سیدنا جابر رضی اللہ عنہ فرماتے ہیں: جب سورۃ الانعام نازل ہوئی تو رسول اللہ صلی اللہ علیہ وسلم نے ” سبحان اللہ “ کہا۔ پھر فرمایا: اس سورۃ نے تو پورا آسمان ملائکہ سے بھر دیا ہے۔ ٭٭ یہ حدیث امام مسلم رحمۃ اللہ علیہ کے معیار پر صحیح ہے کیونکہ یہ جو اسماعیل ہیں یہ ” سدی “ ہیں تاہم امام بخاری رحمۃ اللہ علیہ نے ان کی روایات نقل نہیں کی ہیں۔ [المستدرك على الصحيحين/كِتَابُ التَّفْسِيرِ/حدیث: 3265]

سیدنا (عبداللہ) بن عباس رضی اللہ عنہما سے اللہ تعالیٰ کے ارشاد: ثُمَّ قَضٰٓی اَجَلًا وَ اَجَلٌ مُّسَمًّی عِنْدَہٗ (الانعام: 2) ” پھر ایک میعاد کا حکم رکھا اور ایک مقررہ وعدہ اس کے یہاں ہے “۔ کے متعلق مروی ہے کہ ان دونوں میعادوں سے مراد دنیا اور آخرت کی میعاد ہے جو کہ اللہ تعالیٰ کے ہاں مقرر ہیں اور اس کو اللہ تعالیٰ کے سوا کوئی نہیں جانتا اور آپ نے اللہ تعالیٰ کے ارشاد: وَلَوْ نَزَّلْنَا عَلَیْکَ کِتَابًا فِیْ قِرْطَاسٍ فَلَمَسُوْہُ بِاَیْدِیْھِمْ (الانعام: 7) ” اور اگر ہم تم پر کاغذ میں کچھ لکھا ہوا اتارتے کہ وہ اسے اپنے ہاتھوں سے چھوتے “۔ کے متعلق فرمایا: اس کو اپنے ہاتھ سے چھوتے اور آنکھوں سے دیکھتے لیکن پھر ایمان نہ لاتے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3266]

سیدنا عبداللہ بن عباس رضی اللہ عنہما اللہ تعالیٰ کے ارشاد: (وَھُمْ یَنْھَوْنَ عَنْہُ وَ یَنْئَوْنَ عَنْہُ) (الانعام: 26) ” اور وہ اس سے روکتے اور اس سے دور بھاگتے ہیں “۔ کے متعلق فرماتے ہیں: یہ آیت ابوطالب کے متعلق نازل ہوئی جو کہ مشرکین کو رسول اکرم صلی اللہ علیہ وسلم کی ایذا رسانیوں سے روکتے تھے لیکن جو (پیغام) آپ لے کر آئے ہیں، اس کو قبول نہ کرتے تھے۔ [المستدرك على الصحيحين/كِتَابُ التَّفْسِيرِ/حدیث: 3267]

سیدنا عبداللہ بن عباس رضی اللہ عنہما اللہ تعالیٰ کے ارشاد: (وَھُمْ یَنْھَوْنَ عَنْہُ وَ یَنْئَوْنَ عَنْہُ) (الانعام: 26) ” اور وہ اس سے روکتے اور اس سے دور بھاگتے ہیں “۔ کے متعلق فرمایا: یہ آیت ابوطالب کے متعلق نازل ہوئی جو مشرکوں کی ایذا رسانیوں سے آپ کا دفاع کیا کرتے تھے جبکہ (جو کچھ آپ لے کر آئے) اس سے دور رہتے تھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3268]

سیدنا علی رضی اللہ عنہ فرماتے ہیں: ابوجہل نے نبی اکرم صلی اللہ علیہ وسلم سے کہا: اے محمد ( صلی اللہ علیہ وسلم )! ہم جانتے ہیں کہ آپ صلہ رحمی کرتے ہیں، ہمیشہ سچ بولتے ہیں اور ہم تمہیں جھٹلاتے بھی نہیں ہیں ہم تو اس (پیغام) کو جھٹلاتے ہیں جو تم لے کر آئے ہو۔ تو اللہ تعالیٰ نے یہ آیت نازل فرمائی: قَدْ نَعْلَمُ اِنَّہٗ لَیَحْزُنُکَ الَّذِیْ یَقُوْلُوْنَ فَاِنَّھُمْ لَا یُکَذِّبُوْنَکَ وَلٰکِنَّ الظّٰلِمِیْنَ بِاٰیٰتِ اللّٰہِ یَجْحَدُوْنَ (الانعام: 33) ” ہمیں معلوم ہے کہ تمہیں رنج دیتی ہے وہ بات جو یہ کہہ رہے ہیں تو وہ تمہیں نہیں جھٹلاتے بلکہ ظالم اللہ کی آیتوں سے انکار کرتے ہیں “۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3269]

سیدنا ابوہریرہ رضی اللہ عنہ اللہ تعالیٰ کے ارشاد: اُمَمٌ اَمْثَالُکُمْ (الانعام: 38) ” تم جیسی امتیں “۔ کے متعلق فرماتے ہیں: قیامت کے دن چرند پرند تمام جانور اور ہر شئے کو جمع کیا جائے گا اور ہر چیز تک اللہ تعالیٰ کا انصاف پہنچے گا حتیٰ کہ بغیر سینگ والی بکری سینگ والی سے بدلہ لے گی، پھر اللہ تعالیٰ اس سے کہے گا: تم مٹی ہو جاؤ، یہ وہ وقت ہو گا جب: وَ یَقُوْلُ الْکٰفِرُ ٰیلَیْتَنِیْ کُنْتُ تُرٰبًا (النباء: 40) ” اور کافر کہے گا ہائے میں کسی طرح خاک ہو جاتا۔“ ٭٭ یہ جعفر الجذری ابن برقان ہیں، امام مسلم رحمۃ اللہ علیہ نے ان کی روایات نقل کی ہیں لیکن امام بخاری رحمۃ اللہ علیہ نے ان کی روایات درج نہیں کیں۔ [المستدرك على الصحيحين/كِتَابُ التَّفْسِيرِ/حدیث: 3270]

سیدنا علی رضی اللہ عنہ نے یہ آیت: اَلَّذِیْنَ ٰامَنُوْا وَ لَمْ یَلْبِسُوْآ اِیْمَانَھُمْ بِظُلْمٍ (الانعام: 82) ” وہ جو ایمان لائے اور اپنے ایمان میں کسی ناحق کی آمیزش نہ کی “۔ پڑھی اور فرمایا: یہ آیت سیدنا ابراہیم علیہ السلام اور ان کے اصحاب سے متعلق ہے۔ اس کا حکم اس امت کے لیے نہیں ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ تاہم امام بخاری رحمۃ اللہ علیہ اور امام مسلم رحمۃ اللہ علیہ نے اعمش پھر ابراہیم پھر سیدنا علقمہ پھر سیدنا عبداللہ رضی اللہ عنہ کے حوالے سے یہ حدیث نقل کی ہے کہ صحابہ کرام رضی اللہ عنہم نے عرض کی: یا رسول اللہ صلی اللہ علیہ وسلم ! ہم میں سے کون ہے جس نے اپنے اوپر ظلم نہ کیا ہو؟ یہ پوری حدیث نقل کی ہے اور اس میں مذکورہ تاویل بھی موجود نہیں ہے۔ [المستدرك على الصحيحين/كِتَابُ التَّفْسِيرِ/حدیث: 3271]

سیدنا عبداللہ بن عباس رضی اللہ عنہما سے دریافت کیا گیا: کیا محمد صلی اللہ علیہ وسلم نے رب کو دیکھا ہے؟ انہوں نے جواباً کہا: جی ہاں۔ آپ صلی اللہ علیہ وسلم نے دیکھا ہے (اور حالت یوں تھی) گویا کہ آپ کے دونوں قدم موتیوں کے پردوں کے نیچے سبزے پر تھے۔ میں نے کہا: اے ابن عباس رضی اللہ عنہما! کیا اللہ تعالیٰ نے یہ نہیں فرمایا: لَا تُدْرِكُهُ الْأَبْصَارُ وَهُوَ يُدْرِكُ الْأَبْصَارَ (الانعام: 103) ” آنکھیں اسے احاطہ نہیں کرتیں اور سب آنکھیں اس کے احاطہ میں ہیں “ (ترجمعہ کنزالایمان،) آپ نے فرمایا: تیری ماں نہ رہے، ایسا نہیں ہے وہ (رسول اکرم صلی اللہ علیہ وسلم ) تو اللہ تعالیٰ (ہی) کا نور ہیں اور اس کے نور کا یہ عالم ہے کہ جب اپنے نور کی تجلی ڈالتا ہے تو کوئی چیز اس کا ادراک نہیں کر سکتی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3272]