سیدنا عبداللہ رضی اللہ عنہ، اللہ تعالیٰ کے ارشاد: یَعْلَمُ مُسْتَقَرَّھَا وَ مُسْتَوْدَعَھَا (ھود: 6) ” اور جانتا ہے کہ کہاں ٹھہرے گا اور کہاں سپرد ہو گا “ کے متعلق فرماتے ہیں: اس کا ٹھہرنا رحم میں ہے اور اس کا سپرد ہونا اس کی موت ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3344]

سیدنا سعید بن جبیر رضی اللہ عنہ سے روایت ہے کہ سیدنا (عبداللہ) بن عباس رضی اللہ عنہما سے اللہ تعالیٰ کے ارشاد: وَّکَانَ عَرْشُہٗ عَلَی الْمَآئِ (ھود: 7) ” اور اس کا عرش پانی پر تھا “ کے متعلق پوچھا گیا: پانی کس چیز پر تھا؟ آپ نے فرمایا: ہوا پر۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3345]

سیدنا بریدہ اسلمی رضی اللہ عنہ فرماتے ہیں: کچھ لوگ رسول اللہ صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم سے سوال کرنا شروع کر دیئے اور کہنے لگے: ہمیں عطا کیجئے، ہمیں عطا کیجئے، حتیٰ کہ یہ بات آپ کو بری لگنے لگی۔ پھر کچھ اور لوگ آپ کے پاس آئے، انہوں نے کہا: ہم رسول اللہ صلی اللہ علیہ وسلم کو سلام کرنے اور (آپ سے) دین کے مسائل سمجھنے کے لیے آئے ہیں اور کائنات کی ابتداء کے بارے میں پوچھنے آئے ہیں، آپ صلی اللہ علیہ وسلم نے فرمایا: صرف اللہ تعالیٰ ہی کی ذات تھی اور اس کے سوا کچھ نہیں تھا اور عرش پانی پر تھا اور قرآن کریم میں ہر شئے کا ذکر لکھ دیا گیا ہے پھر ساتوں آسمان پیدا کیے۔ (راوی) کہتے ہیں: پھر ایک شخص آیا اور کہنے لگا: تیری اونٹنی بھاگ گئی ہے (راوی) کہتے ہیں: میں نے یہ خواہش کی کاش میں نے اس کو چھوڑ ہی دیا ہوتا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3346]

سیدنا عبداللہ بن عباس رضی اللہ عنہما سے مروی ہے: وَلَئِنْ اَخَّرْنَا عَنْھُمُ الْعَذَابَ اِلٰٓی اُمَّۃٍ مَّعْدُوْدَۃٍ (ھود: 8) ” اور اگر ہم ان سے عذاب کچھ گنتی کی مدت تک ہٹا دیں “ (اس آیت میں اِلٰٓی اُمَّۃٍ مَّعْدُوْدَۃٍ کا مطلب اِلٰٓی اَجَلٍ مَّعْدُوْدَۃٍ ہے۔) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3347]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: اس امت میں سے جو شخص میری نبوت کے بارے میں سن لے وہ خواہ یہودی ہو یا نصرانی اور پھر وہ مجھ پر ایمان نہ لائے تو وہ جہنمی ہے۔ میں کتاب اللہ تعالیٰ میں اس بات کی تصدیق ڈھونڈنے لگ گیا حتیٰ کہ اس آیت میں مجھے آپ کے ارشاد کی تصدیق مل گئی: وَمَنْ یَّکْفُرْ بِہٖ مِنَ الْاَحْزَابِ فَالنَّارُ مَوْعِدُہٗ (ھود: 17) اور جو اس کا منکر ہو سارے گروہوں میں تو آگ اس کا وعدہ ہے “ (،) آپ نے فرمایا: اس آیت میں الاحزاب سے مراد تمام ملتیں ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3348]