سیدنا فضالہ بن عبید فرماتے ہیں: اہل عراق سے دو آدمی اپنے والد کے لیے شفاء تلاش کرتے ہوئے آئے، اس کا پیشاب رک گیا تھا، کسی شخص نے ان کو سیدنا فضالہ رضی اللہ عنہ کا بتا دیا۔ وہ دونوں آدمی سیدنا فضالہ رضی اللہ عنہ کے پاس آئے اور اپنے آنے کا مقصد بیان کیا۔ سیدنا فضالہ رضی اللہ عنہ نے فرمایا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ کسی بھی قسم کی بیماری ہو یا اس کا کوئی بھائی بیمار ہو اس کو چاہیے کہ یوں دعا مانگے۔ رَبَّنَا الَّذِي فِي السَّمَاءِ تَقَدَّسَ اسْمُكَ أَمَرُكَ فِي السَّمَاءِ وَالْأَرْضِ كَمَا رَحْمَتُكَ فِي السَّمَاءِ وَالْأَرْضِ اغْفِرْ لَنَا حَوبَنَا وَخَطَايَانَا يَا رَبَّ الطَّيِّبِينَ أَنْزِلْ شِفَاءً مِنْ شِفَائِكَ وَرَحْمَةً مِنْ رَحْمَتِكَ عَلَى هَذَا الْوَجَعِ فَيَبْرَأْ ” اے میرے رب! وہ جو آسمانوں میں ہے، تیرا نام پاکیزہ ہے، تیرا حکم زمین اور آسمان میں چلتا ہے، جیسا کہ تیری رحمت آسمانوں اور زمینوں میں ہے، ہمارے گناہ اور ہماری خطائیں معاف فرما، اے طیبین کے رب، اس درد پر اپنی شفاء میں سے شفاء نازل فرما، اور اپنی رحمتوں میں سے رحمت نازل فرما “ وہ شخص ٹھیک ہو جائے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7702]

سیدنا عقبہ بن عامر جہنی رضی اللہ عنہ فرماتے ہیں: وہ دس آدمیوں کے ہمراہ نبی اکرم صلی اللہ علیہ وسلم کی بارگاہ میں حاضر ہوئے، رسول اللہ صلی اللہ علیہ وسلم نے ان میں سے 9 کی بیعت لے لی اور ایک کو روک دیا، صحابہ کرام رضی اللہ عنہم نے پوچھا: اس آدمی کو کیا ہوا ہے؟ حضور صلی اللہ علیہ وسلم آپ اس کی بیعت کیوں نہیں لے رہے؟ آپ صلی اللہ علیہ وسلم نے فرمایا: اس لیے کہ اس کے بازو پر تمیمہ باندھا ہوا ہے۔ اس شخص نے وہ تمیمہ کاٹ کر اتار دیا، تب رسول اللہ صلی اللہ علیہ وسلم نے اس کی بیعت لی، پھر فرمایا: جس نے تمیمہ باندھا، اس نے شرک کیا۔ (لہٰذا کسی عیسائی، اور غیر مسلم سے کبھی بھی تعویذ نہیں لینا چاہیے کہ وہ اللہ تعالیٰ کا کلام نہیں دے گا بلکہ اس کا دیا ہوا تعویذ تمیمہ ہی ہو گا جس سے حضور صلی اللہ علیہ وسلم نے منع فرمایا ہے) [المستدرك على الصحيحين/كِتَابُ الطِّبِّ/حدیث: 7703]

سیدنا عثمان بن ابی العاص رضی اللہ عنہ فرماتے ہیں: میں نے عرض کیا: یا رسول اللہ صلی اللہ علیہ وسلم شیطان میری نماز اور قراءت میں مجھے تنگ کرتا ہے، آپ صلی اللہ علیہ وسلم نے فرمایا: وہ شیطان ہے، اس کو ” خنزب “ کہا جاتا ہے، جب تم اس کو محسوس کرو تو اعوذ باللہ من الشیطان الرجیم پڑھ کر اپنے بائیں جانب تھوک دیا کرو۔ آپ فرماتے ہیں: میں نے اس حکم پر عمل کیا تو اللہ تعالیٰ نے میری تکلیف ختم فرما دی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7704]