش بختی میں سے (یہ ہیں): نیک عورت، عمدہ مکان اور اچھی سواری، اور ابنِ آدم کی بدبختی میں سے (یہ ہیں): تنگ مکان، بری عورت اور بری سواری۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ قَسْمِ الْفَيْءِ/حدیث: 2672]

سیدنا ابودرداء رضی اللہ عنہ سے روایت ہے، وہ فرماتے ہیں کہ میں نے رسول اللہ صلی اللہ علیہ وسلم کو فرماتے سنا: ”میرے لیے اپنے کمزوروں کو تلاش کرو (یعنی ان کا خیال رکھو)، کیونکہ تمہیں تمہارے کمزوروں کی وجہ سے ہی رزق دیا جاتا ہے اور تمہاری مدد کی جاتی ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ قَسْمِ الْفَيْءِ/حدیث: 2673]

سیدنا عبداللہ بن عمرو رضی اللہ عنہما سے روایت ہے کہ رسول اللہ صلی اللہ علیہ وسلم جنگِ بدر کے دن تین سو پندرہ جنگجوؤں کے ساتھ نکلے جیسے (سیدنا) طالوت نکلے تھے، جب رسول اللہ صلی اللہ علیہ وسلم روانہ ہوئے تو ان کے لیے دعا فرمائی اور عرض کیا: «اللَّهُمَّ إِنَّهُمْ حُفَاةٌ، فَاحْمِلْهُمْ، اللَّهُمَّ إِنَّهُمْ عُرَاةٌ، فَاكْسُهُمُ اللَّهُمَّ إِنَّهُمْ جِيَاعٌ، فَأَشْبِعْهُمْ» ”اے اللہ! یہ لوگ ننگے پاؤں ہیں، تو انہیں سواری عطا فرما، اے اللہ! یہ برہنہ تن ہیں، تو انہیں لباس عطا فرما، اے اللہ! یہ بھوکے ہیں، تو انہیں سیر فرما۔“ چنانچہ اللہ نے انہیں جنگِ بدر کے دن فتح عطا فرمائی، اور وہ اس حال میں واپس ہوئے کہ ان میں سے ہر شخص ایک یا دو اونٹوں کے ساتھ لوٹا، ان کو لباس بھی ملا اور وہ شکم سیر بھی ہوئے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ قَسْمِ الْفَيْءِ/حدیث: 2674]