نافع بن جبیر فرماتے ہیں: میں نے سیدنا عباس رضی اللہ عنہ کو دیکھا کہ وہ سیدنا زبیر رضی اللہ عنہ کو کہہ رہے تھے ” اے عبداللہ! رسول اللہ صلی اللہ علیہ وسلم نے یہاں جھنڈا گاڑھنے کا تمہیں حکم دیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5645]

ابوالاسود کہتے ہیں: سیدنا زبیر بن عوام رضی اللہ عنہ آٹھ سال کی عمر میں اسلام لائے، اٹھارہ سال کی عمر میں ہجرت کی، زبیر کا چچا ان کو ایک چٹائی میں لپیٹ کر لٹکا دیتا تھا اور پھر آگ کی دھونی دیتا تھا اور کہتا تھا کہ تم کفر کی طرف واپس آ جاؤ، لیکن سیدنا زبیر بن عوام رضی اللہ عنہ فرماتے ہیں: میں کبھی بھی کفر نہیں کروں گا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5646]

عروہ کہتے ہیں: سیدنا زبیر مسلمان ہوئے اور حبشہ کی جانب دونوں ہجرتیں کی ہیں، اور رسول اللہ صلی اللہ علیہ وسلم نے جتنی جنگیں لڑی ہیں ان میں سے کسی ایک میں بھی سیدنا زبیر پیچھے نہیں رہے۔ رسول اللہ صلی اللہ علیہ وسلم نے ان کے اور عبداللہ بن مسعود رضی اللہ عنہ کے درمیان عقد مواخات کیا تھا۔ ان کا قد نہ تو زیادہ لمبا تھا اور نہ ہی زیادہ چھوٹا تھا، ان کی داڑھی گھنی نہیں تھی۔ رنگ گندمی تھا، بال بہت لمبے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5647]

مصعب بن عبداللہ زبیری فرماتے ہیں: سیدنا زبیر مدینہ کی جانب روانہ ہوئے، عمرو بن جرموز بھی ان کے پیچھے پیچھے مدینہ کی جانب چل پڑا، وادی سباع میں اس نے آپ رضی اللہ عنہ کو دھوکہ کے ساتھ شہید کر دیا، اللہ تعالیٰ نے سیدنا علی رضی اللہ عنہ اور ان کے ساتھیوں کو ان کے خون سے بری کر دیا۔ عمرو بن جرموز نے آپ رضی اللہ عنہ کو 36 سن ہجری کو رجب کے مہینے میں شہید کیا۔ اور عرب میں بنو مجاشع کے بارے میں یہ بات مشہور ہے کہ وہ زبیر کے بارے میں بہت ساری باتیں چھپا گئے ہیں۔ اس لئے جریر نے کہا: زبیر (کے قتل) کے بعد مجاشع نے حیض والے کپڑے پہن لئے ہیں جن سے خون نہیں دھویا گیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5648]