محمد بن اسحاق بن یسار اپنے شیوخ سے روایت کرتے ہیں کہ رسول اللہ صلی اللہ علیہ وسلم کی زوجہ محترمہ سیدہ امِ حبیبہ بنت ابی سفیان رضی اللہ عنہا نے عبداللہ بن ابی ربیعہ (جو عیاش بن ابی ربیعہ کے بھائی تھے) کی طرف ایک قاصد بھیجا تاکہ انہیں سیدنا عثمان رضی اللہ عنہ کی شہادت کی خبر دیں، اور انہوں نے ان کی طرف وہ قمیص اور کپڑے بھی بھیجے جو ان کے خون سے رنگے ہوئے تھے، جب وہ قاصد ان کے پاس پہنچا تو وہ لوگوں کے پاس آئے اور منبر پر چڑھ کر انہیں شہادت کی خبر دی، انہوں نے وہ قمیص منبر پر پھیلائی اور خود بھی روئے اور لوگ بھی ان کے ساتھ روئے، پھر انہوں نے یہ اشعار پڑھے: ”میرے پاس ایسی خبر آئی ہے جس میں لوگوں کے لیے بڑا غم اور آنکھوں کے لیے طویل رونا ہے، اس میں زندگی کے سامان کی ذلت ہے اور اس میں ناک کا جڑ سے کٹ جانا ہے، یہ امیر المؤمنین کی شہادت کی ایسی مصیبت اور جھٹکا ہے جس سے بلند و بالا پہاڑ بھی اپنی جگہ سے ٹل جائیں، مدینہ میں ان کے خلاف ایک گروہ اکٹھا ہو گیا جس کے دو فریق تھے: ایک قاتل اور دوسرا بے وفائی کرنے والا، میں ابوعمرو روؤں گا ہر اس ہندوستانی تلوار اور چمکتے ہوئے ہتھیار سے، جن کی جھنکار زرہ پوشوں کے درمیان گونجتی ہے، اور اب نیند حرام ہے جب تک کہ اس قوم کے سینے نیزوں سے چھید نہ دیے جائیں اور گمراہ قوم سے دل کی پیاس نہ بجھالی جائے، میں جب تک زندہ ہوں اس شہر میں دامن گھسیٹتے ہوئے نہیں رہوں گا جبکہ آپ مقتول پڑے ہوں،“ راوی کہتے ہیں: پھر وہ عثمان رضی اللہ عنہ کی نصرت کے لیے اپنے ساتھیوں سمیت نکلے لیکن جب مکہ کے قریب پہنچے تو اپنی سواری سے گر گئے اور وفات پا گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4613]

امام شعبی رحمہ اللہ سے روایت ہے، انہوں نے کہا: میں نے سیدنا عثمان رضی اللہ عنہ کے سوگ میں کہے گئے اشعار اشعار میں سے کعب بن مالک رضی اللہ عنہ کے ان اشعار سے بہتر کوئی کلام نہیں سنا: ”پس انہوں نے اپنے ہاتھ روک لیے اور اپنا دروازہ بند کر لیا، اور انہیں اس بات کا یقین تھا کہ اللہ غافل نہیں ہے، اور انہوں نے اپنے گھر والوں سے کہا: ان لوگوں کو قتل نہ کرو، اللہ ہر اس شخص سے درگزر فرمائے جو نہیں لڑا، پس تم نے دیکھا کہ اللہ نے ان کے درمیان باہمی تعلق کے بعد کس طرح دشمنی اور بغض ڈال دیا، اور تم نے دیکھا کہ ان کے بعد بھلائی لوگوں سے اس طرح پیٹھ پھیر گئی جیسے تیز ہوائیں پیٹھ پھیر لیتی ہیں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4614]