سیدنا جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جو شخص کسی ایسے شہید کو دیکھنا چاہتا ہو جو روئے زمین پر چل رہا ہو، تو اسے چاہیے کہ وہ طلحہ بن عبید اللہ کو دیکھ لے“۔
اس حدیث کو نقل کرنے میں صلت بن دینار منفرد ہیں اور یہ اس کتاب کی شرط پر نہیں ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5712]

سیدنا طلحہ رضی اللہ عنہ کے آزاد کردہ غلام ابوحبیبہ سے روایت ہے کہ میں معرکہ جمل سے فراغت کے بعد سیدنا عمران بن طلحہ رضی اللہ عنہ کے ساتھ سیدنا علی بن ابی طالب رضی اللہ عنہ کی خدمت میں حاضر ہوا، راوی کہتے ہیں: سیدنا علی رضی اللہ عنہ نے انہیں خوش آمدید کہا اور اپنے قریب بٹھایا، پھر فرمایا: میں اللہ سے یہ امید رکھتا ہوں کہ وہ مجھے اور تمہارے والد کو ان لوگوں میں شامل فرمائے گا جن کے متعلق اللہ تعالیٰ نے فرمایا ہے: ﴿وَنَزَعْنَا مَا فِي صُدُورِهِمْ مِنْ غِلٍّ إِخْوَانًا عَلَى سُرُرٍ مُتَقَابِلِينَ﴾ ”اور ان کے سینوں میں جو تھوڑی بہت رنجش تھی ہم اسے نکال دیں گے، وہ بھائی بھائی بن کر آمنے سامنے تختوں پر بیٹھے ہوں گے“ [سورة الحجر: 47] ، پھر سیدنا علی رضی اللہ عنہ نے دریافت فرمایا: اے بھتیجے! فلاں اور فلاں خاتون کیسی ہیں؟ اور ان کے والد کی امہات الاولاد کے بارے میں بھی پوچھا، پھر فرمایا: ہم نے تمہاری یہ زمینیں ان برسوں میں صرف اس ڈر سے اپنے قبضے میں رکھی تھیں کہ لوگ انہیں لوٹ نہ لیں، اے فلاں! ان کے ساتھ ابن قرظہ کے پاس جاؤ اور اسے حکم دو کہ ان زمینوں کی ان برسوں کی تمام پیداوار اور زمینیں بھی ان کے حوالے کر دے، اس پر وہاں گوشے میں بیٹھے ہوئے دو آدمیوں نے، جن میں سے ایک حارث اعور تھا، کہا: اللہ اس سے کہیں زیادہ عادل ہے کہ ایسا ہو، کیا ہم انہیں قتل کریں اور وہ جنت میں ہمارے بھائی ہوں؟ سیدنا علی رضی اللہ عنہ نے غصے سے فرمایا: تم دونوں یہاں سے اٹھ جاؤ اور اللہ کی زمین میں کہیں دور اور ہلاکت والی جگہ چلے جاؤ! اگر میں اور طلحہ (اس آیت کے مصداق) نہیں ہیں، تو پھر اور کون ہے؟ (پھر عمران بن طلحہ سے فرمایا:) اے میرے بھتیجے! جب بھی تمہیں کوئی ضرورت ہو تو ہمارے پاس آ جایا کرو۔"۔
اس حدیث کی سند صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5713]