عبداللہ بن صفوان سے روایت ہے کہ وہ اور ایک دوسرے شخص سیدہ عائشہ رضی اللہ عنہا کی خدمت میں حاضر ہوئے تو سیدہ عائشہ رضی اللہ عنہا نے ان میں سے ایک سے پوچھا: ”اے فلاں! کیا تم نے حفصہ کی بیان کردہ بات سنی ہے؟“ اس نے عرض کیا: ”جی ہاں، اے ام المؤمنین!“ تو عبداللہ بن صفوان نے پوچھا: ”وہ کیا بات ہے؟“ انہوں نے فرمایا: ”میری نو ایسی خصوصیات ہیں جو میرے علاوہ کسی عورت کو نہیں دی گئیں سوائے اس کے جو اللہ تعالیٰ نے مریم بنت عمران کو عطا فرمایا، اور اللہ کی قسم میں یہ اپنی کسی ساتھی پر فخر کے طور پر نہیں کہہ رہی: 1 فرشتہ میری تصویر لے کر رسول اللہ صلی اللہ علیہ وسلم کے پاس آیا، 2 آپ صلی اللہ علیہ وسلم نے مجھ سے اس وقت نکاح فرمایا جب میں سات سال کی تھی، 3 میری رخصتی نو سال کی عمر میں ہوئی، 4 آپ صلی اللہ علیہ وسلم نے مجھ سے اس حال میں نکاح فرمایا کہ میں کنواری تھی اور میرے علاوہ کوئی دوسرا اس میں شریک نہ تھا، 5 آپ صلی اللہ علیہ وسلم پر وحی اس وقت بھی نازل ہوتی جب میں اور آپ صلی اللہ علیہ وسلم ایک ہی لحاف میں ہوتے تھے، 6 میں آپ صلی اللہ علیہ وسلم کو تمام لوگوں میں سب سے زیادہ محبوب تھی، 7 میری شان میں قرآن کی وہ آیات نازل ہوئیں جن کے معاملے میں قریب تھا کہ امت ہلاک ہو جاتی، 8 میں نے جبرائیل علیہ السلام کو دیکھا جبکہ آپ صلی اللہ علیہ وسلم کی دیگر ازواج میں سے کسی نے انہیں نہیں دیکھا، اور 9 آپ صلی اللہ علیہ وسلم کی وفات میرے گھر میں ہوئی اور فرشتے کے علاوہ آپ صلی اللہ علیہ وسلم کے سب سے قریب اس وقت صرف میں ہی تھی۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6879]

سیدنا ابن عباس رضی اللہ عنہما نے اللہ تعالیٰ کے اس ارشاد ﴿إِنَّ الَّذِينَ يَرْمُونَ الْمُحْصَنَاتِ الْغَافِلَاتِ﴾ [سورة النور: 23] کے بارے میں فرمایا کہ یہ آیت خاص طور پر سیدہ عائشہ رضی اللہ عنہا کی شان میں نازل ہوئی ہے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6880]

سیدنا احنف بن قیس رضی اللہ عنہ سے روایت ہے، انہوں نے کہا: ”میں نے سیدنا ابوبکر صدیق، سیدنا عمر بن خطاب، سیدنا عثمان بن عفان، سیدنا علی بن ابی طالب رضی اللہ عنہم اور ان کے بعد کے خلفاء کے خطبات آج کے دن تک مسلسل سنے ہیں، مگر میں نے کسی بھی انسان کے منہ سے سیدہ عائشہ رضی اللہ عنہا کے کلام سے زیادہ پرشکوہ اور خوبصورت کلام نہیں سنا۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6881]