سیدنا ابن عباس رضی اللہ عنہ بیان کرتے ہیں کہ رسول اللہ صلی اللہ علیہ وسلم عرفات سے روانہ ہوئے تو بڑے آرام اور سکون سے چلے۔ اسامہ رضی اللہ عنہ آپ کے پیچھے بیٹھے ہوئے تھے۔ آپ نے فرمایا: ”لوگو! آرام سے چلو، نیکی گھوڑے اور اونٹ دوڑانے میں نہیں۔“ سو میں نے دیکھا کہ (کوئی بھی سواری) اپنے دونوں (اگلے) پاؤں اٹھا کر نہ دوڑ رہی تھی حتیٰ کہ آپ مزدلفہ پہنچ گئے۔ وہب نے مزید کہا: پھر آپ نے سیدنا فضل بن عباس رضی اللہ عنہ کو اپنے پیچھے بٹھا لیا اور فرمایا: ”لوگو! نیکی گھوڑے اور اونٹ دوڑانے میں نہیں، سکون سے چلو۔“ اور میں نے نہیں دیکھا کہ کوئی سواری اپنے دونوں پاؤں اٹھا کر چل رہی ہو۔ حتیٰ کہ آپ منیٰ میں آ گئے۔ [سنن ابي داود/كِتَاب الْمَنَاسِكِ/حدیث: 1920]

جناب کریب بیان کرتے ہیں کہ میں نے سیدنا اسامہ بن زید رضی اللہ عنہ سے کہا: ”مجھے یہ بتائیں کہ اس شام جب آپ رسول اللہ صلی اللہ علیہ وسلم کے پیچھے سوار تھے، آپ لوگوں نے کیسے کیا؟“ انہوں نے بتایا کہ ہم اس گھاٹی میں آئے جس میں لوگ اپنی سواریاں بٹھاتے ہیں۔ وہ جگہ معرس کہلاتی ہے۔ رسول اللہ صلی اللہ علیہ وسلم نے اپنی اونٹنی بٹھائی، پھر پیشاب کیا۔ اسامہ رضی اللہ عنہ نے «أَهْرَاقَ الْمَاءَ» کے الفاظ استعمال نہیں کیے۔ (یعنی ”پانی بہایا“ نہیں کہا) پھر آپ صلی اللہ علیہ وسلم نے پانی طلب کیا اور وضو فرمایا جس میں کوئی مبالغہ نہ تھا۔ (یعنی ہلکا وضو کیا، اعضاء کو ایک دو بار دھویا) میں نے کہا: ”اے اللہ کے رسول صلی اللہ علیہ وسلم ! نماز؟“ آپ صلی اللہ علیہ وسلم نے فرمایا: ”نماز تمہارے آگے ہے۔“ (آگے چل کر پڑھیں گے) پھر آپ صلی اللہ علیہ وسلم سوار ہو گئے حتیٰ کہ ہم مزدلفہ پہنچ گئے۔ پھر آپ صلی اللہ علیہ وسلم نے مغرب کی نماز پڑھائی۔ پھر لوگوں نے سواریوں کو اپنے اپنے پڑاؤ پر بٹھایا مگر ان کے (پالان اور کجاوے) نہیں کھولے حتیٰ کہ عشاء کی اقامت کہلوائی اور نماز پڑھائی۔ پھر لوگوں نے (اپنی سواریوں کو) کھولا۔ محمد بن کثیر نے اپنی روایت میں مزید کہا: میں نے پوچھا: ”جب تم لوگوں نے صبح کی، تو کیسے کیا تھا؟“ انہوں نے کہا: ”فضل رضی اللہ عنہ آپ صلی اللہ علیہ وسلم کے پیچھے سوار ہوئے اور میں قریش کے ان افراد کے ساتھ پیدل چلا گیا جو دیگر لوگوں سے پہلے روانہ ہوئے تھے۔“ [سنن ابي داود/كِتَاب الْمَنَاسِكِ/حدیث: 1921]

سیدنا علی رضی اللہ عنہ سے روایت ہے، انہوں نے کہا: ”پھر آپ صلی اللہ علیہ وسلم نے اسامہ رضی اللہ عنہ کو اپنے پیچھے سوار کر لیا۔ پھر آپ صلی اللہ علیہ وسلم اپنی اونٹنی پر درمیانی چال «الْعَنَقُ» (عنق) سے روانہ ہوئے اور لوگ دائیں بائیں اونٹوں کو پیٹ رہے تھے۔ آپ صلی اللہ علیہ وسلم ان کی طرف متوجہ نہ ہوتے تھے اور فرما رہے تھے: ”لوگو! سکون کے ساتھ!“ اور آپ صلی اللہ علیہ وسلم عرفات سے سورج غروب ہونے کے بعد روانہ ہوئے۔“ [سنن ابي داود/كِتَاب الْمَنَاسِكِ/حدیث: 1922]

جناب عروہ رضی اللہ عنہ نے بیان کیا کہ سیدنا اسامہ بن زید رضی اللہ عنہ سے پوچھا گیا، اور میں (اس مجلس میں) بیٹھا تھا، کہ ”رسول اللہ صلی اللہ علیہ وسلم حجۃ الوداع میں جب عرفہ سے روانہ ہوئے تھے تو کس رفتار سے چلے تھے؟“ انہوں نے کہا کہ ”آپ صلی اللہ علیہ وسلم درمیانی رفتار «الْعَنَقُ» (عنق) سے چلے تھے۔ جب کوئی فراخی پاتے تو قدرے تیز ہو جاتے۔“ ہشام نے کہا کہ ” «النَّصُّ» (نص) والی رفتار «الْعَنَقُ» (عنق) سے قدرے تیز تر ہوتی ہے۔“ [سنن ابي داود/كِتَاب الْمَنَاسِكِ/حدیث: 1923]

سیدنا اسامہ رضی اللہ عنہ بیان کرتے ہیں کہ ”میں نبی کریم صلی اللہ علیہ وسلم کے پیچھے سوار تھا، جب سورج غروب ہو گیا تو رسول اللہ صلی اللہ علیہ وسلم وہاں سے روانہ ہوئے (یعنی عرفات سے)۔“ [سنن ابي داود/كِتَاب الْمَنَاسِكِ/حدیث: 1924]

کریب مولیٰ عبداللہ بن عباس رضی اللہ عنہ نے سیدنا اسامہ بن زید رضی اللہ عنہ سے سنا وہ کہہ رہے تھے کہ ”رسول اللہ صلی اللہ علیہ وسلم عرفات سے روانہ ہوئے حتیٰ کہ جب گھاٹی میں پہنچے تو اترے، پیشاب کیا، پھر وضو کیا مگر اس میں مبالغہ نہیں تھا۔ میں نے عرض کیا: ”نماز؟“ آپ صلی اللہ علیہ وسلم نے فرمایا: ”نماز تمہارے آگے ہے۔“ (یعنی آگے پڑھیں گے) پھر آپ صلی اللہ علیہ وسلم سوار ہو گئے۔ جب مزدلفہ پہنچے، تو اترے وضو کیا اور کامل وضو کیا۔ پھر نماز کی اقامت کہی گئی تو مغرب کی نماز پڑھائی، پھر ہر شخص نے اپنے اپنے اونٹ کو اپنے اپنے پڑاؤ میں بٹھایا، پھر عشاء کی اقامت کہی گئی تو آپ صلی اللہ علیہ وسلم نے نماز پڑھائی اور ان کے مابین کچھ نہیں پڑھا۔“ [سنن ابي داود/كِتَاب الْمَنَاسِكِ/حدیث: 1925]