سیدنا عبداللہ بن عباس رضی اللہ عنہما سے روایت ہے کہ ان سے سیدنا عثمان رضی اللہ عنہ کے متعلق پوچھا گیا کہ ان کی انگوٹھی کے نگینے پر کیا نقش تھا؟ انہوں نے کہا: ان کی نیت کی سچائی کی وجہ سے ان کی انگوٹھی کے نگینے پر یہ عبارت درج تھی: «اللَّهُمَّ أَحْيِنِي سَعِيدًا، وَأَمِتْنِي شَهِيدًا» ”اے اللہ! مجھے سعادت مندی کی زندگی عطا فرما اور مجھے شہادت کی موت نصیب فرما،“ پس اللہ کی قسم! وہ سعادت مندی کے ساتھ جئے اور شہادت کی موت پائے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4615]

حصین حارثی سے روایت ہے، انہوں نے کہا: سیدنا علی بن ابی طالب رضی اللہ عنہ سیدنا زید بن ارقم رضی اللہ عنہ کی عیادت کے لیے تشریف لائے جبکہ وہاں کچھ لوگ موجود تھے، سیدنا علی رضی اللہ عنہ نے فرمایا: سکون سے بیٹھو اور خاموش رہو، اللہ کی قسم! تم مجھ سے جس چیز کے بارے میں بھی پوچھو گے میں تمہیں (ضرور) بتاؤں گا، تو زید رضی اللہ عنہ نے کہا: میں آپ کو اللہ کا واسطہ دے کر پوچھتا ہوں، کیا آپ نے عثمان کو قتل کیا ہے؟ اس پر سیدنا علی رضی اللہ عنہ نے تھوڑی دیر کے لیے سر جھکا لیا، پھر فرمایا: اس ذات کی قسم جس نے دانے کو پھاڑا اور جان کو پیدا کیا، نہ میں نے انہیں قتل کیا اور نہ ان کے قتل کا حکم دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4616]

ہارون کہتے ہیں کہ ہمیں ابواسامہ نے زہیر سے، انہوں نے کنانہ سے روایت کرتے ہوئے بیان کیا، انہوں نے کہا: میں نے سیدنا حسن بن علی رضی اللہ عنہما کو دیکھا کہ انہیں سیدنا عثمان رضی اللہ عنہ کے گھر سے زخمی حالت میں باہر نکالا گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4616M]