جعفر بن محمد رحمہ اللہ نے بیان کیا کہ میں نے حکم بن عتیبہ کو اپنے باپ سے پوچھتے ہوئے سنا جبکہ انہوں نے کھڑے ہونے کے لیے قبر کی دیوار پر ہاتھ رکھا ہوا تھا: (پوچھا) ”کیا نبی صلی اللہ علیہ وسلم نے قسم کے ساتھ ایک گواہ پر فیصلہ دیا؟“ تو فرمایا: ”ہاں، اور اسی طرح تمہارے درمیان علی رضی اللہ عنہ نے بھی فیصلہ دیا۔“ [المستدرك على الصحيحين/كِتَابُ التَّفْسِيرِ/حدیث: 3800]

عمرو بن شعیب نے اپنے والد سے روایت کیا کہ نبی صلی اللہ علیہ وسلم نے گواہی کے متعلق فرمایا: ”اگر (مدعی) ایک گواہ لائے تو وہ گواہ کے ساتھ قسم بھی کھائے (تو فیصلہ اس کے حق میں ہوگا)۔“ [المستدرك على الصحيحين/كِتَابُ التَّفْسِيرِ/حدیث: 3801]

ابو جعفر رحمہ اللہ سے روایت ہے کہ رسول اللہ صلی اللہ علیہ وسلم نے ”قسم کے ساتھ ایک گواہ پر فیصلہ دیا۔“ [المستدرك على الصحيحين/كِتَابُ التَّفْسِيرِ/حدیث: 3802]

جابر رضی اللہ عنہ سے روایت ہے کہ نبی صلی اللہ علیہ وسلم نے ”قسم کے ساتھ ایک گواہ پر فیصلہ دیا۔“ [المستدرك على الصحيحين/كِتَابُ التَّفْسِيرِ/حدیث: 3803]

جابر بن عبد اللہ رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس شخص نے میرے اس منبر پر جھوٹی قسم کھائی، اس نے اپنا ٹھکانہ جہنم بنا لیا۔“ [المستدرك على الصحيحين/كِتَابُ التَّفْسِيرِ/حدیث: 3804]

ابو غطفان المری نے بیان فرمایا کہ زید بن ثابت اور ابن مطیع رضی اللہ عنہما نے اپنے ایک (مشترکہ) گھر کے جھگڑے کا مقدمہ مروان بن حکم کے سامنے رکھا، تو مروان نے اس بات پر فیصلہ دیا کہ زید بن ثابت رضی اللہ عنہ منبر پر قسم کھائیں۔ زید بن ثابت رضی اللہ عنہ نے فرمایا: میں اپنی جگہ پر ہی قسم کھاؤں گا۔ مروان نے کہا: نہیں، اللہ کی قسم! وہیں قسم کھاؤ جہاں لوگوں کے فیصلے ہوتے ہیں (یعنی منبر پر)۔ تو زید بن ثابت رضی اللہ عنہ یہ قسم کھاتے تھے کہ میں سچا ہوں لیکن منبر پر قسم کھانے سے انکار کرتے تھے اور مروان کو اس بات پر تعجب ہوتا تھا۔ امام مالک رحمہ اللہ نے فرمایا کہ زید بن ثابت رضی اللہ عنہ نے زبردستی قسم لینے کو ناپسند کیا ہے۔ [المستدرك على الصحيحين/كِتَابُ التَّفْسِيرِ/حدیث: 3805]

ابن ابی ملیکہ نے بیان کیا کہ میں نے ابن عباس رضی اللہ عنہما کو طائف سے دو لونڈیوں کے متعلق لکھا جن میں سے ایک نے دوسری کو مارا تھا اور اس وقت کوئی گواہ بھی نہیں تھا، تو انہوں نے میری طرف جواب میں لکھ بھیجا کہ ان کو عصر کے بعد روک اور ان پر یہ آیت پڑھ: ﴿جو لوگ اللہ کے عہد اور اپنی قسموں کو تھوڑی قیمت پر بیچتے ہیں﴾ [سورة آل عمران: 77] ۔ ابن ابی ملیکہ کہتے ہیں کہ میں نے اسی طرح کیا تو ان میں سے ایک نے (جرم کا) اعتراف کر لیا۔ [المستدرك على الصحيحين/كِتَابُ التَّفْسِيرِ/حدیث: 3806]