سیدنا عبداللہ بن عباس رضی اللہ عنہما نے یہ آیت تلاوت کی: یٰٓاَایُّھَا الَّذِیْنَ ٰامَنُوْآ اِذَا نَکَحْتُمُ الْمُؤْمِنٰتِ ثُمَّ طَلَّقْتُمُوْھُنَّ مِنْ قَبْلِ اَنْ تَمَسُّوْھُنَّ (الاحزاب: 49) ” اے ایمان والو! جب تم مسلمان عورتوں سے نکاح کرو پھر انہیں بے ہاتھ لگائے چھوڑ دو “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ امام حاکم رحمۃ اللہ علیہ کہتے ہیں: میں بہت حیران ہوں کہ امام بخاری رحمۃ اللہ علیہ اور امام مسلم رحمۃ اللہ علیہ نے اس حدیث کو کیسے چھوڑ دیا؟ اور صحیحین میں اس کو درج نہیں کیا؟۔ سیدنا ابن عمر، سیدہ عائشہ، سیدنا عبداللہ بن عباس، سیدنا معاذ بن جبل اور سیدنا جابر بن عبداللہ رضوان اللہ علیہم اجمعین سے مروی احادیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہیں۔ سیدنا عبداللہ بن عمر رضی اللہ عنہما سے مروی حدیث درج ذیل ہے۔ [المستدرك على الصحيحين/كِتَابُ التَّفْسِيرِ/حدیث: 3609]

سیدنا عبداللہ بن عمر رضی اللہ عنہما فرماتے ہیں: رسول اللہ صلی اللہ علیہ وسلم نے ارشاد فرمایا: طلاق، نکاح کے بعد ہی ہو سکتی ہے۔ سیدہ عائشہ رضی اللہ عنہا سے مروی حدیث۔ [المستدرك على الصحيحين/كِتَابُ التَّفْسِيرِ/حدیث: 3610]

ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم نے ارشاد فرمایا: طلاق، نکاح کے بعد اور آزادی ملکیت کے بعد ہوتی ہے۔ سیدنا عبداللہ بن عباس رضی اللہ عنہما سے مروی حدیث۔ [المستدرك على الصحيحين/كِتَابُ التَّفْسِيرِ/حدیث: 3611]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: اس شخص کی طلاق (کی کوئی حیثیت) نہیں ہے جو (حق طلاق کا) مالک نہیں ہے۔ سیدنا معاذ بن جبل رضی اللہ عنہ سے مروی حدیث۔ [المستدرك على الصحيحين/كِتَابُ التَّفْسِيرِ/حدیث: 3612]

سیدنا معاذ بن جبل رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: کوئی طلاق نہیں مگر نکاح کے بعد اور کوئی آزادی نہیں مگر ملکیت کے بعد۔ سیدنا جابر رضی اللہ عنہ سے مروی حدیث: [المستدرك على الصحيحين/كِتَابُ التَّفْسِيرِ/حدیث: 3613]

سیدنا جابر بن عبداللہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جو شخص (طلاق کا) مالک نہیں ہے اس کی طلاق (کی کوئی حیثیت) نہیں ہے اور جو (عتق کا) مالک نہیں ہے اس کے عتق کی کوئی حیثیت نہیں ہے۔ [المستدرك على الصحيحين/كِتَابُ التَّفْسِيرِ/حدیث: 3614]

سیدنا جابر بن عبداللہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: نکاح سے پہلے طلاق نہیں دی جا سکتی۔ ٭٭ امام حاکم رحمۃ اللہ علیہ کہتے ہیں: اس حدیث کی سند کا مدار ان دو کمزور اسنادوں پر ہے۔ (1) جَرِیْرٌ، عَنِ الضَّحَّاکِ، عَنِ النَّزَّالِ بْنِ سَبْرَۃَ، عَنْ عَلِیٍ (2) وَعَمْرِو بْنِ شُعَیْبٍ، عَنْ اَبِیْہِ، عَنْ جَدِّہٖ۔ اسی لیے امام بخاری رحمۃ اللہ علیہ اور امام مسلم رحمۃ اللہ علیہ کی جانب سے اس صحیح حدیث کی طلب میں کوئی زیادہ کوشش سامنے نہیں آئی۔ [المستدرك على الصحيحين/كِتَابُ التَّفْسِيرِ/حدیث: 3615]

سیدہ ام ہانی رضی اللہ عنہا فرماتی ہیں: نبی اکرم صلی اللہ علیہ وسلم نے مجھے پیغام نکاح بھیجا لیکن میں نے آپ سے معذرت کر لی اور آپ نے میری معذرت قبول کر لی۔ تب اللہ تعالیٰ نے یہ آیت نازل فرمائی: یٰٓاَیُّھَا النَّبِیُّ اِنَّا اَحْلَلْنَا لَکَ اَزْوَاجَکَ الّٰتِیْٓ ٰاتَیْتَ اُجُوْرَھُنَّ وَمَا مَلَکَتْ یَمِیْنُکَ مِمَّآ اَفَآء اللّٰہُ عَلَیْکَ وَ بَنٰتِ عَمِّکَ وَ بَنٰتِ عَمّٰتِکَ وَ بَنٰتِ خَالِکَ وَ بَنٰتِ خٰلٰتِکَ الّٰتِیْ ھَاجَرْنَ مَعَکَ (الاحزاب: 50) ” اے غیب بتانے والے! ہم نے تمہارے لیے حلال فرمائیں تمہاری وہ بیبیاں جن کو تم مہر دو اور تمہارے ہاتھ کا مال کنیزیں جو اللہ نے تمہیں غنیمت میں دیں اور تمہارے چچا کی بیٹیاں اور پھپیوں کی بیٹیاں اور ماموں کی بیٹیاں اور خالاؤں کی بیٹیاں جنہوں نے تمہارے ساتھ ہجرت کی “۔ آپ فرماتی ہیں: میں تو ان کے لیے حلال نہ تھی، میں نے ان کے ہمراہ ہجرت نہیں کی۔ میں تو طلاق یافتگان میں سے تھی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3616]